Luk 10:1-42
-
Jesu da je itue 70 nin ele dọ tẹmhọn Osẹnobulua (1-12)
-
Ọkhọbhegbe rẹji agbaẹbho ne bha ka fidenọ (13-16)
-
Ene edibo 70 da fikiere (17-20)
-
Jesu da gẹn Aba ọle nọn rẹ re ẹlo esili ghe ẹbho ne mhọn idegbere (21-24)
-
Arẹkhọkhọ ọsi obhokhan Sameria nọn mhọn oyẹẹ da ibo ọle (25-37)
-
Jesu da rẹnẹ ji Meri bi Mata (38-42)
10 Ene emhin nan ki gbera, Jesu da zẹ itue igbe nyan egbọ ea,* yẹ je ele dagbare eva-eva, nin ele kalo nanlẹn ha khian ene idunmhun kẹkẹ bi ene agbaẹbho nin ọle tobọle yẹ vade.
2 Ọle da taman ele yọle: “Bhi ọsi ẹmhọanta, emhin nan ha khuan bhi ugbo wo manman bun. Ọkpakinọn, ene ha khuan ọlẹn bha bun. Bhiriọ, bha bhii ọnọn nyan ọne ugbo nin ọle je ẹbho re ne dọ khuan ene emhin.
3 Bha ha khian! Ghọle! Imẹn je bha dagbare bọsi ihuan bhi ẹwẹ elanmhẹn ne tuakọn.*
4 Bha hẹi re ọgbẹnẹ* mhọn, la ẹkpa ebale, la ibata. Sẹyẹ, bha hẹi mundia ha tuẹ ẹbho bhi uwedẹ.
5 Uwa nọn hi ki rẹ khin nin bha na i, bha ka tuẹ ele yọle: ‘Ọfure ne bha dia bhi ọne uwa nan.’
6 Ahamiẹn ọria nọn guanọ ọfure ribhi enin, ji ọfure nin bha mun re nanlẹn dia i, ọkpakinọn, ahamiẹn ọria nọn sẹ iriọ iribhi enin, bha mun ọfure nọnsẹbha kpanọ.
7 Bha diabhi ọne uwa a, bha ha le ebale yẹ da anyọn nin ele mun nin bha. Ọkhẹke nin ọnọn wẹnna miẹn ihaosa nọnsọle. Bha hẹi ha guanọ uwa ọbhebhe khian nin bha ha dia i.
8 “Sẹyẹ, agbaẹbho nọn hi ki rẹ khin nin bha na i, nin ele da miẹn bha ọbhi egbe, bha le ebale nin ele rẹ kue nin ibha.
9 Ibha re egbe daan ene egbe bha daan bhi ọne agbaẹbho, ibha ha yẹ taman ele yọle: ‘Agbejele nọnsi Osẹnobulua sire.’
10 Ọkpakinọn, agbaẹbho nọn hi ki rẹ khin nin bha na i, nin ele bha da miẹn bha ọbhi egbe, bha diọbhi ughe ọsi ọne agbaẹbho bha ha yọle:
11 ‘Mhan bọnmhẹn ekẹn nin mhan re oẹ mun bhi agbaẹbho nọnsẹbha kua, nọn ha yi ọsali rẹji ibha. Ọkpakinọn, bha lẹn sẹbhọ ghe Agbejele nọnsi Osẹnobulua sire.’
12 Imẹn taman ibha ghe, ebe ha sunu ji ọne agbaẹbho nin bhi ukpẹdẹ ibhuohiẹn, dẹ khọ gbera ebe ha sunu ji agbaẹbho ọsi Sodọm.
13 “Ọkhọbhegbe hi ọsẹbha ibhokhan Korezin! Ọkhọbhegbe hi ọsẹbha ibhokhan Bẹtseada! Sade agbaẹbho ọsi Taya bi Saidọn a da lu ene emhin ọhan-ilo nan lu bhi agbaẹbho nọnsẹbha, isan ele mọn rẹ mun ukpọn-akhiẹ yọ yẹ dotua bhi ẹmọn* rẹ rẹman ghe ele fidenọ.
