Luk 21:1-38
21 Jesu ki khua ẹlo okhun, ọle da daghe eria ne fele ne ha ne igho ọbhi ẹkpẹti igho bhi uwa oga.
2 Ọle da yẹ daghe obhioguele ọkpa nọn iyẹ mhọn ọdọ. Ọne okhuo da ne ikpigho eva ne bha sẹ emhin soso* ọbhi ẹkẹ ọne ẹkpẹti.
3 Ọle da ki taman edibo nesọle yọle: “Bhi ọsi ẹmhọanta, mẹn taman ibha ghe, igho nin ọne obhioguele nan nọn iyẹ mhọn ọdọ re ọbhi ẹkẹ ẹkpẹti, ọle kpọnọ nẹ igho nin ẹbho nekẹle rebhe re ọbhọ.
4 Ene ẹbho nekẹle ne re emhin ọbhi ẹkẹ ẹkpẹti manman mhọn emhin. Bhi obọ nọnkẹle, ọne okhuo nan bha miẹn rẹ lu. Ọrẹyiriọ, ọle da re emhin rebhe nin ọle mhọn ọbhi ẹkẹ ẹkpẹti, ukpọkhere nin ọle rẹ ha mhọnlẹn.”
5 Ẹghe nin ẹbho eso ki rẹ ha tẹmhọn ọne uwa oga, emhin nan rẹ guẹ nin Osẹnobulua ne ribhọ, bi ebi a rẹ re udo ne mhọn-ose rẹ bọn ọlẹn yẹ,
6 ọle da yọle: “Ọne ẹghe vade nan ha rẹ dunmhun ọne uwa nin bha daghe nan nian sotọ sẹsẹsẹ. Udo ọkpa ida kẹre bhọ.”
7 Ele da ki nọọn ọlẹn yọle: “Ọman-emhin, ẹghela ene emhin nan ha rẹ sunu? Be hi iyaman nọn ha rẹman ghe ene emhin nan dẹ kẹ sunu?”
8 Ọle da yọle: “Bha mhọn ẹwanlẹn nin ọria soso hẹi hiẹ bha, ranmhude, ẹbho ne bunbun dẹ re elin nọnsẹmhẹn vae. Ele ki ha yọle: ‘Imẹn hi Kristi.’ Ele ki yẹ ha yọle, ‘Ọne ẹghe nan rẹyi sire.’ Bha hẹi rẹọ ele bhọ.
9 Sẹyẹ, ibha ha họn ẹmhọn okhọn bi ozughu, ibha hẹi ji ofẹn mun ibha. Ene emhin nan dẹ ka sunu. Ọkpakinọn, ọkpẹnlẹn ida wo vae bhi ọne ẹghe nin.”
10 Ọle da yẹ taman ele yọle: “Agbaẹbho ọkpa dẹ mun okhọn bu agbaẹbho ọbhebhe. Agbejele ọkpa ki yẹ mun okhọn bu agbejele ọbhebhe.
11 Otọ ki ha munvẹa. Ukhunmhun ki ha fi bhi ije kẹkẹ, emianmhẹn ebe kẹkẹ ki gba ijerebhe. Emhin ne re ofẹn mun ẹbho ki ha sunu; sẹyẹ, emhin ọhan-ilo ki ha na bhi okhun zegbere.
12 “Sokpan, ọkuẹsẹ ọnan sunu, ẹbho dẹ ha kpokpo bha. Ele ki muno ibha diọbhi sinagọg, yẹ mun ibha fiọbhi ighan. Ele dẹ muno ibha vae bhi isi ọnojie bi isi ene gọvanọ ranmhude elin nọnsẹmhẹn.
13 Ọnan ki re otọ nin ibha rẹ tẹmhọn Osẹnobulua man ele.
14 Bhiriọ, ibha taman egbe ibha ghe, ibha ida muegbe ebi ibha ha ta ọbhi otọ.
15 Ranmhude, imẹn dẹ ne ọta ibha bhi unun, yẹ re ẹwanlẹn nin ibha, rẹ sẹbhọ ghe, eghian ibha rebhe ha rẹ kugbe, ele ida sabọ muan ọta nin ibha tale.
16 Rẹ gbera ọnin, ene biẹ ibha, ibhio ibha, bi imọẹ ibha, bhọ dẹ mun ibha nin eghian ibha. Ele ki gbono eso bhi ẹwẹ ibha a.
17 Ẹbho rebhe ki he ibha ranmhude edibo nesẹmhẹn bha khin.*
18 Ọrẹyiriọ, emhin soso ida lu ukpeto ọkpa nọnsẹbha.
19 Ibha dẹ gbega iẹnlẹn nọnsẹbha sade ibha mhọn iziẹngbe.
20 “Rẹ deba ọnin, ibha ha daghe eyokhọnlẹn vẹ nẹga Jerusalẹm, ibha lẹn ghe, a dẹ kẹ dunmhun Jerusalẹm an.
