Luk 12:1-59
-
Yisti ọsi ibhokhan Farisi (1-3)
-
Bha hẹi mun ofẹn eria, mun ofẹn Osẹnobulua (4-7)
-
Ọria nọn hi ki rẹ khin nọn yọle ghe ọle lẹn Jesu (8-12)
-
Arẹkhọkhọ ọsi ọne okpea nọn mhọn igho nọn imhọn ẹwanlẹn (13-21)
-
Hẹi yẹ kpokpo egbe (22-34)
-
Usun ihuan ne bha bun (32)
-
-
Bha ha babegbe (35-40)
-
Igbọn nan gbaẹkẹ ọle bi igbọn nọn imhẹn (41-48)
-
Iwaegbea mẹn mun re, ọ iyi ọfure (49-53)
-
Dọnmhegbe rẹ lẹn ebe sunu bhi ọne ẹghe nan (54-56)
-
Dọnmhegbe rẹ re ẹmhọn i nọnsẹn (57-59)
12 Bhi ọne ẹghe nin, usun ẹbho ne bunbun da sikoko rẹ sẹbhọ ghe ele da ha zẹ oẹ nyan egbe. Ọle da munhẹn ha taman edibo nesọle yọle: “Ibha gbẹlokotọ bhi yisti ọsi ene Farisi; ọnin hi, ohoghe nin ele bha.
2 Emhin soso iribhọ nan guele nọn ida dagbare, sẹyẹ, emhin soso iribhọ nan lu bhi ẹkhokho nin ẹbho ida lẹn.
3 Bhiriọ, emhin nọn hi ki rẹ khin nin ibha ta bhi ẹkẹ ebiuki, a dẹ họn ọlẹn bhi ẹfua. Sẹyẹ, emhin nin ibha fẹkẹ ta bhi ẹkẹ ugha, a dẹ na bhi okhun uwa wewe ọle.
4 Imọẹ imẹn, ibha hẹi mun ofẹn eria. Ranmhude, ele ha rẹ sabọ gbe ibha a, ele ida sabọ lu ibha emhin ọbhebhe.
5 Imẹn dẹ taman ibha ọne ibha ha mun ofẹn ọlẹn: Bha ha mun ofẹn ọnọn mhọn ọne ahu nọn ha rẹ gbe ọria a, yẹ mun ọlẹn fiọbhi Gẹhẹna.* Ehe, imẹn taman ibha, ọnan hi ọria nin bha ha mun ofẹn ọlẹn.
6 Ikpigho eva ne bha sẹ emhin soso* ọle a rẹ dẹ arẹlẹ* isẹn. Ọrẹyiriọ, a bha miẹn ọkpa bhi ẹwẹ ele nin Osẹnobulua re ẹlo gbe a.
7 Osẹnobulua bhọ lẹn eka eto ne ri ibha bhi uhọnmhọn. Bhiriọ, bha hẹi ji ofẹn ha mun bha; ibha ghan gbera arẹlẹ ne bunbun.
8 “Imẹn taman ibha ghe, ọria nọn hi ki rẹ khin nọn yọle ghe ọle lẹn mẹn bhi isira eria, Ọmọn nọnsi okpea dẹ yẹ yọle ọle lẹn ọlẹn bhi isira ẹhi nesi Osẹnobulua.
9 Ọkpakinọn, ọria nọn hi ki rẹ khin nọn yọle ọle bha lẹn imẹn bhi isira eria, imẹn ki yẹ yọle imẹn bha lẹn ọlẹn bhi isira ẹhi nesi Osẹnobulua.
10 Ọria nọn hi ki rẹ khin nọn re unun ji Ọmọn nọnsi okpea, a dẹ rẹhunmhan ọlẹn. Ọkpakinọn, ọria nọn hi ki rẹ khin nọn re unun ji ẹlinmhin nọn khiale, a ida rẹhunmhan ọlẹn.
11 Ahamiẹn a mun bha re bhi eji ẹbho da sikoko,* la a mun bha bu ene wẹnna nin gọvamẹt, bi ene ribhi ahu, ibha hẹi ha kpokpo egbe ba ebi ibha ha ta, la ebi ibha ha rẹ tale yẹ.
12 Ranmhude, bhi ọne ẹghe nin tee, ẹlinmhin nọn khiale dẹ man ibha ebi ibha ha ta.”
13 Okpea ọkpa bhi ẹwẹ ene usun ẹbho da ki taman ọlẹn yọle: “Ọman-emhin, taman obhio imẹn, nọn ne bhi emhin uku nin imẹn.”