14 Bhiriọ, ebe ha sunu ji ibha bhi ukpẹdẹ ibhuohiẹn dẹ khọ gbera ebe ha sunu ji agbaẹbho ọsi Taya bi Saidọn.
15 Ibha nin ibhokhan Kapaniọn, a dẹ be tuẹn ibha okhun? Idin* ibha ha da ka egbe ibha re!
16 “Ọnọn hi ki rẹ khin nọn ka bha ehọ, imẹn ọle ka ọle ehọ. Ọnọn hi ki rẹ khin nọn re ẹlo gbe ibha a, imẹn ọle re ẹlo gbe a. Sẹyẹ, ọnọn hi ki rẹ khin nọn re ẹlo gbe imẹn an, Ọnọn je imẹn ọle re ẹlo gbe a.”
17 Ene itue igbe nyan egbọ ea* da re eghọnghọn fikiere yẹ taman Jesu yọle: “Ebeanlẹn imhan, ene ẹlinmhin-ebe bhọ hẹnmhọn nin mhan sade mhan noo elin nọnsẹ.”
18 Ọle da taman ele yọle: “Imẹn daghe Esu na okhun dere beji anyan rẹ na bhi okhun nyan re.
19 Ghọle! Imẹn re ọne ahu nin bha, nin bha rẹ re idia nunu ẹnyẹn, bi akpin, bi nin bha rẹ khọn oghian bha miotọ. Emhin iribhọ nọn ha kuan bha.
20 Ọkpakinọn, ọ iyi ranmhude ene ẹlinmhin-ebe hẹnmhọn nin ibha zẹle nin bha ha da ha ghọnghọn. Ibha ha ghọnghọn ranmhude a gbẹn elin nọnsẹbha ọbhi otọ bhi okhun.”
21 Bhi ọne ẹghe nin, ẹlinmhin nọn khiale da wo re Jesu manman ha ghọnghọn. Ọle da yọle: “Aba imẹn nọn nyan otọ nyan okhun, imẹn gẹn uwẹ bhi ogbakha, ranmhude uwẹ ne ene emhin nan he nin ene wanlan bi ene manman lẹn emhin. Ọkpakinọn, uwẹ da re ene emhin nan man ene ibhokhan. Iriọ uwẹ lu Aba, ranmhude, ọnan hi ebi uwẹ re obọ i.
22 Aba imẹn mun emhin rebhe imẹn bhi obọ. Gbera ọne Aba, ọria ọbhebhe iribhọ nọn lẹn ọne Ọmọn. Sẹyẹ, gbera ọne Ọmọn, bi ọnọn hi ki rẹ khin nin ọne Ọmọn guanọ nin ọle re Aba ọle man, ọria ọbhebhe iribhọ nọn lẹn ọne Aba.”
23 Ọle da ki denọ ẹlo da edibo nesọle yẹ taman ele yọle: “Eghọnghọn hi ọsi ẹbho ne daghe emhin nin bha wo ha daghe.
24 Mẹn taman bha ghe, akhasẹ ne bunbun bi ijie ne bunbun wo rẹ ha guanọ nin ele daghe ene emhin nan nin bha wo ha daghe, yẹ họn ene ẹmhọn nan nin bha wo ha họn. Ọkpakinọn, ẹlo ele bha sẹbhọ, ele bha yẹ họn.”
25 Sẹ ghe! Okpea ọkpa nọn manman lẹn uhi da kpanọ mundia nin ọle dọnmhẹn Jesu. Ọne okpea da nọọn ọlẹn yọle: “Ọman-emhin, be imẹn ha lu nin mẹn da sabọ miẹn iẹnlẹn ọsi ighegheghe?”
26 Jesu da nọọn ọlẹn yọle: “Be Uhi tayẹ? Be uwẹ miẹn tie bhọ?”
27 Ọle da wanniẹn Jesu yọle: “‘Uwẹ dẹ re udu nọnsẹ rebhe, egbe* nọnsẹ rebhe, ahu nọnsẹ rebhe bi ọkhọle nọnsẹ rebhe, rẹ hoẹmhọn Jehova* nin Osẹnobulua nọnsẹ. Uwẹ dẹ yẹ hoẹmhọn ibo ẹ beji uwẹ rẹ hoẹmhọn egbe nọnsẹ.’”
