Luk 2:1-52
2 Bhi ọne ẹghe nin, Ọgọstọs nin Siza da yọle nin ọrebhe ne ribhi otọ agbọn rebhe ha khian dọ gbẹn elin ọbhi otọ.
2 (Ọnan hi ọsi ọhẹnhẹn nan rẹ dọ gbẹn elin ọbhi otọ bhi ẹghe nin Kuiriniọs rẹ ha yi gọvanọ ọsi Siria.)
3 Ẹbho rebhe da ha khian agbaẹbho nọnsele nin ele dọ gbẹn elin ọbhi otọ.
4 Josẹf da yẹ sibhi Nazarẹt re bhi agbaẹbho ọsi Galili. Ọle da kpanọ ha khian Bẹtlẹhẹm, bhi otọ Judia, agbaẹbho nin Devid na vae, ranmhude, ulin-uwa ọsi Devid ọle na vae.
5 Ọle bi Meri ko ha khian dọ gbẹn elin ọbhi otọ. A re Meri nanlẹn fo bhi amhẹn beji a ve nanlẹn. Ọ bhọ kẹ khere nọn rẹ biẹ.
6 Beji ele ha ribhi enin, ọne ẹghe da sẹ nin Meri ha rẹ biẹ.
7 Ọle da biẹ ọmokpea, ọmọndiọn nọnsọle. Ọle da re ukpọn gbanọ ọle, yẹ mun ọlẹn ọbhi uke emhin nin elanmhẹn rẹ le ebale ranmhude, otọ bha gua ele bhi eji a da mun ugha nin erunmhunyẹn.
8 Bhi ọne agbaẹbho nin sẹyẹ, esun-ohuan eso da ha ribhi ẹwẹ bhi ọsasọn, ne ha gbẹloghe ihuan nesele.
9 Ghọle! ẹhi nọnsi Jehova* da wo re osukpa mundia bhi odalo ele. Uyi nọnsi Jehova* da wo yẹ bhaa nẹga ele. Ọnan da wo re ofẹn manman ha mun ele.
10 Ọkpakinọn, ọne ẹhi da taman ele yọle: “Bha hẹi ji ofẹn mun ibha, ghọle! ọta nọn mhẹn nọn ha re eghọnghọn nọn khua ji ẹbho rebhe, ọle mẹn dọ wewe man ibha.
11 A biẹ ọmọn nin ibha ukpẹdẹ nin ẹlẹnan bhi agbaẹbho ọsi Devid, nọn ha miẹn ibha fan. Ọle hi Kristi nin Ebeanlẹn ibha.
12 Iyaman nin bha ha rẹ lẹn ọlẹn khọnan: Ibha dẹ ke ọmobọ re nan re ukpọn gbanọ, yẹ mun nowẹ bhi uke okhun ebi elanmhẹn rẹ le ebale.”
13 Ẹhi ne bunbun ne ribhi okhun da re osukpa vae dọ deba ọne ẹhi. Ele da ha gẹn Osẹnobulua yọle:
14 “Uyi hi ọsi Osẹnobulua nọn ribhi okhun. Ọfure hi ọsi eria nin ẹmhọn ele ti ọle bhọ bhi ọne otọ nan.”
15 Ene ẹhi ki kpanọ fo ha khian okhun, ene esun-ohuan da ha taman egbe ele yọle: “Ibha ji mhan kpanọ ha khian Bẹtlẹhẹm, nin imhan dọ re ẹlo imhan daghe emhin nọn sunu, nin Jehova* rẹkpa mhan rẹ lẹn.”
16 Ele da jẹje kpanọ ha khian. Ele da miẹn Meri bi Josẹf bi ọne ọmobọ nan mun nowẹ bhi uke okhun ebi elanmhẹn rẹ le ebale.
17 Ele ki miẹn ọnan, ele da munhẹn ha taman ẹbho ebi a taman ele rẹji ọne ọmọn.
18 Ebi ene ọsun-ohuan ha ta da wo manman han ene ẹbho rebhe ilo.
19 Ọkpakinọn, Meri da ha ne ene ẹmhọn nan rebhe ya bhi ẹkẹ ọkhọle. Ọle da yẹ ha ria eria nyan ebi a re ele ta.
