Luk 14:1-35
-
Jesu da re egbe daan okpea nin egbe nọnsọle pọpọre bhi ukpẹdẹ Sabati (1-6)
-
Re idegbere man sade a tie ẹ vae bhi iluemhin (7-11)
-
Tie eria ne ida sabọ ha uwẹ osa (12-14)
-
Arẹkhọkhọ ọsi eria ne bha ka vae bhi iluemhin nan da tie ele (15-24)
-
Ebi ọ ha gbe ọria le rẹ ha yi odibo nọnsi Jesu (25-33)
-
Umhẹn nọn iyẹ mun (34, 35)
14 Bhi ukpẹdẹ Sabati ọkpa, Jesu da dọ le ebale bhi uwa ọsi okpea ọkpa. Ọkpa bhi ene mun ọkalo bhi otu ọsi ibhokhan Farisi ọne okpea nan khin. Ene ha ribhi enin da wo re ẹlo ọle bhi egbe.
2 Ghọle! okpea ọkpa nọn khọnmhọn emianmhẹn nọn re obọ bi oẹ nọnsọle huẹ, da mundia bhi odalo ọle.
3 Jesu da ki nọọn ene ibhokhan Farisi bi ene manman lẹn uhi yọle: “Ọ be khẹke nan re egbe daan ọria bhi ukpẹdẹ Sabati?”
4 Ọkpakinọn, ele da huẹan. Bhiriọ, ọle da re ọne okpea obọ, re egbe daan ọlẹn, yẹ je ọle kpanọ.
5 Ọle da ki nọọn ele yọle: “Họla bhi ẹwẹ ibha ọmọn nọnsọle la ẹmena nọnsọle ha de ọbhi ẹkẹ omin bhi ukpẹdẹ Sabati nọn ida jẹje dọ mun ọlẹn sibhọre?”
6 Ele bha miẹn ọta ta.
7 Ọle ki daghe ọle ghe ene ẹbho nan tiere wo dọ ha dotua bhi eje mhẹn nẹ, ọle da noo arẹkhọkhọ rẹ ne ele talọ. Ọle da taman ele yọle:
8 “Ọria ha tie ẹ vae bhi iluemhin ọsi ibọdọ bi ireokhuo hẹi wo dọ dotua bhi eje mhẹn nẹ, ranmhude, asabọmiẹn ghe ọle yẹ tie ọria nọn lu okpọria nẹ uwẹ.
9 Ẹghenin, ọne ọria nọn tie ibha vae ki bu ẹ re dọ taman ẹn yọle, ‘Kpanọ ji ọne okpea nan da dotua.’ Iriọ uwẹ ha rẹ re ẹkhọle kpanọ dọ dotua bhi ikeke vuun.
10 Sokpan, ọria ha tie ẹ re bhi iluemhin, ha khian dọ dotua bhi ikeke vuun, beji a ha da miẹn ghe, ọne ọria nọn tie ẹ ha vae, ọle ki taman uwẹ yọle, ‘Ọmọẹ vae bhi odalo.’ Ẹghenin, ọrebhe nan tiele ki mun ekpẹn nin uwẹ.
11 Ọria nọn tẹngbemun, a ki de ọle re. Sẹyẹ, ọria nọn degbere, a ki tuẹn ọlẹn okhun.”
12 Ọle da ki taman ọne okpea nọn tie ọle re nin ọle dọ le ebale yọle: “Ahamiẹn uwẹ ho nin uwẹ re ebale nin ẹbho le, hẹi tie imọẹ ẹ, la ibhio ẹ, la ibhokhan ẹgbẹ nesẹbha, la idiake nesẹ ne fele. Ranmhude, ele sabọ yẹ tie uwẹ nin uwẹ dọ le ebale. Ọnan ki kiẹn ihaosa nọnsẹ.
13 Ahamiẹn uwẹ ho nin uwẹ re ebale nin ẹbho le, tie ene ibhioguele, ene akhun, bi ene ruẹlo.
14 Ẹghenin, uwẹ ki ha ghọnghọn ranmhude, ele imhọn ebi ele ha rẹ ha uwẹ osa. A dẹ re ihaosa nin uwẹ bhi ẹghe nan ha rẹ riọ ene khiale kpanọ.”
15 Ọkpa bhi ene eria ne ha le ebale ki họn ebi Jesu tale, ọle da taman Jesu yọle: “Eghọnghọn hi ọsi ọne ọria nọn ha le ebale bhi Agbejele nọnsi Osẹnobulua.”
16 Jesu da ki taman ọlẹn yọle: “Okpea ọkpa da ha lu iluemhin. Ọle da tie ẹbho ne bunbun.
17 Ẹghe ki sẹ nin ọne iluemhin ha rẹ munhẹn, ọle da je igbọn nọnsọle bu ene a tiele, nin ọle dọ taman ele yọle, ‘Ibha vae, imẹn muegbe emhin rebhe ọbhi otọ fo.’
