Luk 4:1-44
4 Jesu da sibhi ẹdẹ Jọdan re. Ẹlinmhin nọn khiale da wo manman ha noo ọle. Ọne ẹlinmhin da ha dia ọle bhi ẹkẹ ojẹgbo.
2 Ọle da ha ribhi enin bhi ikpẹdẹ egbọ eva.* Ọle bha le ebale. Bhiriọ, ene ikpẹdẹ ki gba, ohanmhẹn da ha gbe ọle. Ojuu da vae dọ dọnmhẹn ọlẹn.
3 Ojuu da taman ọlẹn yọle: “Ahamiẹn ọmọn nọnsi Osẹnobulua uwẹ gene khin, taman ọne udo nan nọn kiẹn ibrẹd.”
4 Sokpan, Jesu da taman ọlẹn yọle: “Ebenọnkhiale yọle ghe, ‘Ọ iyi ebale ọkpa ọria ha le nin ọle rẹ ha nyẹnlẹn.’”
5 Ojuu da re ọle ha khian uke oke, yẹ re osukpa re ejele ne ribhi ọne agbọn nan rebhe man ọlẹn.
6 Ojuu da taman ọlẹn yọle: “Imẹn dẹ mun ọne ahu nan rebhe bi uyi nọn rẹkhan ọlẹn nin uwẹ, ranmhude a mun ọlẹn imẹn bhi obọ. Ọria nọn hi ki rẹ khin nọn ghọn imẹn, ọle imẹn ha mun nan.
7 Bhiriọ, uwẹ ha gheghe debhẹre ga imẹn osukpa ọkpa, erebhe ki ha yi ọsi uwẹ.”
8 Jesu da wanniẹn ọlẹn yọle: “Ebenọnkhiale yọle ghe, ‘Jehova* nin Osẹnobulua nọnsẹ, ọle uwẹ ha ga. Sẹyẹ, ọle ọkpa uwẹ ha re oga nọn khiale je.’”
9 Ojuu da ki re ọle nabhi Jerusalẹm, yẹ dọ re ọle mundia bhi eje yo nẹ bhi uwa oga. Ọ da taman ọlẹn yọle: “Ahamiẹn ọmọn nọnsi Osẹnobulua uwẹ khin, na bhi enan san fia.
10 ranmhude, a gbẹn ọlẹn yọle, ‘Ọle dẹ taman ẹhi nesọle nin ele gbega ẹ.’
11 ‘Ele ki re obọ nọnsele mun uwẹ mhọn, beji a ha da miẹn ghe uwẹ bha re oẹ gbe ọbhi udo.’”
12 Jesu da wanniẹn ọlẹn yọle: “Ebenọnkhiale yọle, ‘Hẹi dọnmhẹn Jehova* nin Osẹnobulua nọnsẹ.’”
13 Ojuu ki dọnmhẹn ọlẹn fo, ọle da kpanọ zẹ ọle obọ ha khẹ ẹghe ọbhebhe nin ọle ha gbo miẹn isẹhoa rẹ dọnmhẹn ọlẹn.
14 Jesu da fikie vae bhi Galili. Ẹlinmhin nọn khiale da wo manman ha ne ọle. Ẹbho da wo ha tẹmhọn ọlẹn nọnsẹn bhi ene idunmhun rebhe ne nẹga ọne agbaẹbho.
15 Ọle da yẹ munhẹn ha man emhin bhi sinagọg nesele. Ọrebhe da wo ha mun ekpẹn nanlẹn.
16 Ọle da vae bhi Nazarẹt bhi eji ọle da wanre. Beji ọle ka lu khẹ bhi ukpẹdẹ Sabati, ọle da nabhi ẹkẹ sinagọg yẹ kpanọ mundia nin ọle tie ebe.
17 A da mun ebe nan khili nin ọta akhasẹ ọsi Ẹzaya ye nanlẹn. Ọle da taan ọlẹn an yẹ guanọ eji a da gbẹn yọle:
18 “Ẹlinmhin nọnsi Jehova* ne imẹn, ranmhude, ọle zẹ imẹn nin imẹn dọ wewe ọta nọn mhẹn man ene ibhioguele. Ọle je imẹn nin imẹn dọ taman ene a muno ghe a dẹ fan ele fia, yẹ taman ene ruẹlo ghe ele dẹ ha daghe. Ọle yẹ je imẹn nin imẹn dọ re umiẹnfan nin ene a denyẹnyẹn,
19 nin imẹn dọ wewe ẹmhọn ukpe nin Jehova* ha rẹ miẹn ẹbho ọbhi egbe.”
20 Ọle da ki khii ọne ebe, yẹ mun nin ọguọmhandia nọn wẹnna bhi sinagọg. Ọle da dotua. Ẹbho rebhe ne ribhi ọne sinagọg da kuẹlo ọle bhi egbe.
21 Ọle da ki munhẹn ha taman ele yọle: “Ọne ọta nin ibha họn nan, munsẹ ẹlẹnan.”
22 Ele rebhe da wo ha tẹmhọn ọlẹn nọnsẹn. Ọta esili ne ha si ọle bhi unun re da wo han ele rebhe ilo. Ele da ha yọle: “Ọnan ibe yi ọmọn nọnsi Josẹf?”
23 Ọle da ki taman ele yọle: “Mẹn lẹnmhin ghe bha dẹ yi imẹn, ‘Ọbo, hinmhin egbe ẹ. Emhin nin mhan họn ghe uwẹ lu bhi Kapaniọn, yẹ lu ọle bhi agbaẹbho nọnsẹ.’”
