Luk 23:1-56
23 Ene usun ẹbho rebhe da kpanọ mundia. Ele da re Jesu bu Pailet.
2 Ele da munhẹn ha bha ohoghe ọle bhi uhọnmhọn yọle: “Ọne okpea nan wo ha si ozughu re bhi agbaẹbho nọnsẹmhan. Ọle yọle nin ẹbho hẹi yẹ ha igho uhọnmhọn ji Siza. Ọle da yẹ yọle ghe ọle hi Kristi nin ojie.”
3 Pailet da ki nọọn ọlẹn yọle: “Uwẹ be hi ojie ọsi ibhokhan Ju?” Ọle da wanniẹn Pailet yọle: “Ọle uwẹ ta riọ.”*
4 Pailet da ki taman ene ohẹn ne khua bi ene ẹbho yọle: “Ọne okpea nan bha lu ọbe.”
5 Ele da sẹyẹ wo ha yọle: “Ọle re iman-emhin nọnsọle rẹ si ozughu ọbhi otọ Judia rebhe, rẹ na bhi Galili rẹ dọ sẹbhi enan.”
6 Pailet ki họn ebi ele tale, ọle da nọọn ele si obhi Galili Jesu khin.
7 A ki taman ọlẹn ghe ọkpa bhi idunmhun nin Hẹrọd gbeloghe, ọle Jesu na vae, Pailet da je ọle bu Hẹrọd. Jerusalẹm Hẹrọd ha ye bhi ọne ẹghe nin.
8 Hẹrọd ki miẹn Jesu, ọle da wo manman ha ghọnghọn. Ọ ki bue nin ọle mọn da guanọ nin ọle miẹn Jesu, ranmhude emhin ne bunbun nin ọle sẹ họn rẹji ọle. Ọle da yẹ ha guanọ nin Jesu sira ọle lu emhin ọhan-ilo.
9 Ranmhude ọnan, ọle da wo ha nọọn ọlẹn ọta ne bunbun. Ọkpakinọn, Jesu bha wanniẹn ọlẹn.
10 Ene ohẹn ne khua bi ene man uhi da wo re ohu ha gua kpanọ dọ ha bha ohoghe ọle bhi uhọnmhọn.
11 Hẹrọd bi eyokhọnlẹn nesọle da munhẹn ha re obọ oya mun ọlẹn. Ọle da mun ukpọn nọn mhọn-ose yọ Jesu, nin ọle rẹ zuọzuọ ọle. Ọle da yẹ je ọle fikie bu Pailet.
12 Bhi ọne ukpẹdẹ nin, Pailet bi Hẹrod da ki kiẹn imọẹ. Ọkuẹsẹ ọne ukpẹdẹ nin, eghian egbe ele ha khin.
13 Pailet da ki tie ene ohẹn ne khua, ene gbẹloghe bi ene ẹbho koko.
14 Ọle da taman ele yọle: “Ẹghe nin ibha rẹ mun ọne okpea nan ji imẹn, ibha da yọle ghe, ọle si ozughu bhi ọne agbaẹbho nan. Ọkpakinọn, imẹn ki sira ibha nọọn ọle ọta, imẹn da kere ghe ẹmhọanta iribhi emhin nin ibha ta ọle bhi egbe.
15 Hẹrọd bhọ bha yẹ miẹn emhin soso bhi egbe ọle. Ọle bhọ da je ọle fikie bu mhan re. Ghọle! Ọne okpea nan bha lu emhin soso nan ha gbe ọle a ba.
16 Bhiriọ, mẹn dẹ re oya nanlẹn yẹ fan ọlẹn fia.”
17 * ——
18 Ọkpakinọn, ene ẹbho rebhe da ha so yọle: “Gbe ọne okpea nan an, uwẹ ha fan Barabas fia nin mhan!”
19 (Ranmhude Barabas sọtẹ da ene gbẹloghe yẹ gbugbele, ọle zẹle nan da mun ọlẹn khue bhi ighan.)
20 Pailet wo ha guanọ nin ọle fan Jesu fia, bhiriọ, ọle da gbo ne ene ẹbho talọ.
21 Ọkpakinọn, ene ẹbho da munhẹn ha so yọle: “Dọ khan ọlẹn ọbhi oran! Dọ khan ọlẹn ọbhi oran!”