14 Jesu da taman ọlẹn yọle: “Okpea, họla re imẹn kiẹn ọbhuohiẹn nọnsẹbha?”
15 Ọle da ki taman ene ẹbho yọle: “Ibha mhọn ẹwanlẹn, ibha ha rẹban ẹlobhiamhin. Ranmhude, aharẹmiẹn ọria mhọn emhin ne bunbun, ọ iyi ene emhin nin ọle mhọnlẹn ha re iẹnlẹn nanlẹn.”
16 Ọle da ki noo arẹkhọkhọ. Ọle da yọle: “Ugbo ọsi okpea ọkpa nọn fele da wo manman biẹ ebale.
17 Ọle da munhẹn ha nọọn egbe ọle yọle, ‘Be imẹn ha lu yẹ nian beji a miẹn imẹn bha miẹn eji imẹn ha da ne emhin ugbo nesẹmhẹn ya?’
18 Ọle da ki yọle, ‘Imẹn lẹn ebi imẹn ha lu. Imẹn dẹ dunmhun ene uwa nin imẹn da ne ebale ya sotọ, yẹ bọn udede ọle ebhebhe. Imẹn ki yẹ koko emhin ugbo nesẹmhẹn rebhe nabhọ.
19 Ẹghenin, imẹn ki taman egbe imẹn yọle: “Uwẹ wo mhọn emhin ne bunbun ne ha sẹ uwẹ le bhi ikpe ne bunbun; koahua, le ebale, uwẹ ha da anyọn, uwẹ ha wo ha sọnyẹnmhẹn.”’
20 Ọkpakinọn, Osẹnobulua da taman ọlẹn yọle, ‘Uwẹ nọn iwanlan, a dẹ miẹn uwẹ iẹnlẹn* nọnsẹ bhi ọne asọn nan. Họla ha ki ne ene emhin nin uwẹ koko ya?’
21 Iriọ ọ da yẹ ha khin rẹji ọria nọn khuan afe bi ua nin egbe ọle. Ọkpakinọn, ọ bha fe bhi ẹlo nọnsi Osẹnobulua.”
22 Ọle da ki taman edibo nesọle yọle: “Ọnan zẹle nin imẹn da taman ibha yọle: Bha hẹi ha kpokpo egbe ba ẹmhọn iẹnlẹn nọnsẹbha rẹji ebi ibha ha le, la nin ibha ha kpokpo egbe ba ẹmhọn egbe nọnsẹbha rẹji ebi ibha ha yọ.
23 Ranmhude, iẹnlẹn ghan gbera ebale. Sẹyẹ, egbe ghan gbera ukpọn.
24 Ibha gbẹlokotọ bhi ene afianmhẹn: Ele ikọ emhin la khuan emhin ugbo; ele imhọn eru la eji a da koko ebale ya; ọrẹyiriọ, Osẹnobulua re ebale nin ele le. Ibha bha be ghan gbera afianmhẹn?
25 Họla bhi ẹwẹ ibha ha sabọ re ihuẹnlo ọkpa* ba iẹnlẹn nọnsọle ranmhude ọle kpokpo egbe?
26 Ahamiẹn uwẹ bha sabọ lu emhin nọn khere sẹ iriọ, be ki zẹ nin uwẹ da ha kpokpo egbe ba ene emhin nekẹle?
27 Ibha ria ẹmhọn ebi ene aroro* rẹ wanre yẹ: Ele imiẹnsọn, ele fi olu; imẹn taman ibha ghe, arẹmiẹn ghe Solomọn nin ojie wo manman ha mhọn uyi, a bha miẹn ẹghe nin ọle rẹ mhọn-ose sẹ bii ọkpa bhi ene aroro nan.
28 Ahamiẹn inian Osẹnobulua rẹ re ose hiẹn ene ilunmhun ne ribhi ẹwẹ ne ha sọnnọn re ẹlẹnan, akhọ a re ele fi eranlẹn, eka-eka ki hi ibha? Ọle dẹ re ukpọn nin ibha yọ! Obhi urẹọbhọ khere ibha mhọnlẹn.
29 Ibha hẹi yẹ ha khu ebi ibha ha le, bi ebi ibha ha da, ibha hẹi yẹ ha kpokpo egbe.
30 Ene emhin nan rebhe, ele emhin nin ẹbho ne ribhi ẹkẹ ọne agbọn nan wo ha khu ọi. Aba ibha lẹn ghe ọkhẹke nin ibha ha mhọn ene emhin nan.