24 Ọle da taman ele yọle: “Bhi ọsi ẹmhọanta, imẹn taman ibha ghe, a imiẹn akhasẹ ọbhi egbe bhi agbaẹbho nọnsọle.
25 Bhi ọsi ijiẹmhin, imẹn taman ibha ghe, ikhuo ne bunbun nin ọdọ ele yu, ele ha ribhi otọ Izrẹl bhi ẹghe ọsi Ẹlaija, bhi ẹghe nin amẹn bha rẹ rọlọ rẹ na bhi ikpe ea bi uki ehan, nin ukhunmhun da wo ha fi bhi ọne agbaẹbho rebhe.
26 Ọrẹyiriọ, a bha je Ẹlaija bu ene ikhuo nan soso. A da je ọle bu okhuo ọkpa nin ọdọ ọle yu nọn nyẹnlẹn bhi Zarẹfat bhi otọ Saidọn.
27 Sẹyẹ, bhi ẹghe nọnsi Ẹlaisha nin akhasẹ, eria ne bunbun ha khọnmhọn emianmhẹn egbekẹn bhi otọ Izrẹl. Ọrẹyiriọ, a bha re egbe daan ọsoso bhi ẹwẹ ele. Nema nin obhi Siria ọkpa a re egbe daan.”
28 Ẹkẹ da manman ha khọ ọrebhe ne ha ka ọle ehọ bhi sinagọg.
29 Ele da kpanọ mundia, yẹ sua ọle dagbare bhi ọne agbaẹbho. Ele da mun ọlẹn ha khian ukpunun ọsi oke nin agbaẹbho nọnsele ye, beji ele ha da na bhi enin sua ọle fia.
30 Ọkpakinọn, ọle da khian sibhi ẹwẹ ele re, yẹ ha khian ọsọle.
31 Ọle da diọbhi agbaẹbho ọkpa bhi otọ Galili, natiọle Kapaniọn. Ọle da ha man ẹbho emhin bhi ukpẹdẹ Sabati.
32 Uwedẹ nin ọle rẹ ha man emhin da wo han ene ẹbho ilo, ranmhude, ọle wo ha talọ bii ọria nọn mhọn ahu.
33 Okpea ọkpa nọn mhọn ẹlinmhin-ebe bhi egbe da ha ribhi ọne sinagọg. Ọle da so dagbare yọle:
34 “Heo! Be rẹtẹ mhan bi uwẹ, Jesu nin obhi Nazarẹt? Uwẹ be vae dọ fuẹn imhan an? Imẹn wo lẹn ọria nin uwẹ khin. Uwẹ hi Ọnọn Khiale nin Osẹnobulua jere.”
35 Ọkpakinọn, Jesu da taman ọlẹn yọle: “Gue unun, uwẹ ha si ọle bhi egbe re!” Ọne ẹlinmhin ki mun ọne okpea gbe ọbhi otọ fo bhi ẹwẹ ene ẹbho, ọ da si ọle bhi egbe re. Ọ bha kuan ọlẹn.
36 Ọnan da wo han ele rebhe ilo. Ele da munhẹn ha yọle: “Sẹ ghe ebi ọne okpea nan rẹ talọ yẹ. Ranmhude ahu nin ọle mhọnlẹn, ọle ha taman ene ẹlinmhin-ebe nin ele dagbare, ele ki wo dagbare!”
37 A da wo ha tẹmhọn ọlẹn na bhi ijerebhe bhi ene idunmhun kẹkẹ ne nẹga ọne agbaẹbho.
38 Ọle ki sibhi ọne sinagọg re, ọle da ha khian uwa nọnsi Saimọn. Inẹn okhuo Saimọn da ha khọnmhọn ifiva* nọn manman kaka. Ele da taman ọlẹn nọn rẹkpa ọle.
39 Bhiriọ, ọle da mundia sike ọle, yẹ taman ọne ifiva nọn si ọle bhi egbe re. Ọne ifiva da gene si ọle bhi egbe re. Ọne okhuo da wo re osukpa kpanọ, yẹ dọ ha nyẹn ebale nin ele.
40 Ẹghe nin oẹnlẹn ki rẹ ha defia, ọrebhe da muno ẹbho nesele re, ne ha khọnmhọn emianmhẹn kẹkẹ. Ọle da ne obọ nyan ele, yẹ hinmhin ele.
41 Ọle da yẹ khu ẹlinmhin-ebe si ẹbho ne bunbun bhi egbe re. Ene ẹlinmhin a ha dagbare, ele ki ha so yọle: “Uwẹ hi Ọmọn nọnsi Osẹnobulua.” Ọkpakinọn, ọle ki manman gbuhi nin ele. Ọle iji ele da talọ, ranmhude ele lẹn ghe ọle hi Kristi.
42 Ẹdẹ ki we, ọle da kpanọ ha khian eje fi ahiẹ a. Ọkpakinọn, ene usun ẹbho da munhẹn ha guanọ ọlẹn. Ele da guanọ ọlẹn sẹbhi eji ọle ye. Ele da ha ho nin ele mun ọlẹn mhọnlẹn nin ọle hẹi kpanọ ze ele obọ.
43 Ọkpakinọn ọle da taman ele yọle: “Imẹn dẹ yẹ wewe ọne ọta nọn mhẹn ọsi Agbejele nọnsi Osẹnobulua bhi agbaẹbho nekẹle, ranmhude, ọnan zẹle nan da je imẹn re.”
44 Bhiriọ, ọle da dọ ha tẹmhọn Osẹnobulua bhi ene sinagọg ne ribhi Judia.