28 Jesu da taman ọlẹn yọle: “Uwẹ wo wanniẹn nọnsẹn; wo ha lu iriọ, uwẹ ki miẹn iẹnlẹn.”
29 Ọkpakinọn, ranmhude ọle ho nin ọle rẹman ghe ọria nọn khiale ọle khin, ọle da nọọn Jesu yọle: “Họ bhọ gene hi ibo imẹn?”
30 Jesu da wanniẹn ọlẹn yọle: “Okpea ọkpa nọn na bhi Jerusalẹm ha khian Jẹriko da de ọbhi obọ oyi. Ele da miẹn ọlẹn emhin ne ne ọle, gbe ọle ugbemhin uu yẹ zọbọ bhi enin.
31 Bhi ọne ẹghenin, ohẹn ọkpa da ha gbera bhi ọne uwedẹ, ọle ki daghe ọne okpea, ọle da rẹkhan obọ nọnkẹle gbera.
32 Iriọ obhokhan Livai ọkpa yẹ lu. Ọle ki daghe ọne okpea beji ọle ha gbera bhi ọne uwedẹ, ọle da dọ rẹkhan obọ nọnzi eva gbera.
33 Ọkpakinọn, obhokhan Sameria nọn ha na ọne uwedẹ, da khian ke ọle re. Ọle ki daghe ọle, ọle da wo tohan ọlẹn.
34 Ọle da bu ọle re, yẹ gbanọ ọle itẹ. Ọle da biri abhili bi anyọn ọle bhọ. Ọle da mun ọlẹn nyan kẹtẹkẹtẹ nọnsọle, mun ọlẹn ha khian uwa nin ẹbho ne khian okhian da koahua, yẹ gbẹloghe ọle.
35 Ẹdẹ ki we, ọle da ne dinariọs* eva nin ọnọn gbẹloghe ọne uwa. Ọle da taman ọlẹn yọle: ‘Gbẹloghe ọle. Eka nọn gbe uwẹ le ha gbera ọnan, imẹn dẹ re nin uwẹ si mẹn vae.’
36 Bhi ẹwẹ ene ikpea ea nan, họla uwẹ riale ọ re egbe ọle kiẹn ibo ọne okpea nọn de ọbhi obọ oyi?”
37 Ọle da yọle: “Ọnọn mhọn itohan da ọle.” Jesu da taman ọlẹn yọle: “Uwẹ yẹ dọ ha lu iriọ.”
38 Beji ele ki ha khian, ele da sẹbhi idunmhun ọkpa. Bhi enin, okhuo ọkpa natiọle Mata da miẹn ọlẹn ọbhi egbe bhi uwa nọnsọle.
39 Ọle da ha mhọn obhio natiọle Meri. Ọne obhio ọle nan da dotua bhi egbegbe oẹ nọnsi Jesu, yẹ ha ka ọle ehọ.
40 Ọkpakinọn, Mata da wo ha miẹn ẹsọn ne bunbun bhi obọ. Bhiriọ, ọle da bu Jesu re yẹ taman ọlẹn yọle: “Ebeanlẹn mẹn, uwẹ bha be daghe ọle ghe obhio mẹn wo zẹ ẹsọn rebhe obọ nin mẹn? Taman ọlẹn nin ọle dọ rẹkpa imẹn.”
41 Jesu da taman ọlẹn yọle: “Mata, Mata, emhin nin uwẹ kpokpo egbe ba bun gbe.
42 Emhin nan guanọ bha bun gbe, ukpọkpa bhọ sẹle. Emhin nọn mhẹn nẹ Meri zẹle. Ọria ida sabọ miẹn ọlẹn le.”
Eba gbẹn bho otọle
^ 70
^ Bhi Grik, “wof.” Ọne elanmhẹn nan diabe elanmhẹn natiọle alabe, sokpan, ọle kpọnọ nẹ alabe.
^ La “ọza.”
^ La “ẹmun.”
^ Bhi Grik, “Hedis.” Fẹ Ikpọta Nan Re Otọle Man.
^ 70
^ La “iẹnlẹn.” Fẹ Ikpọta Nan Re Otọle Man.