31 Bha wo ha khu ọbhi Agbejele nọnsi Osẹnobulua, a ki ne ene emhin nan rebhe nin ibha.
32 “Usun ihuan ne bha bun, bha hẹi ji ofẹn mun bha, ranmhude, Aba ibha re obọ bhọ nin ọle rẹ mun ọne Agbejele nin ibha.
33 Bha khiẹn emhin nin ibha mhọnlẹn, ibha ha re ọle lu ẹsele nin ene ibhioguele. Bha ha mhọn ọgbẹnẹ nọn ida fafa a; ọne ọgbẹnẹ nan hi, emhin nọn ghanlẹn nọn ida fo bhi okhun. Oyi ida sabọ sẹbhi enin. Sẹyẹ, ododo ida le ọle.
34 Eji emhin ne ghanlẹn nesẹbha ye, enin ọkhọle nọnsẹbha da yẹ ha ye.
35 “Bha ne ukpọn yọ, ibha ha muegbe.* Sẹyẹ, ibha ji ukpa nọnsẹbha ha bhala.
36 Ọkhẹke nin ibha diabe ikpea ne mundia ha khẹ ebeanlẹn nọnsele nọn na bhi iluemhin ọsi ibọdọ bi ireokhuo fikiere, beji a ha da miẹn ghe, ọle ha wo sobọ bhi odẹ, ele ki wo re osukpa tuje odẹ a nanlẹn.
37 Eghọnghọn hi ọsi ene igbọn nin, nin ebeanlẹn nọnsele kere ghe ele wo ha khẹ ọle! Bhi ọsi ẹmhọanta, imẹn taman ibha ghe, ọle dẹ taman ele nin ele dotua nẹga itebu. Ọle ki re ukpọn gba akun, yẹ vae dọ ha muno ebale nin ele.
38 Aharẹmiẹn uriẹghe nọnzi eva,* la ọne ọzea* ọle rẹ vae, nin ọle da yẹ kere ghe ele khẹ ọle, eghọnghọn hi ọsi ele!
39 Ọkpakinọn, ibha lẹn sẹbhọ ghe, sade ọnọn nyan uwa lẹn ẹghe nin ọne oyi ha rẹ vae nọn, ọle irẹ ji ọne oyi da gbe odẹ a na ọle bhi uwa.
40 Bha yẹ wo muegbe ọbhi otọ, ranmhude ẹghe nin ibha bha re ẹlo ọi, ọle Ọmọn nọnsi okpea ha rẹ vae.”
41 Pita da ki yọle: “Ebeanlẹn imẹn, imhan uwẹ be ha ta ọne arẹkhọkhọ nan man, la ẹbho rebhe uwẹ be tale man?”
42 Jesu da ki yọle: “Họla gene hi ọne ọguọmhandia nan gbaẹkẹ ọle? Ọne ọguọmhandia nọn wanlan, nin ebeanlẹn ọlẹn ha zẹ nọn ha gbẹloghe eguọmhandia nekẹle, yẹ ha re ebale* nin ele bhi ẹghe nọn khẹke.
43 Eghọnghọn hi ọsi ọne ọguọmhandia nin, sade ebeanlẹn ọlẹn vae dọ kere ghe ọle wo ha miẹnsọn nin ọle mun nanlẹn!
44 Bhi ọsi ẹmhọanta, imẹn taman ibha ghe, ọle dẹ mun emhin rebhe nesọle ọle bhi obọ.
45 Ọkpakinọn, ahamiẹn ọne ọguọmhandia nin taman egbe ọle yọle, ‘Ebeanlẹn imẹn wo ha bue,’ nin ọle da munhẹn ha gbe eguọmhandia nekẹle, yẹ da, yẹ le, yẹ da anyọn gbe egbe,
46 ebeanlẹn ọlẹn ki vae bhi ukpẹdẹ nin ọle bha mun ọkhọle ọi, bi bhi ẹghe nin ọle bha lẹn. Ọle ki manman re oya nanlẹn, yẹ mun ọlẹn fi ọbhi eji ene mhọn akan-ehọ ye.
47 A ki manman re asan gbe ọne igbọn nin, ranmhude, ọle lẹn ebi ebeanlẹn ọlẹn guanọ bhi obọ ọle, ọkpakinọn, ọle bha lu ọle, la muegbe ọbhi otọ.
48 Bhi obọ nọnkẹle, asan nọn bha bun gbe, ọle a ha fi ọne igbọn le nọn lu ebe bha gba, ranmhude, ọle bha lẹn ebi ebeanlẹn nọnsọle guanọ bhi obọ ọle. Ọria nan mun ẹsọn nọn bunbun nan, dẹ wẹnna kaka nin ọle rẹ miẹn ọlẹn nọnsẹn. Sẹyẹ, ọria nan mun emhin ne bunbun ọle bhi obọ, a dẹ ha khẹ ọle nin ọle lu ọle nọnsẹn.
