Luk 15:1-32
15 Ẹbho rebhe ne koko igho uhọnmhọn bi ene eria olukhọ da wo ha vẹ bu ọle re, nin ele dọ ka ọle ehọ
2 Ibhokhan Farisi bi ene man uhi da wo ha guinẹzọ yọle: “Ọne okpea nan wo ha miẹn eria olukhọ ọbhi egbe yẹ deba ele le ebale.”
3 Jesu da ki taman ele ọne arẹkhọkhọ nan. Ọle da yọle:
4 “Ahamiẹn ọkpa bhi ẹwẹ bha mhọn ihuan iyisẹn,* nin ọkpa da yulua bhi ẹwẹ ele, ọle ida be zẹ ene ihuan ọkpa iribhi iyisẹn* nekẹle obọ bhi ẹkẹ ẹgbo, ha khian dọ guanọ ọnọn yulua?
5 Ọle ha ki miẹn ọlẹn, ọle ki mun ọlẹn ọbhi ijianbọ yẹ ha ghọnghọn.
6 Ọle ha sẹ uwa, ọle ki tie imọẹ ọle bi idiake nesọle koko. Ọle ki taman ele yọle, ‘Ibha deba mẹn ghọnghọn ranmhude mẹn miẹn ohuan nọnsẹmhẹn nọn rẹ yulua.’
7 Iriọ sẹyẹ nọn. Mẹn taman ibha ghe, eghọnghọn nọn da ha ribhi okhun ranmhude ọluemhiebe ọkpa nọn fidenọ, dẹ kpọnọ gbera eghọnghọn nan ha ghọnghọn nin itue ọkpa iribhi iyisẹn* ne khiale ne bha miẹn ebi ele lu nọn ha re ele fidenọ.
8 “La ahamiẹn okhuo mhọn drakma* igbe, nin ọkpa da yulua bhọ, ọle ida be re orukpa ru, gbọnọ uwa nọnsọle a, yẹ guanọ ọlẹn nọnsẹn beji ọle ha da miẹn ọlẹn?
9 Ọle ha ki miẹn ọlẹn, ọle ki tie imọẹ ọle* bi idiake nesọle koko, yẹ taman ele yọle, ‘Bha deba imẹn ghọnghọn, ranmhude, imẹn miẹn ikpigho drakma* nọnsẹmhẹn nọn rẹ yulua.’
10 Imẹn taman ibha ghe, iriọ ẹhi nesi Osẹnobulua yẹ rẹ manman ghọnghọn sade ọluemhiebe ọkpa fidenọ.”
11 Ọle da ki yọle: “Okpea ọkpa da ha mhọn imọn eva.
12 Ọne ikhere nọn ribhọ da taman aba ọle yọle, ‘Aba, ne emhin uku nesẹmhẹn nin imẹn.’ Bhiriọ, ọle da gha emhin nesọle nin ele veva.
13 Ikpẹdẹ eso ki gbera, ọne ọmọn da ne emhin nesọle rebhe, yẹ ha khian agbaẹbho nọn manman ree. Bhi enin, ọle da ha nyẹnlẹn iẹnlẹn esankan. Ọle da fuẹn uku nọnsọle rebhe kua.
14 Ọle ki noo igho rebhe nin ọle mhọnlẹn fo, ukhunmhun da munhẹn ha fi bhi ọne agbaẹbho rebhe. Emhin da munhẹn ha nọghọ ọle.
15 Ọle bhọ da dọ bhii ọmotọ ọkpa bhi ọne agbaẹbho nọn re ọle bhi iwẹnna. Ọne ọria da taman ọlẹn nọn dọ ha re une nesọle kọn.
16 Ọle bhọ da ha guanọ nin ọle ha le ebale nin ene une ha le. Ọkpakinọn, ọria soso bha re ebale soso nanlẹn le.
17 “Ẹlo ọle ki gbanọn an bhi uhọnmhọn, ọle da yọle, ‘Eji ene wẹnna nin aba imẹn da miẹn ebale le beji ọ ghọn ele, ọle ohanmhẹn da khian la gbe imẹn an bhi enan?
