Luk 3:1-38
3 Bhi ukpe nọnzi igbehẹn bhi ugbẹloghe ọsi Taiberiọs nin Siza, ẹghe nin Pọntiọs Pailet rẹ ha yi gọvanọ ọsi Judia, Hẹrọd da ha gbẹloghe Galili. Filip nin obhio ọle da ha gbẹloghe agbaẹbho ọsi Ituria bi Trakonaitis. Laisenias da ha gbẹloghe Abilini.
2 Bhi ọne ẹghe nan nin Keafas rẹ ha yi ojohẹn, nin Anas da ha yi ọkpa bhi ohẹn ne khua, Jọni nin ọmọn nọnsi Zẹkaraya da họn ọta nọnsi Osẹnobulua bhi ẹkẹ ojẹgbo.
3 Bhiriọ, ọle da nabhi ene agbaẹbho ne sikẹ ẹdẹ Jọdan. Ọle da ha taman ẹbho nin ele mianmẹn nin ele rẹ rẹman ghe ele fidenọ beji Osẹnobulua ha da rẹhunmhan olukhọ nọnsele,
4 beji a rẹ gbẹn ọlẹn ọbhi ebe nọnsi Ẹzaya nin akhasẹ yọle: “Ọria so dagbare bhi ẹkẹ ojẹgbo yọle: ‘Hẹnhẹn uwedẹ nọnsi Jehova!* Dia ukhuo nesọle.
5 A dẹ re ekẹn lan iyala rebhe, yẹ tọ oke rebhe sotọ; a dẹ dia ukhuo ne gọnọ a, yẹ riẹriẹ uwedẹ ne bha riẹriẹ;
6 Ọrebhe ki daghe uwedẹ nin Osẹnobulua ha rẹ miẹn ẹbho fan.’”
7 Ọle da munhẹn ha taman usun ẹbho ne vade dọ mianmẹn: “Ibha nin ẹnyẹn ne manman mhọn obi, họ bhọ sekha nin bha, nin bha re egbe nẹ bhi ukpohu nọn vade?
8 Bha mọn ikpẹ ne ha rẹman ghe bha fidenọ. Bha hẹi ha taman egbe ibha ghe, ‘Imọn nesi Ebraham mhan khin.’ Ranmhude, bhi ọsi ẹmhọanta, Osẹnobulua dẹ sabọ re ene udo nan kiẹn imọn nin Ebraham.
9 Ọne uze bhọ ribhi odotọ ene eran fo. Oran nọn hi ki rẹ khin nọn bha mọn ikpẹ nọn mhẹn, a dẹ hian ọlẹn fia, yẹ mun ọlẹn kpọn bhi eranlẹn.”
10 Ene ẹbho da ki ha nọọn ọlẹn yọle: “Be ọkhẹke nin mhan lu?”
11 Ọle da taman ele yọle: “Ọria nọn mhọn awegbe eva re ọkpa nin ọnọn imhọnlẹn. Ọnọn mhọn ebale ha yẹ rẹ nin ọnọn imhọnlẹn.”
12 Ene koko igho uhọnmhọn bhọ da yẹ bu ọle re dọ mianmẹn. Ele da nọọn ọlẹn yọle: “Ọman-emhin, be ọkhẹke nin mhan lu?”
13 Ọle da taman ele yọle: “Ibha hẹi hian ba igho uhọnmhọn nọn khẹke nin ibha ha miẹn ẹbho le.”
14 Ene eyokhọnlẹn da yẹ ha nọọn ọlẹn yọle: “Be ọkhẹke nin imhan lu?” Ọle da taman ele yọle: “Ibha hẹi gbe ọria soso miẹn ọle emhin, la mun ohoghe gbe ọria soso. Bha ji igho nan ha bha le khọn ibha.”
15 Ranmhude ene ẹbho ha khẹ Kristi, ele da ha ria ẹmhọn Jọni bhi ọkhọle nọnsele yọle, “Asabọmiẹn ọle bhọ hi ọne Kristi.”
16 Bhiriọ Jọni da taman ele rebhe yọle: “Bhi ọsẹmhẹn amẹn imẹn da gbe ibha ruẹ. Ọkpakinọn, ọnọn nẹ mẹn vade, imẹn bhọ bha sẹ ọnọn ha taan iri si ọle bhi ibata re. Ọle dẹ gbe ibha ruẹ bhi ẹlinmhin nọn khiale bi eranlẹn.
17 Ebi a rẹ hoho emhin ri ọle bhi obọ. Ọle dẹ gbọnọ eji ọle da gbe wit a sẹsẹsẹ. Ọle dẹ koko ọne wit ọbhi uwa nin ọle da ne ebale ya. Ọle ki re eranlẹn nan ida sabọ fuẹn an rẹ tuẹ ene iku a.”
