Luk 1:1-80
1 Ẹbho ne bunbun wo dọnmhegbe nin ele rẹ gbẹn ebe sunu ọbhi otọ; ene emhin nin mhan yẹ rẹọ i.
2 Ẹbho nin ẹlo nọnsele sẹbhi ebe sunu, bi ẹbho ne wewe ọta nọnsi Osẹnobulua yẹ ta ene emhin nan man mhan.
3 Ranmhude ọnan, imẹn da yẹ fẹ otọ ene emhin nan rebhe ghe nọnsẹn, yẹ dọnmhegbe nin imẹn rẹ gbẹn ele ji uwẹ ọsegbe-ọsegbe, ọwanlẹn nin Tiofilọs,
4 beji uwẹ ha da rẹọbhọ ghe, ẹmhọanta ene emhin nan re unun taman ẹn khin.
5 Bhi ẹghe nọnsi Hẹrọd nin ojie ọsi Judia, ohẹn ọkpa da ha ribhọ natiọle Zẹkaraya. Usun ohẹn ọsi Abaija ọle ha ye. Okhuo ọle da na bhi ulin-uwa ọsi Erọn vae. Ẹlizabẹt hi elin ọlẹn.
6 Eria ne khiale ele veva ha khin bhi ẹlo nọnsi Osẹnobulua. Ele da wo ha re obọ rẹkhan uhi bi emhanmhan nọnsi Jehova.*
7 Ọkpakinọn, ele bha ha mhọn ọmọn, agan Ẹlizabẹt ha khin. Sẹyẹ, ele veva ki manman wanre.
8 Ọ ki sẹ ẹghe nin usun nin ọle ye ha rẹ ga bhi uwa oga, ọle da ha khian dọ ga bhi ihe ọsi ohẹn bhi odalo nọnsi Osẹnobulua.
9 Beji ene ohẹn lu khẹ, ọ da sẹ ọle bhi egbe nin ọle rẹ dọ tuẹ emhin nọn vin-ohin bhi ẹkẹ eje khiale bhi uwa nọnsi Jehova.*
10 Bhi ọne ẹghe nan rẹ ha tuẹ emhin nọn vin-ohin an, usun ẹbho ne bunbun da ha nan erọnmhọn bhi ole.
11 Ẹhi nọnsi Jehova* da re egbe man Zẹkaraya. Ọne ẹhi da mundia bhi obọ-obera ọsi ukhuo-izọese nan da tuẹ emhin nọn vin-ohin an.
12 Zẹkaraya ki daghe ọle, ukpudu da wa ọle. Ofẹn da manman ha mun ọlẹn.
13 Ọkpakinọn, ọne ẹhi da taman ọlẹn yọle: “Hẹi ji ofẹn mun uwẹ Zẹkaraya, ranmhude, a họn erọnmhọn nọnsẹ. Okhuo ẹ nin Ẹlizabẹt dẹ biẹ ọmokpea nin uwe. Jọni hi elin nin uwẹ ha munhẹ ọle.
14 Uwẹ dẹ ha sọnyẹnmhẹn, sẹyẹ, uwẹ dẹ manman ha ghọnghọn. Ẹbho ne bunbun dẹ ha ghọnghọn ẹghe nan ha rẹ biẹ ọle.
15 Ọle dẹ ha yi okpọria bhi ẹlo nọnsi Jehova.* Ọkpakinọn, nin ọle hẹi da anyọn soso nọn mun. Sẹyẹ, ọle dẹ ha mhọn ẹlinmhin nọn khiale ọ bhọ kuẹ sẹ a biẹ ọle.
16 Ọle dẹ rẹkpa ibhokhan Izrẹl ne bunbun rẹ fikie bu Jehova* nin Osẹnobulua nọnsele.
17 Osẹnobulua dẹ je ọle kalo, yẹ re ahu bi ẹlinmhin ọsi Ẹlaija nanlẹn. Ọne ọmọn dẹ re ọkhọle ọsi aba diabe ọsi ọmọn, yẹ fi ọkhọle ọsi ene wo bhi uhọnmhọn denọ beji ele ha da ha mhọn ilẹnmhin ọsi ene khiale. Inian ọle ha rẹ mun ẹbho egbe ọbhi otọ khẹ Jehova.”*
18 Zẹkaraya da nọọn ọne ẹhi yọle: “Be ọnan ha rẹ sabọ sunu yẹ? Imẹn ki dọmanlẹn, sẹyẹ, okhuo imẹn ki manman wanre.”
19 Ọne ẹhi da ki taman ọlẹn yọle: “Elin imẹn hi Gebriẹl. Imẹn mundia sikẹ Osẹnobulua. A je imẹn re nin imẹn dọ ne uwẹ talọ, yẹ ta ọne ọta nọn mhẹn nan man uwẹ.
