Luk 6:1-49
-
Jesu hi “Ebeanlẹn ọsi Sabati” (1-5)
-
Jesu da re egbe daan okpea nin obọ nọnsọle nẹghẹ a (6-11)
-
Ene etuegbe 12 (12-16)
-
Jesu da ha man ẹbho emhin yẹ re egbe daan ẹbho ne khọnmhọn (17-19)
-
Emhin ne re eghọnghọn re bi emhin ne si ọkhọbhegbe re (20-26)
-
Hoẹmhọn eghian ẹn (27-36)
-
Hẹi yẹ bhuohiẹn gbe ẹbho (37-42)
-
Ikpẹ nin eran mọnlẹn, ọle a rẹ lẹn ọlẹn (43-45)
-
Uwa nọn mhọn ayotọ; uwa nọn imhọn ayotọ (46-49)
6 Bhi ukpẹdẹ Sabati, beji Jesu bi edibo nesọle rẹ ha na ẹkẹ ugbo gbera, edibo nesọle da ha kọnnọn ebi a kọle. Ele da re obọ wẹn ọlẹn yẹ le ọle.
2 Ibhokhan Farisi eso ki daghe ọnan, ele da yọle: “Bezẹle nin ibha da lu ebe bha khẹke bhi ukpẹdẹ Sabati?”
3 Jesu da ki wanniẹn ele yọle: “Ibha bha be sẹ ka tie ebi Devid lu ẹghe nin ohanmhẹn rẹ ha gbe ọle bi ikpea ne rẹkhan ọlẹn?
4 Ọle da nabhi uwa nọnsi Osẹnobulua yẹ ne ibrẹd nan rẹ zọese. Ọle da le ọle yẹ rẹ bhọ nin ikpea ne rẹkhan ọlẹn. Gbera ene ohẹn, ọ bha khẹke nin ọria ebhebhe le ọle.”
5 Ọle da ki taman ele yọle: “Ọmọn nọnsi okpea, ọle hi Ebeanlẹn ọsi Sabati.”
6 Bhi ukpẹdẹ Sabati ọbhebhe, ọle da nabhi sinagọg yẹ ha man emhin. Okpea ọkpa nin obera nọnsọle nẹghẹ a da ha ribhi enin.
7 Ibhokhan Farisi bi ene man uhi da re ẹlo Jesu bhi egbe, nin ele fẹghe si ọle dẹ re egbe daan ẹbho bhi ukpẹdẹ Sabati, beji ele ha da yọle ghe ọle lu emhin ebe.
8 Jesu lẹn ebi ele ha ria bhi ọkhọle. Bhiriọ, ọle da taman ọne okpea nin obọ nọnsọle nẹghẹ a: “Kpanọ mundia dọ mundia bhi adesẹ.” Ọne okpea da kpanọ dọ mundia bhi enin.
9 Jesu da yọle: “Nin mẹn nọọn ibha ene ikpea nan, be ọkhẹke nan ha lu bhi ukpẹdẹ Sabati? Nan rẹ lu emhin esili, la nan rẹ lu emhin ọbe, nan rẹ miẹn ọria fan, la nan rẹ gbe ọria a?”
10 Ọle ki ghe ele rebhe nẹga fo, ọle da taman ọne okpea yọle: “Niẹn obọ nọnsẹ a.” Ọle ki lu iriọ, ọne obọ bha yẹ nẹghẹ a.
11 Ohu da wo manman re ele. Ele da munhẹn ha tale bhi ẹwẹ ele ebi ele ha khian Jesu yẹ.
12 Ẹdẹ ọkpa, Jesu da ha khian uke oke dọ nan erọnmhọn. Ọle da re asọn rebhe rẹ nan erọnmhọn ji Osẹnobulua.
13 Ẹdẹ ki we, ọle da tie edibo nesọle re, yẹ zẹ itue igbeva bhi ẹwẹ ele. Ọle da ha tie ele etuegbe.
14 Ene itue igbeva hi: Saimọn nin ọle yẹ ha tie ọle Pita, Andru nin obhio Saimọn, Jemis, Jọni, Filip, Batolomio,
15 Matiu, Tọmọs, Jemis nin ọmọn nọnsi Afiọs, Saimọn nan yẹ tie ọle “okpea nọn mhọn ọhubhudu,”
16 Judas nin ọmọn nọnsi Jemis, bi Judas Iskarọt nọn mun Jesu khiẹn.
17 Ọle bi etuegbe nesọle da huẹnre bhi uke oke yẹ mundia bhi eje riẹriẹ. Ẹbho ne bunbun ne yi edibo nesọle da ha ribhi enin. Sẹyẹ, usun ẹbho ne bunbun ne na bhi agbaẹbho ọsi Judia, Jerusalẹm bi idunmhun ne ribhi egbẹdẹ bhi otọ Taya bi Saidọn vae, da yẹ ha ribhi enin. Ele vae dọ ka ọle ehọ, bi nin ọle re egbe daan ele.