18 Imẹn dẹ kpanọ ha bu aba imẹn. Imẹn ha sẹbhi enin, imẹn ki taman ọlẹn yọle: “Aba, imẹn rahiẹ uwẹ, imẹn yẹ rahiẹ Osẹnobulua.*
19 Imẹn bha yẹ sẹ ọne uwẹ ha tiọle ọmọn nọnse. Re imẹn kiẹn ọkpa bhi ene wẹnna ne uwẹ.”’
20 Bhiriọ, ọle da kpanọ ha bu aba ọle. Beji ọle sẹyẹ vade bhi odalo vuun, aba ọle da daghe ọle. Ohan ọlẹn da wo manman to ọle. Ọle da runẹ bu ọle dọ mun ọlẹn dede, yẹ re unun fiofio ọle.
21 Ọne ọmọn da ki taman aba ọle yọle, ‘Aba, imẹn rahiẹ uwẹ, imẹn yẹ rahiẹ Osẹnobulua.* Imẹn bha yẹ sẹ ọne uwẹ ha tiọle ọmọn nọnsẹ.’
22 Ọkpakinọn, aba ọle da taman ene igbọn nesọle yọle, ‘Ẹje! ibha mun ukpọn nọn mhẹn nẹ re, ibha ha rẹ hiẹn ọlẹn. Bha re ukpoloka ọle bhi obọ, ibha ha yẹ ne ibata ọle bhi oẹ.
23 Bha mun ọne ẹmena nọn kpọnọ nẹ re. Bha gbe ọle a, nin imhan re ọle le ebale yẹ ha sọnyẹnmhẹn.
24 Ranmhude, ọne ọmọn nọnsẹmhẹn nan rẹ yu, ọkpakinọn ọle da kie dọ ha nyẹnlẹn; ọle rẹ yulua, ọkpakinọn a da miẹn ọlẹn.’ Ele da munhẹn ha sọnyẹnmhẹn.
25 “Bhi ọne ẹghe nan, ọmọndiọn nọnsọle da ha ribhi ugbo. Ẹghe nin ọle ki rẹ ha sike uwa beji ọle vade, ọle da họn ghe ẹbho so illo yẹ gbikhiẹn.
26 Bhiriọ, ọle da tie ọkpa bhi ene eguọmhandia yẹ nọọn ọlẹn ebe sunu.
27 Ọne ọguọmhandia da taman ọlẹn yọle, ‘Obhio ẹ fikiere. Ranmhude egbehẹnẹdẹ ọle rẹ fikiere, aba ẹ da gbe ọne ẹmena nọn kpọnọ nẹ a.’
28 Ọkpakinọn, ẹkẹ da ha khọ ọle. Ọle bha ka nabhi ẹkẹ uwa. Aba ọle da ki dagbare dọ ha bhii ọle.
29 Ọle da taman aba ọle yọle, ‘Ghọle! Ikpe ne bunbun mẹn sẹ rẹ ga uwẹ. Mẹn bha sẹ gbobọra uhi nesẹ khẹ. Ọrẹyiriọ, a bha sẹ miẹn ẹghe nin uwẹ rẹ mun obhi ẹbhe nin mẹn nin mẹn bi imọẹ mẹn rẹ sọnyẹnmhẹn.
30 Sokpan, ọne ọmọn nọnsẹ nan ki vae, nọn fuẹn uku nọnsẹ kua nin agbilẹ, uwẹ da dọ gbe ọne ẹmena nọn hu nẹ a nanlẹn.’
31 Ọle ki da taman ọmọn nọnsọle yọle, ‘Ọmọn, imẹn bi ẹ ko ribhi enan. Emhin nesẹmhẹn rebhe uwẹ nyan ọlẹn.
32 Sokpan, ọkhẹke nin mhan ha dujie yẹ ha ghọnghọn. Ranmhude, obhio ẹ rẹ yu, ọkpakinọn ọle kie dọ ha nyẹnlẹn; ọle rẹ yulua, ọkpakinọn a miẹn ọlẹn.’”
Eba gbẹn bho otọle
^ 100
^ 99
^ 99
^ Igho nin ibhokhan Grik ha noo bhi ẹghe ẹdẹlẹ. Fẹ Ebi A Gbẹn Ba Ọle Nọnzi B14.
^ La “imọẹ ọle nin ikhuo.”
^ Bhi Grik, “okhun.”
^ Bhi Grik, “okhun.”