20 Ọkpakinọn, ghọle! ranmhude, uwẹ bha rẹọ bhi ẹmhọn nin imẹn taman uwẹ, ne ha munsẹ bhi ọne ẹghe nan rẹyi, uwẹ iyẹ da sabọ talọ, rẹ sẹbhi ukpẹdẹ nọn ha munsẹ.”
21 Bhi ọne ẹghe nan, ene ẹbho da ha khẹ Zẹkaraya. Ọ da manman han ele ilo ghe, ọle wo ha bue bhi ẹkẹ uwa oga.
22 Ọle ki dagbare, ọle bha sabọ ne ene ẹbho talọ. Ele da lẹn ghe, ọle miẹn imianlo bhi ẹkẹ uwa oga. Ọle da ha re obọ ne ele talọ, ọle bha sabọ re unun talọ.
23 Ene ikpẹdẹ nin ọle ha rẹ ga bhi uwa oga ki gba, ọle da ha khian uwa.
24 Ikpẹdẹ eso ki gbera, Ẹlizabẹt nin okhuo ọle da ha hanmhan. Ẹlizabẹt da khue egbe ọbhi ẹkẹ uwa rẹ na bhi uki isẹn. Ọle da ha yọle:
25 “Ghe ebi Jehova* lu nin imẹn bhi ọne ẹghe nan. Ọle mhọn itohan da imẹn, yẹ re ẹkhọle si imẹn bhi egbe re.”
26 Ẹkẹ nọnsọle ki sẹ uki ehan, Osẹnobulua da je ẹhi natiọle Gebriẹl ha khian agbaẹbho ọsi Nazarẹt bhi otọ Galili,
27 nin ọle bu ọmanmhẹn ọkpa nọn bha sẹ hẹgẹn,* nan ho nan re nin Josẹf nọn na bhi ulin-uwa ọsi Devid vae bhi amhẹn. Elin ọsi ọne ọmanmhẹn hi Meri.
28 Ọne ẹhi ki bu ọle re, ọ da taman ọlẹn yọle: “Doo, uwẹ nin ẹmhọn ọlẹn manman ti Osẹnobulua bhọ, Jehova* ne uwẹ dia.”
29 Ọkpakinọn, ẹmhọn nin ọne ẹhi tale da wo han ọle ilo. Ọle da ha dọnmhegbe nin ọle rẹ lẹn ebezẹle nin ọne ẹhi da re iriọ tuẹ ọle.
30 Bhiriọ, ọne ẹhi da taman ọlẹn yọle: “Meri, hẹi ji ofẹn mun uwẹ, ranmhude, ẹmhọn ẹn ti Osẹnobulua bhọ.
31 Ghọle! uwẹ dẹ ha hanmhan. Uwẹ ki biẹ ọmokpea, uwẹ ki ha tiọle Jesu.
32 Ọle dẹ ha yi okpọria, sẹyẹ, a ki ha tiọle Ọmọn ọsi Ọnọn Ke Okhun Nẹ. Osẹnobulua nin Jehova* ki mun ojukhuo ọsi Devid nin aba ọle nanlẹn.
33 Ọle ki gbẹloghe uwa ọsi Jekọp rẹ sẹbhi ighegheghe. Ejele nọnsọle ida ha mhọn ọkpẹnlẹn.”
34 Ọkpakinọn, Meri da nọọn ọne ẹhi yọle: “Be ọnan ha rẹ sabọ sunu yẹ beji a miẹn ghe imẹn bha ne okpea nowẹ?”
35 Ọne ẹhi da wanniẹn ọlẹn yọle: “Ọnọn Ke Okhun Nẹ dẹ re ẹlinmhin nọn khiale nọnsọle nin uwẹ. Sẹyẹ, ahu nọnsọle ki degue uwẹ. Ọnan zẹle nan ha da ha tie ọmọn nin uwẹ ha biẹ ọnọn khiale, Ọmọn nọnsi Osẹnobulua.