18 Ọle da yẹ khu ẹlinmhin-ebe sibhi egbe ọsi ẹbho nin ẹlinmhin-ebe ha kpokpo re.
19 Ọrebhe da ha guanọ nin ele re obọ so ọle, ranmhude, ahu nọn ha si ọle bhi egbe re da wo ha re egbe daan ele rebhe.
20 Jesu da ki ghe edibo nesọle yẹ munhẹn ha yọle:
“Eghọnghọn hi ọsẹbha, ibha nin ibhioguele, ranmhude Agbejele nọnsi Osẹnobulua dẹ ha yi ọsẹbha.
21 “Eghọnghọn hi ọsẹbha, ibha nin ohanmhẹn gbe nian, ranmhude ibha dẹ wo le sẹbhi ọkhọnlẹn.
“Eghọnghọn hi ọsẹbha, ibha ne a lu akhiẹ nian, ranmhude ibha dẹ wo ha jiẹ.
22 “Eghọnghọn hi ọsẹbha ẹghe nọn hi ki rẹ khin nin ẹbho rẹ he ibha, sun ibha fia, re unun ji ibha, yẹ riia ibha elin an ranmhude Ọmọn nọnsi okpea.
23 Ibha wo ha ghọnghọn bhi ọne ukpẹdẹ nin, ibha ha yẹ wo ha dujie, ranmhude, elele nin ibha ha miẹn bhi okhun wo manman kpọnọ. Enan hi emhin nin aba ele nin ẹdẹlẹ ka yẹ lu ene akhasẹ le.
24 “Ọkhọbhegbe hi ọsẹbha, ibha ne fele ranmhude, ibha miẹn emhin rebhe nin ibha guanọ bhi iẹnlẹn fo.
25 “Ọkhọbhegbe hi ọsẹbha, ibha ne le khọn nian, ranmhude, ohanmhẹn dẹ gbe ibha.
“Ọkhọbhegbe hi ọsẹbha, ibha ne jiẹ nian, ranmhude ibha dẹ viẹ-egbe yẹ lu akhiẹ.
26 “Ọkhọbhegbe hi ọsẹbha sade ẹbho rebhe wo ha tẹmhọn ibha nọnsẹn. Inian aba ele nin ẹdẹlẹ ka lu ene akhasẹ le.
27 “Ọkpakinọn, imẹn taman ibha ne ka imẹn ehọ: Ibha wo ha hoẹmhọn eghian ibha, ibha ha yẹ ha lu emhin esili da ene he ibha.
28 Ibha ha nan erọnmhọn nin ene ghunmhun ibha, ibha yẹ ha bhii ji ene re unun ji ibha.
29 Ọria ha fi uwẹ ubi bhi obọ ọkpa, denọ obọ nọnkẹle nanlẹn; sẹyẹ, ọria ha miẹn uwẹ ukpọn nin uwẹ yọ ke okhun, yẹ wo ji ọle da re ọne uwẹ yọ ke otọ.
30 Ọria nọn hi ki rẹ khin nọn bhii uwẹ emhin, re nanlẹn. Sẹyẹ ọria nọn hi ki rẹ khin nọn ne emhin nesẹ kpanọ, hẹi nọọn emhin soso bhi obọ ọle.
31 “Sẹyẹ, beji uwẹ guanọ nin ẹbho rẹ ne uwẹ lu emhin, re iriọ ha ne ele lu emhin.
32 “Ahamiẹn eria ne hoẹmhọn uwẹ ọkpa uwẹ hoẹmhọnlẹn, elele nela uwẹ ha miẹn bhọ? Eria olukhọ bhọ yẹ hoẹmhọn eria ne hoẹmhọn ele.
33 Ahamiẹn eria ne lu uwẹ nọnsẹn uwẹ lu emhin esili nan, elele nela uwẹ ha miẹn bhọ? Ọ iyi iriọ eria olukhọ be yẹ lu?
34 Sẹyẹ, ahamiẹn eria ne ha sabọ ha uwẹ osa uwẹ re emhin nan mọnmọn, elele nela uwẹ ha miẹn bhọ? Eria olukhọ bhọ yẹ re emhin nin ibo ele mọnmọn, ranmhude, ele lẹnmhin ghe ele dẹ miẹn igho nọnsele gba.