18 Ọle da yẹ taman ene ẹbho emhin ne bunbun, yẹ ha wewe ọne ọta nọn mhẹn man ele.
19 Ọkpakinọn ranmhude Jọni re adia nin Hẹrọd nọn gbẹloghe agbaẹbho ọsi Galili bhi ẹmhọn Hẹrodias nin okhuo obhio ọle, bi emhin ebe ọbhebhe nin ọle lu,
20 Hẹrọd da gbo lu ba emhin ebe nin ọle ka lu: Ọle da mun Jọni khue bhi ighan.
21 Bhi ẹghe nin ẹbho rebhe rẹ ha mianmẹn, Jesu da yẹ mianmẹn. Ọle ki ha nan erọnmhọn, okhun da tuje a.
22 Ẹlinmhin nọn khiale da vae bhi uke uhọnmhọn nọnsọle bọsi idulu. Ukpuru da yẹ na bhi okhun yọle: “Uwẹ hi Ọmọn nọnsẹmhẹn. Ọne imẹn hoẹmhọnlẹn; nin ẹmhọn ọlẹn ti imẹn bhọ.”
23 Ikpe ọgban* Jesu ha khin ẹghe nin ọle rẹ mun iwẹnna nọnsọle hẹn. Ẹbho da lẹn ọle bii ọmọnnọnsi Josẹf,nin ọmọn nọnsi Hilai,
24 nin ọmọn nọnsi Matat,nin ọmọn nọnsi Livai,nin ọmọn nọnsi Mẹkai,nin ọmọn nọnsi Janai,nin ọmọn nọnsi Josẹf,
25 nin ọmọn nọnsi Matatayas,nin ọmọn nọnsi Emọs,nin ọmọn nọnsi Nehum,nin ọmọn nọnsi Ẹslai,nin ọmọn nọnsi Negai,
26 nin ọmọn nọnsi Meyat,nin ọmọn nọnsi Matatayas,nin ọmọn nọnsi Sẹmiẹn,nin ọmọn nọnsi Josẹk,nin ọmọn nọnsi Joda,
27 nin ọmọn nọnsi Joanan,nin ọmọn nọnsi Risa,nin ọmọn nọnsi Zẹrubabẹl,nin ọmọn nọnsi Sheatiẹl,nin ọmọn nọnsi Nirai,
28 nin ọmọn nọnsi Mẹkai,nin ọmọn nọnsi Adai,nin ọmọn nọnsi Kosam,nin ọmọn nọnsi Ẹmedam,nin ọmọn nọnsi Ẹr,
29 nin ọmọn nọnsi Jizọs,nin ọmọn nọnsi Ẹliza,nin ọmọn nọnsi Jorim,nin ọmọn nọnsi Matat,nin ọmọn nọnsi Livai,
30 nin ọmọn nọnsi Simiọn,nin ọmọn nọnsi Judas,nin ọmọn nọnsi Josẹf,nin ọmọn nọnsi Jonam,nin ọmọn nọnsi Ẹliakim,
31 nin ọmọn nọnsi Milia,nin ọmọn nọnsi Mẹna,nin ọmọn nọnsi Matata,nin ọmọn nọnsi Netan,nin ọmọn nọnsi Devid,
32 nin ọmọn nọnsi Jesi,nin ọmọn nọnsi Obẹd,nin ọmọn nọnsi Boaz,nin ọmọn nọnsi Samọn,nin ọmọn nọnsi Nashọn,
33 nin ọmọn nọnsi Aminadab,nin ọmọn nọnsi Anai,nin ọmọn nọnsi Hẹzrọn,nin ọmọn nọnsi Pirẹz,nin ọmọn nọnsi Juda,
34 nin ọmọn nọnsi Jekọp,nin ọmọn nọnsi Aiziki,nin ọmọn nọnsi Ebraham,nin ọmọn nọnsi Tira,nin ọmọn nọnsi Nehọ,
35 nin ọmọn nọnsi Sirọg,nin ọmọn nọnsi Riu,nin ọmọn nọnsi Pilẹg,nin ọmọn nọnsi Iba,nin ọmọn nọnsi Shila,
36 nin ọmọn nọnsi Keaina,nin ọmọn nọnsi Apakshad,nin ọmọn nọnsi Shẹm,nin ọmọn nọnsi Noa,nin ọmọn nọnsi Lemẹk,
37 nin ọmọn nọnsi Mẹtusẹla,nin ọmọn nọnsi Enọk,nin ọmọn nọnsi Jerẹd,nin ọmọn nọnsi Mahelaliẹ,nin ọmọn nọnsi Keaina,
38 nin ọmọn nọnsi Inọsh,nin ọmọn nọnsi Sẹt,nin ọmọn nọnsi Adam,nin ọmọn nọnsi Osẹnobulua.