36 Ghọle! Ẹlizabẹt nin obhio ẹ bhọ hanmhan arẹmiẹn ọle dọmanlẹn. Uki nọnzi ehan ọle ki ye. Okhuo nin ẹbho tiọle agan.
37 A imiẹn ebi Osẹnobulua tale nin ọle ida sabọ lu.”*
38 Bhiriọ, Meri da yọle: “Ghe imẹn! Igbọn nọnsi Jehova* imẹn khin! Ji ọ sunu ji imẹn beji uwẹ rẹ tale.” Bhiriọ, ọne ẹhi da kpanọ.
39 Ọnin ki gbera, Meri da jẹje ne emhin yẹ ha khian agbaẹbho ọkpa bhi uke oke, bhi otọ ọsi ibhokhan Juda.
40 Ọle da nabhi uwa ọsi Zẹkaraya yẹ tuẹ Ẹlizabẹt.
41 Ẹghe nin Ẹlizabẹt rẹ họn otuẹ ọsi Meri, ọmọn nọn ri ọle bhi ẹkẹ da san okhun, sẹyẹ, ẹlinmhin nọn khiale da vuọn Ẹlizabẹt egbe.
42 Ọle da reso yọle: “Erọnmhọn hi ọsi uwẹ bhi ẹwẹ ene ikhuo. Erọnmhọn yẹ hi ọsi ọmọn nọn ri uwẹ bhi ẹkẹ!
43 Ekpẹn nọn khua khọnan rẹji imẹn nin inẹn Ebeanlẹn imẹn rẹ dọ fẹ imẹn ghe.
44 Ghọle! Ẹghe nin imẹn wo rẹ họn urulu nọnsẹ, ọmọn nọn ri imẹn bhi ẹkẹ da wo san okhun ha ghọnghọn.
45 Eghọnghọn yẹ hi ọsi ọne okhuo nọn rẹọbhọ. Ranmhude, Jehova* dẹ mun emhin rebhe nin ọle taman ọlẹn sẹ.”
46 Meri da yọle: “Imẹn re egbe* rebhe gẹn Jehova.*
47 Eghọnghọn gbe imẹn udu a, ranmhude Osẹnobulua nin Umiẹnfan nọnsẹmhẹn
48 daghe idia nin igbọn nọnsọle nin obhioguele ye. Ghọle! rẹ na bhi ọne ẹghe nan rẹ ha khian, ẹbho rebhe dẹ ha tie imẹn ‘ọne eghọnghọn yi ọsọle,’
49 ranmhude, Osẹnobulua nọn mhọn ahu lu okpemhin nin imẹn. Elin nọnsọle wo khia.
50 Sẹyẹ, rẹ na bhi ore rẹ sẹbhi ore, ọle dẹ wo ha mhọn itohan da ene mun ofẹn ọlẹn.
51 Ọle wo re obọ nọnsọle lu okpemhin; ẹbho ne rẹman ghe ele mhọn itegbemun bhi ẹkẹ ọkhọle, ọle zagha ele a.
52 Ọle ne ikpea ne ribhi ahu sibhi ojukhuo re, yẹ tuẹn ene ibhioguele okhun;
53 Ọle re emhin esili nin ene imhọnlẹn, yẹ ji ene fele da re obọ khọnkhan kpanọ.
54 Ọle vae dọ rẹkpa Izrẹl nin ọguọmhandia nọnsọle. Ọle yere itohan nin ọle yọle ọle dẹ ha mhọn
55 da Ebraham bi imọn nesọle rẹ sẹbhi ighegheghe, beji ọle taman aba mhan nin ẹdẹlẹ.”
56 Meri ki gbe ebe sẹ uki ea bhi isi Ẹlizabẹt, ọle da kpanọ ha khian uwa.
57 Ọ ki sẹ ẹghe nin Ẹlizabẹt ha rẹ biẹ, ọle da biẹ ọmokpea.
58 Ibhio ọle bi idiake nesọle ki họn ghe Jehova* manman mhọn itohan da ọle, ele da deba ọle ha ghọnghọn.
59 Bhi ukpẹdẹ nọnzi elẹnlẹn, ele da vae dọ ruẹ ọne ọmọn. Ele da ha guanọ nin ele hẹ ọne ọmọn Zẹkaraya, elin nan yẹ tie aba ọle.
60 Ọkpakinọn, inẹn ọle da taman ele yọle: “Heye! Jọni a da ha tie ọle.”