22 Bhi ọsi ugba ọzea ọle da taman ele yọle: “Bezẹle? Emhin ebe nela ọle lu? Ọle bha miẹn ebi ọle lu nọn ha zẹ nin imẹn ha da gbe ọle a. Imẹn dẹ re oya nanlẹn yẹ fan ọlẹn fia.”
23 Ele da wo kiekie manman ha so yọle nan gbe ọle a. Unun nọnsele da ke okhun nẹ ọsi ọle.
24 Pailet da ki re obọ ọbhi ebi ele tale.
25 Ọle da fan ọne okpea fia nin ele, ọne okpea nọn sọtẹ yẹ gbugbele. Ọkpakinọn, ọle da yọle nan dọ gbe Jesu a, beji ele tale.
26 Ele ki ha re Jesu khian eji a ha da gbe ọle a, ele da miẹn okpea ọkpa natiọle Saimọn, nin obhi agbaẹbho ọsi Sairini, nọn ha na okhian vade. Ele da mun ọlẹn mhọn, yẹ mun oran* nan ha khan Jesu ọi nanlẹn, nin ọle mun rẹkhan Jesu.
27 Ẹbho ne bunbun da yẹ rẹkhan Jesu. Ikhuo eso deba ene ha ribhi ọne usun nan. Ele da wo viẹ rẹkhan ọlẹn.
28 Jesu da ki fiorọ ghe ene ikhuo, yẹ taman ele yọle: “Imikhuo nesi Jerusalẹm, bha hẹi yẹ viẹ imẹn. Ibha viẹ egbe ibha bi imọn nesẹbha;
29 ranmhude, ọne ẹghe vade nin ẹbho ha rẹ yọle, ‘Eghọnghọn hi ọsi ene agan, eghọnghọn hi ọsi ikhuo ne bha biẹ bi ikhuo ne bha rẹ nin ọmọn nyẹn!’
30 Ẹghenin, ẹbho ki ha taman ene oke ne khua, ‘Degue mhan!’ bi oke ne khere-khere, ‘Gugu mhan!’
31 Ele ha lu ene emhin nan bhi ẹghe nin ọne eran bha sẹ rẹ yu, be ha ki sunu, sade ọne eran yu fo?”
32 A da yẹ mun ikpea eva ne lu emhin ebe rẹkhan ọlẹn, nan yẹ dọ gbono ele a.
33 Ele ki sẹbhi eji a tiọle Uguẹ-uhọnmhọn, ele da khan ọlẹn ọbhi oran. Ele da yẹ khan ene eluemhin-ebe eva ọbhi oran sikẹ ọle. Ọkpa da ha ribhi obera nọnsọle, ọnọnkẹle da ha ribhi obọ agobọ.
34 Ọkpakinọn, Jesu da ha yọle: “Aba, rẹhunmhan ele ranmhude, ele bha lẹn ebi ele lu.” Rẹ gbera ọnin, ene egbanegbe* da fi ono rẹ gha ukpọn nọnsọle.
35 Ene ẹbho da mundia ha ghe ebe sunu. Ọkpakinọn, ene gbẹloghe da ha nyọnghọn ọle ihue yọle: “Ghọle! Ẹbho ọle sabọ hinmhin; ji ọle hinmhin egbe ọle nian sade ọle hi Kristi nin Osẹnobulua zẹle.”
36 Ene egbanegbe bhọ da yẹ ha zuọzuọ ọle. Ele ha bu ọle re, ele ki mun anyọn nọn muokhe nanlẹn wọn.
37 Ele ki ha yọle: “Miẹn egbe ẹ fan sade ojie ọsi ibhokhan Ju uwẹ gene khin.”
38 Ele da gbẹn emhin mun ọle bhi uke uhọnmhọn, nọn yọle: “Ojie ọsi ibhokhan Ju khọnan.”
39 Ọkpa bhi ene oyi nan khan ọbhi oran sikẹ ọle da munhẹn ha re unun ji ọle. Ọ da ha yọle: “Ahamiẹn uwẹ gene hi Kristi, hinmhin egbe ẹ, uwẹ ha yẹ hinmhin mhan!”
40 Ọnọnkẹle da ki taman ọlẹn yọle: “Ofẹn Osẹnobulua ibe zẹwẹ mun uwẹ hiehie? Oya nan re nin mhan, ọle a yẹ re nanlẹn
41 arẹmiẹn ọle bha lu ọkpa lu eva. Bhi ọsẹmhan, olukhọ nin mhan lu, ọle mhan loya le.”