21 Ẹghenin, ji ene ribhi Judia munhẹn ha nẹ diọbhi uke oke. Ene ribhi Jerusalẹm ha kpanọ. Sẹyẹ, ẹbho ne ribhi idunmhun kẹkẹ ne nẹga Jerusalẹm hẹi nabhi ẹkẹ Jerusalẹm,
22 ranmhude, ene ikpẹdẹ nin dẹ ha yi ikpẹdẹ ibhuohiẹn, beji a ha da miẹn ghe emhin rebhe nan gbẹn ọbhi Ebenọnkhiale ki munsẹ.
23 Ọ dẹ khọ bhi egbe nin ikhuo ne hanmhan bi ikhuo ne mun ọmọn bhi obọ bhi ọne ẹghe nin! Ẹbho ne ribhi ọne agbaẹbho dẹ wo manman miẹn ọbalọ bhi egbe. Sẹyẹ, a ki re oya nin ele.
24 A ki re agbada gbono ele a. A ki muno ele ha khian agbaẹbho ebhebhe. Ene agbaẹbho ki le ọba nyan* Jerusalẹm, ọkuẹsẹ ẹghe nan rẹyi nin ene agbaẹbho sẹle.
25 “Sẹyẹ, a dẹ daghe iyaman bhi ovuẹn, uki, bi ene ahiẹnhiẹn. Ranmhude ọne okpẹdẹ nọn fiyo-fire, ene agbaẹbho ki wo manman ha kpokpo egbe. Ele ida lẹn ebi ele ha lu yẹ.
26 Emhin ne ribhi okhun dẹ mun lueghe. Ofẹn ki ha mun ẹbho, rẹ sẹbhọ ghe ahu ki fo ele bhọ. Ele ki ha kpokpo egbe ranmhude emhin ne ha kẹ sunu ji ọne otọ nan.
27 Ẹghenin, ele ki daghe Ọmọn nọnsi okpea bhi ẹkẹ adudu-amẹn. Ọle re ahu bi uyi nọn khua vade.
28 Ene emhin nan ha munhẹn ha sunu, ibha hẹi ji ofẹn mun ibha. Ibha ha mhọn izebhudu, ranmhude, ẹghe nan ha rẹ miẹn ibha fan sire.”
29 Ọle da gbo noo arẹkhọkhọ ọkpa. Ọle da taman ele yọle: “Ibha ria ẹmhọn eran fig bi eran nekẹle.
30 Ele ha munhẹn ha sọnnọn ebe ọgbọn, ibha ki lẹn ghe, ẹghe nin eran rẹ mhọn ikpẹ sire.
31 Iriọ yẹ nọn rẹji ibha, ibha ha daghe ọle ghe ene emhin nan munhẹn ha sunu, ibha lẹn sẹbhọ ghe, Agbejele nọnsi Osẹnobulua sire.
32 Bhi ọsi ẹmhọanta, imẹn taman ibha ghe, ọne ore nan ida gbera kie sade ene emhin nan rebhe bha ka sunu fo.
33 Otọ bi okhun ha rẹ gbera kie, a ida miẹn ghe ọta nọnsẹmhẹn bha munsẹ.
34 “Bha mhọn ẹwanlẹn, nan hẹi dọ miẹn ghe, olegbe, idanyọngbegbe, bi ikpokpegbe ba ẹmhọn iẹnlẹn dọ gbe ibha ahu sotọ, beji a ha da miẹn ọne ukpẹdẹ nin bha re iguaguako mun ibha
35 bọsi ufi. Ebe ha sunu bhi ọne ukpẹdẹ nin dẹ dekhun ọrebhe bhi ọne otọ nan.
36 Bhiriọ, bha ha babegbe, bha ha yẹ manman ha nan erọnmhọn ẹghe rebhe, beji bha ha da sabọ miuhọnmhọn bhi ene emhin ne ha sunu, yẹ sabọ mundia bhi odalo Ọmọn nọnsi okpea.”
37 Ẹdẹ ha we, ọle ki ha man emhin bhi uwa oga. Ọkpakinọn ebi ha lo, ọle ki ha khian Oke ọsi Oliv nin ọle dọ nowẹ.
38 Bhi ọsewewiẹ, ene ẹbho rebhe ki bu ọle re bhi uwa oga nin ele dọ ka ọle ehọ.
Eba gbẹn bho otọle
^ Bhi Grik, “lẹptọn eva.” Igho nin ọria ha miẹn sade ọle re ihuẹnlo 10 wẹnna. Fẹ Ebi A Gbẹn Ba Ọle Nọnzi B14.
^ Bhi Grik, “ranmhude elin nọnsẹmhẹn.”
^ La “re oẹ nunu.”