61 Ele da ki taman ọlẹn yọle: “Ọria soso iribhi ẹgbẹ-uwa nọnsẹbha nan tie ọle ọne elin nan.”
62 Bhiriọ, ele da re obọ ne aba ọle talọ, yẹ nọọn ọlẹn ebi a da ha tie ọne ọmọn.
63 Ọle da ki yọle nan re emhin nanlẹn nin ọle gbẹn ebe ọi. A ki re nanlẹn, ọle da gbẹn ọbhọ yọle: “Jọni hi elin ọlẹn.” Ọnan da wo han ene ẹbho rebhe ilo.
64 Bhi ọne ẹghe nin tee, unun nọnsọle da tuje a, olanmhẹn nọnsọle da taan. Ọle da munhẹn ha talọ yẹ ha gẹn Osẹnobulua.
65 Ofẹn da wo ha mun idiake nesele rebhe. Sẹyẹ, ẹbho da wo ha tẹmhọn ebe sunu na bhi otọ Judia rebhe.
66 Ẹbho rebhe ne họn ebe sunu da re ọne ẹmhọn ọbhi ọkhọle. Ele da ha yọle: “Be ọne ọmọn nan ha kiẹn?” Obọ nọnsi Jehova* da wo gene ha ri ọle bhi egbe.
67 Ẹlinmhin nọn khiale da munhẹn ha noo Zẹkaraya nin aba ọle. Ọle da ha kha akhasẹ yọle:
68 “Ogẹn hi ọsi Jehova* nin Osẹnobulua ọsi Izrẹl, ranmhude, ọle mhọn itohan da ẹbho nesọle yẹ miẹn ele fan.
69 Ọle zẹ ọria bhi uwa nọnsi Devid nin ọguọmhandia nọnsọle, nin ọle ha yi ikhuan nọn ha miẹn mhan fan,*
70 beji ọle tale rẹ na obọ ene akhasẹ ne nyẹnlẹn bhi ẹghe ẹdẹlẹ,
71 ghe ọle dẹ miẹn mhan fan bhi obọ eghian mhan bi obọ ẹbho rebhe ne he mhan.
72 Ọle dẹ mun ebi ọle taman aba imhan nin ẹdẹlẹ sẹ, yẹ mhọn itohan da ele. Ọle dẹ yẹ ye akovẹn nọn khiale nọnsọle re.
73 Ọnan hi ive nin ọle ve nin Ebraham nin aba mhan nin ẹdẹlẹ,
74 ghe a ha ki miẹn mhan fan bhi obọ eghian mhan fo, ọle ki re isẹhoa nin mhan rẹ re izebhudu ha re oga nọn khiale ji ọle.
75 Mhan ki yẹ ha re asun-rẹkhan bi ikhiakhiale ga ọle bhi ẹdagbọn nọnsẹmhan rebhe.
76 Rẹji uwẹ, ọne ọmọn nan, uwẹ dẹ ha yi akhasẹ ọsi Osẹnobulua Nọn Ke Okhun Nẹ, ranmhude uwẹ dẹ kalo nin Jehova* dọ hẹnhẹn uwedẹ khẹ ọle.
77 Uwẹ dẹ rẹkpa ẹbho nesọle rẹ lẹn ghe ọle dẹ hinmhin ele, yẹ gbe olukhọ nesele kua,
78 ranmhude ẹkẹ-ẹjẹjẹ nin ọle mhọnlẹn. Ranmhude ọne ẹkẹ-ẹjẹjẹ nan, ẹfua dẹ na bhi okhun bhaa nyan mhan bọsi ẹfua nọn zegbere bhi ọsewewiẹ,
79 beji ẹfua ha da bhaa nyan ẹbho ne ribhi ẹkẹ ebiuki bi ẹbho nin adudu ọsi uu degue. Ọne ẹfua ki yẹ rẹkpa mhan ha khian bhi uwedẹ ọsi ọfure.”
80 Ọne ọmọn da wanre, yẹ manman deziẹn bhi uwedẹ oriọn. Ọle da ha nyẹnlẹn bhi ẹkẹ ojẹgbo rẹ sẹbhi ukpẹdẹ nin ọle zegbere man ibhokhan Izrẹl.
Eba gbẹn bho otọle
^ La “ọmanmhẹn nọn bha sẹ ne okpea nowẹ.”
^ La “emhin soso iribhọ nin Osẹnobulua ida sabọ lu.”
^ La “iẹnlẹn nọnsẹmhẹn.” Fẹ Ikpọta Nan Re Otọle Man, “Iẹnlẹn.”
^ La “nin ọle ha yi ọmiẹnmhanfan nọn manman mhọn ahu.” Fẹ Ikpọta Nan Re Otọle Man, “Ikhuan.”