42 Ọle da ki taman Jesu yọle: “Ye imẹn re bhi Agbejele nọnsẹ.”
43 Jesu da ki taman ọlẹn yọle: “Bhi ọsi ẹmhọanta, imẹn taman uwẹ ẹlẹnan ghe, uwẹ dẹ deba imẹn ha ribhi Ogba Ọfubhegbe.”
44 Egbẹghe agogo igbeva* bhi ọsodanmhẹn, ọle a ha ye bhi ọne ẹghe nan. Ọrẹyiriọ, ijerebhe bhi ọne agbaẹbho da so ebiuki a, rẹ dọ sẹbhi agogo ea* bhi ọsodanmhẹn.
45 Ovuẹn bha yẹ ka zẹ. Ẹghenin, ukpọn nan rẹ wa eje khiale a bhi uwa oga da sọ yi eva.
46 Jesu da ki so dagbare yọle: “Aba, imẹn mun iẹnlẹn nọnsẹmhẹn bhi obọ nọnsẹ.” Ọle ki ta ọnan fo, ọle da gbẹtin sotọ.*
47 Ọkakulo ọkpa nọn ha ribhi enin ki daghe ebe sunu, ọle da munhẹn ha re ogẹn ji Osẹnobulua. Ọle da ha yọle: “Ọria esili ọne okpea nan gene ha khin.”
48 Ene ẹbho ne vae bhi enin dọ ghe ughe ki daghe ebe sunu, ele da lu akhiẹ ha khian uwa.
49 Ọrebhe ne lẹn ọlẹn da gban egbe fia ha ghe. Ikhuo ne rẹkhan ọlẹn na bhi Galili vae da yẹ ha ribhi enin. Ẹlo ele da sẹbhi ene emhin nan rebhe.
50 Okpea ọkpa da ha ribhọ natiọle Josẹf. Ọkpa bhi ene bhuohiẹn bhi Sanhẹdrin* ọle khin. Okpea nọn khiale, nọn mhọn ọkhọle esili ọle khin.
51 (Ọne okpea nan bha re obọ ọbhi emhanmhan ọsi ọne ikotu bi emhin nin ele lu.) Obhi Arimatia bhi agbaẹbho nọnsi Judia ọle khin. Ọle wo ha mundia khẹ Agbejele nọnsi Osẹnobulua.
52 Ọne okpea nan da bu Pailet yẹ taman ọlẹn nọn mun ekuegbe nọnsi Jesu nanlẹn.
53 Josẹf da ki mun ọne ekuegbe huẹnre yẹ re ukpọn linẹn nọn mhọn-ose rẹ gbanọ ọlẹn. Ọle da dọ mun ọlẹn ọbhi ẹkẹ idin nan hian ọbhi ẹkẹ udo. A bha sẹ ka re ọria soso tọ bhi enin khẹ.
54 Ukpẹdẹ nan rẹ mun egbe Sabati ọbhi otọ, ọle ene emhin nan rẹ sunu. Sẹyẹ, ọ da ha kẹ khere nan rẹ mun Sabati hẹn.
55 Ene ikhuo ne rẹkhan Jesu na bhi Galili vae da rẹkhan Josẹf. Ele da dọ fẹ ọne idin ghe, yẹ daghe ebi a rẹ mun ọne ekuegbe ọbhọ yẹ.
56 Ele ki lu fo, ele da fikie dọ guanọ abhii nọn vin-ohin bi emhin kẹkẹ ne vin ohin ne ọbhi otọ. Ọkpakinọn, beji uhi tale, ele da re ukpẹdẹ Sabati rẹ koahua.
Eba gbẹn bho otọle
^ Itan khọnan nan rẹ yọle “Ehe.”
^ Ọne ulọnlẹn nan bha ha ribhi ebe Baibo eso bhi ẹghe ẹdẹlẹ. Bhiriọ, ọ bha khẹke nọn ha ribhi ẹkẹ Baibo. Fẹ Ebi A Gbẹn Ba Ọle Nọnzi A3.
^ La “eyokhọnlẹn.”
^ Bhi Grik, “uriagogo nọnzi ehan.”
^ Bhi Grik, “uriagogo nọnzi isinlin.”
^ La “yu.”
^ Ikotu nọn khua ọsi ibhokhan Ju, ọle hi Sanhẹdrin.