35 Bhi ọsẹbha, ibha wo ha hoẹmhọn eghian ibha, ibha ha lu emhin esili nin ẹbho, ibha ha yẹ ha re emhin nin ẹbho mọnmọn ọsọhẹ. Bhiriọ, ibha ki miẹn elele nọn kpọnọ. Ibha ki yẹ ha yi imọn ọsi Ọnọn Ke Okhun Nẹ, ranmhude, ọle mhọn ifuẹkẹ da eria ọbe bi eria nin emhin iti ele bhọ.
36 Ibha wo ha mhọn itohan da ẹbho beji Aba ibha rẹ mhọn itohan.
37 “Rẹ deba ọnin, ibha hẹi yẹ bhuohiẹn gbe ẹbho, nan hẹi bhuohiẹn gbe ibha. Ibha hẹi yẹ ha re unun riia ẹbho a, nan hẹi re unun riia ibha a. Bha wo ha rẹhunmhan, a ki yẹ rẹhunmhan ibha.*
38 Bha ha re emhin nin ẹbho, ẹbho ki yẹ ha re emhin nin bha. Ele ki mhaan ukpu nọn manman vuọn nin ibha, ukpu nan nyẹn-nyẹn, nan khankhan sotọ, nọn yẹ ha kpakua. Ukpu nin ibha rẹ mhaan nin ẹbho, ọle a ha yẹ rẹ mhaan nin bha.”
39 Ọle da ki noo arẹkhọkhọ. Ọle da taman ele yọle: “Ọruẹlo ida sabọ dia ọruẹlo. Ọle ha lu iriọ, ele veva ki de ọbhi uhio.
40 Ọria nan man ọle emhin ida sabọ lẹn emhin gbera ọnọn man ọle emhin. Ọkpakinọn, a ha man ọle emhin nọnsẹn, ọle dẹ sabọ diabe ọnọn man ọle emhin.
41 Bezẹle nin uwẹ da ha ghe igbẹn-owẹ nọn ribhi ẹlo nọnsi obhio ẹ, nin uwẹ bha da daghe aseran nọn ribhi ẹlo nọnse?
42 Be uwẹ nọn bha daghe aseran nọn ri uwẹ bhi ẹlo ha rẹ taman obhio ẹ yẹ, ‘Obhio, ji imẹn re igbẹn-owẹ si uwẹ bhi ẹlo re’? Uwẹ nọn riale ghe uwẹ khiale! Ka mun aseran sibhi ẹlo nọnsẹ re, beji uwẹ ha da sabọ daghe nọnsẹn rẹ re igbẹn-owẹ sibhi ẹlo nọnsi obhio ẹ re.
43 “Eran nọn mhẹn imọn ikpẹ ne imhẹn. Sẹyẹ, eran nọn imhẹn imọn ikpẹ ne mhẹn.
44 Ikpẹ nin eran mọnlẹn, ọle a rẹ lẹn ọlẹn. Bhi ọsi ijiẹmhin, igbẹn bi ikhiakhiọ imọn emekọnọn.
45 Emhin esili ne ribhi ọkhọle ọsi ọria nọn mhẹn, ele ọle ne dagbare. Sokpan, emhin ne imhẹn nin ọria nọn imhẹn ne ya bhi ọkhọle, ele ọle ne dagbare; ebe vuọn ọria ọkhọle, ọle unun nọnsọle ta dagbare.
46 “Bezẹle nin ibha da tie imẹn ‘Ebeanlẹn! Ebeanlẹn!’ ọkpakinọn ibha ilu rẹkhan ebi imẹn ta?
47 Ọria nọn hi ki rẹ khin nọn vae dọ kaehọ ọta nesẹmhẹn yẹ lu rẹkhan ele, inian ọle dia i:
48 Ọle diabe okpea nọn ho nọn bọn uwa, nọn tọ otọ dinmhin, yẹ gbe ayotọ bhi uke udo. Ẹghe nin okpamẹn ki rẹ rọ, amẹn da na bhi ẹdẹ kpono sẹbhi ọne uwa. Ọkpakinọn, ọ bha sabọ lu ọne uwa emhin soso, ranmhude a wo bọn ọlẹn nọnsẹn.
49 Bhi obọ nọnkẹle, ọria nọn hi ki rẹ khin nọn họn ọta nọnsẹmhẹn nọn bha re ọle lu, inian ọle diabe okpea nọn bha gbe ayotọ ọkuẹsẹ ọle munhẹn ha bọn uwa. Amẹn ki na bhi ẹdẹ kpono sẹbhi ọne uwa, ọne uwa da re osukpa de, yẹ siẹn sotọ sẹsẹsẹ.
Eba gbẹn bho otọle
^ La “fan ibha fia.”