49 “Eranlẹn imẹn vae dọ re ọbhi ọne otọ nan. Be imẹn ha ki gbo ha guanọ sade ọne eranlẹn munhẹn ha nyọn fo?
50 Bhi ọsi ẹmhọanta, emhin ribhọ nin imẹn ha re egbe na.* Ikpokpegbe imẹn da wo ha ye rẹ sẹbhi ẹghe nọn ha rẹ fo.
51 Bha be riale ghe ọfure imẹn mun re bhi ọne otọ nan? Hiehie, ọ iyi ọfure, iwaegbea imẹn mun re.
52 Rẹ na bhi ọne ẹghe nan rẹ ha khian, iwaegbea dẹ ha ribhi azagba-uwa. Ahamiẹn itue isẹn ele ribhọ, ea ki ha ne eva suan, sẹyẹ, eva ki ha ne ea suan.
53 Ọne azagba-uwa ki waegbea. Aba ki ha ne ọmokpea suan, ọmokpea ki ha ne aba ọle suan, inẹn ki ha ne ọmokhuo suan, ọmokhuo ki ha ne inẹn ọlẹn suan, inẹn ọdọ ki ha ne amhẹn ọmọn suan, amhẹn ọmọn ki ha ne inẹn ọdọ ọle suan.”
54 Ọle da yẹ taman ene ẹbho yọle: “Bha ha daghe ọle ghe okhun hore bhi obọ ọsi wẹst,* ibha ki wo yọle, ‘Okpamẹn nin ahoho rẹkhan dẹ kẹ rọ,’ ọ ki gene sunu.
55 Sẹyẹ, bha ha daghe ọle ghe ahoho na bhi obọ ọsi saot* fi re, ibha ki yọle, ‘Ijerebhe dẹ wo ha ghan,’ ọ ki gene dia iriọ.
56 Ibha ne re ukpunun ga, ibha sabọ ghe otọ, ghe okhun rẹ lẹn ebi ukpẹdẹ ha dia yẹ. Be ki zẹ nin ibha bha da sabọ lẹn ebe sunu bhi ọne ẹghe nan?
57 Bezẹle nin ibha bha da lẹn ebe khẹke nin ibha lu?
58 Bhi ọsi ijiẹmhin, ahamiẹn uwẹ bi ọria ko mhọn ẹzọ, dọnmhegbe rẹ deba ọle ta ọne ẹmhọn ọbhi ekpẹn beji ọle rẹ mun uwẹ bu ọnọn gbẹloghe, beji a ha da miẹn ọle bha mun uwẹ nin ọbhuohiẹn, ẹghenin, ọbhuohiẹn ki mun uwẹ nin unakpa bhi ikotu, sẹyẹ, ọne unakpa ki mun uwẹ fi ọbhi ighan.
59 Imẹn taman uwẹ ghe, uwẹ ida sibhi enin re sade uwẹ bha zẹ igho* rebhe nin uwẹ mhọn bhi obọ fo.”
Eba gbẹn bho otọle
^ Bhi Grik, “asariọn eva.” Ọnan hi igho nan ha ọria le sade ọle wẹnna na bhi uriagogo ọkpa bi ukhiọnmhẹn. Fẹ Ebi A Gbẹn Ba Ọle Nọnzi B14.
^ Ene afianmhẹn nan dia khere-khere.
^ Ọ sabọ ha yi, “sinagọg.”
^ Bhi Grik, “kiubit ọkpa.” Fẹ Ebi A Gbẹn Ba Ọle Nọnzi B14.
^ La “abobolo la ododo.”
^ Bhi Grik, “ibha ha re ugbakun gba akun.”
^ Agogo isinlin rẹ sẹbhi agogo igbeva ọsasọn.
^ Agogo igbeva rẹ sẹbhi agogo ea ọsasọn.
^ La “ebale nọn ha sẹ ele le.”
^ Bhi Grik, “emhin ribhọ nin mẹn ha da gberuẹ.”
^ Obọ nin oẹnlẹn da defia, ọle hi Wẹst.
^ Uwẹ ha denọ ẹlo diọbhi obọ nin oẹnlẹn da hẹnre, obera nọnsẹ, ọle hi Saot.
^ Bhi Grik, “lẹptọn nọn kẹre.” Fẹ Ebi A Gbẹn Ba Ọle Nọnzi B14.