20 Ene ọsun-ohuan da fikie. Ele da ha re uyi ji Osẹnobulua, yẹ gẹn ọlẹn bhi emhin rebhe nin ele re ehọ nọnsele họn, yẹ re ẹlo nọnsele daghe beji a ka rẹ taman ele tee.
21 Ukpẹdẹ nọnzi elẹnlẹn ki sẹ nan ha rẹ ruẹ ọle, a da hẹ ọle Jesu. Ọnan hi elin nin ọne ẹhi ka yọle a dẹ ha tie ọle a kuẹ ha hanmhan ọlẹn.
22 Ọne ẹghe ki sẹ nan ha rẹ kpe ele khia, beji uhi nin Osẹnobulua na bhi obọ Mozis gbe nin ibhokhan Izrẹl tale, ene biẹ ọle da mun ọlẹn re bhi Jerusalẹm nin ele dọ mun ọlẹn nin Jehova,*
23 beji a rẹ gbẹn ọlẹn ọbhi uhi nọnsi Jehova* yọle: “Imikpea rebhe nin ọdiọn dẹ ha yi ọsi Jehova.”*
24 Ele da lu ọne izọese beji uhi nọnsi Jehova* tale: “idulu eva la, igbenekuku eva.”
25 Okpea ọkpa natiọle Simiọn da ha ribhi Jerusalẹm. Okpea nọn khiale ọle khin nọn wo ha ga Osẹnobulua nọnsẹn. Ọle da wo ha mundia khẹ ẹghe nin Osẹnobulua ha rẹ re ikoudure nin Izrẹl. Ọle da yẹ ha mhọn ẹlinmhin nọn khiale.
26 Yẹ rẹ deba ọnin, Osẹnobulua ka noo ẹlinmhin nọn khiale rẹ rẹkpa ọle lẹn ghe, ọle ida yu sade ọle bha ka miẹn Kristi fo, nin Jehova* jere.
27 Ẹlinmhin nọn khiale da dia ọle vae bhi uwa oga. Ẹghe nin ene biẹ Jesu ki rẹ mun Jesu nabhi uwa oga, nin ele dọ lu emhin nin Uhi tale,
28 ọle da mun ọne ọmọn, yẹ munhẹn ha gẹn Osẹnobulua yọle:
29 “Ejayenan nian, Ebeanlẹn Nọn Ke Okhun Nẹ, imẹn ha ki rẹ yu nian, ẹmhọn iribhọ. Ranmhude, beji uwẹ tale,
30 ẹlo nọnsẹmhẹn ki daghe ọne ọmọn nin uwẹ ha rẹ miẹn ẹbho fan,
31 ọne uwẹ jere nin ẹbho rebhe daghe.
32 Ọle dẹ ha yi ẹfua nọn ha re ugue sibhi ẹlo ọsi ene agbaẹbho re. Ọle dẹ ha yi uyi osi Izrẹl nin agbaẹbho nọnsẹ.”
33 Ebi ọle ha ta rẹji ọne ọmọn, da wo han ene biẹ ọle ilo.
34 Simiọn da nan erọnmhọn nin ele, yẹ taman Meri nin inẹn ọne ọmọn yọle: “Ghọle! A tale ọbhi otọ ghe, ranmhude ọne ọmọn nan, ẹbho ne bunbun bhi otọ Izrẹl dẹ dere. Ene bunbun dẹ yẹ kpanọ. Sẹyẹ, ọle dẹ ha yi iyaman nin ẹbho ha re ẹlo gbe a,
35 beji emhin ne ribhi ẹkẹ ọkhọle ọsi ẹbho ne bunbun ha da zegbere. (Bhi ọsi uwẹ, a dẹ ji agbada nọn tantan uwẹ bhi egbe.)”