18 Ọkpakinọn, ele rebhe da munhẹn ha zikino. Ọne ọhẹnhẹn da yọle, ‘Otọ ọkpa ribhọ nin imẹn dẹ, imẹn khian la dọ fẹ ọle ghe; huẹan, imẹn ida sabọ vae.’
19 Ọbhebhe da yọle, ‘Imẹn dẹ ẹmena igbe, imẹn khian la dọ fẹ ele ghe; huẹan imẹn ida sabọ vae.’
20 Ọbhebhe da yẹ yọle, ‘Imẹn wo la re okhuo, ranmhude ọnan, imẹn ida sabọ vae.’
21 Ọne igbọn da dọ taman ebeanlẹn ọlẹn ebi ene ẹbho tayẹ. Ẹkẹ da wo manman ha khọ ebeanlẹn ọlẹn. Bhiriọ, ọle da taman ọne igbọn yọle, ‘Jẹje diọbhi ughe bi ene ukpodẹ dọ datie ene ibhioguele, ene akhun, bi ene ruẹlo.’
22 Ọne igbọn ki fikiere, ọle da taman ebeanlẹn ọlẹn yọle, ‘Ebeanlẹn imẹn, imẹn lu ebi uwẹ tale, ọkpakinọn, otọ sẹyẹ kẹre.’
23 Bhiriọ, ebeanlẹn ọlẹn da taman ọlẹn yọle, ‘Diọbhi ene uwedẹ kẹkẹ, uwẹ ha wo taman ene ẹbho nin ele vae, beji uwa nọnsẹmhẹn ha da vuọn.
24 Bhi ọsi ẹmhọanta, imẹn taman ibha ghe, a ida miẹn ọkpa bhi ene ikpea nin imẹn rẹ ka datie nọn ha re unun so ebale nọnsẹmhẹn.’”
25 Bhi ọne ẹghe nan, usun ẹbho ne bunbun da rẹkhan Jesu. Ọle da fiorọ yẹ taman ele yọle:
26 “Ahamiẹn ọria nọn bu imẹn re bha he* aba ọle, inẹn ọlẹn, okhuo ọle, imọn nesọle, ibhio ọle nin ikpea, bi ibhio ọle nin ikhuo, rẹ sẹbhi egbe ọle, ọle ida sabọ ha yi odibo nọnsẹmhẹn.
27 Ọria nọn hi ki rẹ khin nọn bha mun oran-iloya* nọnsọle rẹkhan imẹn, ida sabọ ha yi odibo nọnsẹmhẹn.
28 Bhi ọsi ijiẹmhin, ọria be ribhi ẹwẹ bha nọn ho nọn bọn uwa igedege nọn ida ka dotua lolo eka nọn ha gbe ọle le, nin ọle rẹ lẹn si ọle dẹ sabọ bọn ọlẹn fo?
29 Ọle bha da lu iriọ, ọle sabọ gbe ọne ayotọ fo yẹ miẹn ghe ọle bha sabọ bọn ọne uwa fo. Ẹghenin, ọrebhe ne gbera ki ha jẹ ọle.
30 Ele ki ha yọle: ‘Uwa nin ọne okpea nan munhẹn ha bọn, ọ bha yẹ sabọ bọn ọlẹn fo.’
31 Sẹyẹ, ojie soso be ribhọ nọn muegbe okhọn, nọn ida ka dotua zilo ọle si ọle dẹ sabọ noo eyokhọnlẹn uli igbe* nin ọle mhọnlẹn rẹ ne ojie nọn mhọn eyokhọnlẹn uli uje* khọnlẹn?
32 Bhi ọsi ẹmhọanta, ọle ha lẹn ghe ọ ida fo ọle, ọle ki je ẹbho bu ọne ojie nọnkẹle beji ọnin sẹyẹ ribhi uwedẹ, nin ele dọ bhii ọle nọn mun ẹmhọn fia.
33 Iriọ yẹ nọn. Ibha lẹn sẹbhọ ghe, ọnọn hi ki rẹ khin nọn bha gbe ọkinbue nin* emhin rebhe nin ọle mhọnlẹn, ida sabọ ha yi odibo nọnsẹmhẹn.
34 “Bhi ọsi ẹmhọanta, umhẹn mhẹnmhin. Ahakimiẹn umhẹn iyẹ mun, be a ha re ọbhọ nọn da kie ha mun?
35 Ọ iyẹ da ji a khakha ọbhi otọ la nan gua ọle ba isọn elanmhẹn nan rẹ mun ugbo. Bhiriọ, ẹbho ki biri ọle kua. Ọnọn mhọn ehọ, ọ ha rẹ họn.”