36 Akhasẹ ọkpa da ha ribhọ natiọle Ana. Ọmokhuo ọsi Fanuẹl ọle khin bhi ulin-uwa ọsi Asha. Ọne okhuo nan wo manman wanre. Ikpe ihinlọn ọle bi ọdọ ọle ko gbe ọkuẹsẹ ọdọ ọle yu.
37 Ọle bha yẹ ha mhọn ọdọ. Ikpe enẹn nyan egbọ enẹn* ọle ki ye nian. Ẹghe rebhe ọle rẹ vae bhi uwa oga. Asọn bi odanmhẹn ọle rẹ ha fi azinmin, yẹ manman nan erọnmhọn rẹ re oga nọn khiale ji Osẹnobulua.
38 Bhi ọne ẹghe nin, ọle da bu ele re. Ọle da munhẹn ha re ogẹn ji Osẹnobulua. Ọle da yẹ ha tẹmhọn ọne ọmọn man ọrebhe ne ha khẹ umiẹnfan ọsi Jerusalẹm.
39 Ele ki lu emhin rebhe fo nin Uhi nọnsi Jehova* yọle nan lu, ele da fikie ha khian Nazarẹt, nin agbaẹbho nọnsele bhi otọ Galili.
40 Ọne ọmọn da wo ha wanre, yẹ ha wo ọbhọ. Ọle da wo ha mhọn ẹwanlẹn. Osẹnobulua da ha nan erọnmhọn nanlẹn.
41 Ukpe-ukpe, ọle ene biẹ ọle rẹ yo Jerusalẹm, dọ ha lu iluemhin ọsi Anagbera.
42 Ẹghe nin Jesu ki rẹ ha yi ikpe igbeva, ele da ha khian Jerusalẹm dọ lu ọne iluemhin beji ele ka lu khẹ.
43 Ele ki ha khian uwa beji ele lu ọne iluemhin fo, Jesu da sẹyẹ ha ribhi Jerusalẹm, sokpan ene biẹ ọle bha lẹn.
44 Ranmhude ele rẹ ha riale ghe ọle ribhi ẹwẹ usun nin ele ko ha khian, ele da khian okhian ọsi ukpẹdẹ ọkpa fo, ele kuẹ munhẹn ha guanọ ọle bhi ẹwẹ ibhio ele bi imọẹ ele.
45 Ọkpakinọn, ele bha miẹn ọlẹn. Bhiriọ, ele da fikie ha khian Jerusalẹm dọ manman ha guanọ ọlẹn.
46 Ikpẹdẹ ea ki gbera, ele da miẹn ọlẹn bhi uwa oga. Ọle dotua bhi ẹwẹ ene man emhin. Ọle ka ele ehọ, yẹ nọọn ele ọta.
47 Ọkpakinọn, uwedẹ nin ọle rẹ lẹn emhin, bi ewanniẹn nin ọle ha re ọbhi inọnta da wo han ene ha ka ọle ehọ ilo.
48 Ẹghe nin ene biẹ ọle ki rẹ miẹn ọlẹn, egbe da wo lọ ele. Inẹn ọlẹn da taman ọlẹn yọle: “Ọmọn, bezẹle nin uwẹ da lu mhan ọnan? Uwẹ imẹn bi aba ẹ mọn da guanọ na otọ na okhun.”
49 Ọle da taman ele yọle: “Bezẹle nin ibha da ha guanọ imẹn? Ibha bha be lẹn ghe, uwa nọnsi Aba imẹn mẹn da ha ye?”
50 Ọkpakinọn, ebi ọle ha ta bha mun ele ẹlo kore.
51 Ọle da rẹkhan ele fikie ha khian Nazarẹt. Ọle da yẹ wo ha degbere nin ele. Sẹyẹ, inẹn ọlẹn da fẹkẹ ne ene emhin nan rebhe ọbhi ọkhọle.
52 Jesu da wo ha wanre, yẹ manman ha mhọn ẹwanlẹn. Sẹyẹ, Osẹnobulua bi eria da ha re ẹlo esili ghe ọle.
Eba gbẹn bho otọle
^ 84
