Luk 7:1-50
-
Ọkakulo ọkpa da re urẹọbhọ man (1-10)
-
Bhi agbaẹbho ọsi Nein, Jesu da riọ ọmọn ọsi okhuo ọkpa nọn iyẹ mhọn ọdọ kpanọ bhi uu (11-17)
-
Jesu da gẹn Jọni nọn re amẹn nin ẹbho (18-30)
-
Jesu da fi ọne ore nọn ihẹnmhọn unun (31-35)
-
Jesu da rẹhunmhan olukhọ ọsi okhuo okpa nọn manman lu olukhọ (36-50)
-
Arẹkhọkhọ ọsi ikpea eva nẹ ha mhọn ọria osa (41-43)
-
7 Ọle ki ne ene ẹbho talọ fo, ọle da diọbhi Kapaniọn.
2 Ọkakulo ọkpa da ha ribhi enin. Ọguọmhandia nọnsọle nin ọle manman hoẹmhọnlẹn da manman ha khọnmhọn. Ọ da kẹ khere nọn rẹ yu.
3 Ẹghe nin ọle rẹ hẹnmhọn Jesu, ọle da je ewanlẹn eso ọsi ibhokhan Ju bu ọle, nin ele taman ọlẹn nin ọle vae dọ re egbe daan ọguọmhandia nọnsọle.
4 Ele da bu Jesu re, yẹ manman ha bhii ọle yọle: “Ọle wo sẹ ọria nin uwẹ ha rẹkpa,
5 ranmhude, ọle wo hoẹmhọn agbaẹbho nọnsẹmhan. Ọle bhọ bọn sinagọg nọnsẹmhan.”
6 Jesu da ki rẹkhan ele. Ọkpakinọn, ọ ki kẹ khere nin ele rẹ sẹbhi ọne uwa, ọne ọkakulo da je ẹbho bu ọle nin ele dọ taman ọlẹn yọle: “Ọwanlẹn hẹi yẹ kpokpo egbe nin uwẹ rẹ vae. Imẹn bha sẹ ọria nin uwẹ ha na ọle bhi uwa.
7 Ọnanzẹle nin imẹn bha da tobọmhẹn bu ẹ re. Wo yọle nin egbe daan ọguọmhandia nọnsẹmhẹn, egbe ki gene daan ọlẹn.
8 Imẹn tobọmẹn bhọ mhọn ebeanlẹn. Imẹn yẹ mhọn eyokhọnlẹn ne ribhi odotọ imẹn. Imẹn ha yọle nin ọnan ha khian, ọ ki ha khian. Imẹn ha yọle nin ọnan vae, ọle ki vae. Imẹn ha taman ọguọmhandia nọnsẹmhẹn nin ọle dọ lu ọnan, ọle ki lu ọle.”
9 Jesu ki họn ọnan, ọ da wo han ọle ilo. Bhiriọ, ọle da taman ene rẹkhan ọlẹn yọle: “Imẹn taman ibha ghe, imẹn bha miẹn ọria bhi otọ Izrẹl nọn mhọn urẹọbhọ nọn ziẹn sẹ bii ọsi ọne okpea nan.”
10 Ẹghe nin ene ẹbho nan jele ki rẹ sẹbhi uwa, ele da kere ghe, egbe daan ọne ọguọmhandia.
11 Ọle ki wo sibhi enin re, ọle da ha khian agbaẹbho natiọle Nein. Edibo nesọle bi usun ẹbho ne bunbun da rẹkhan ọlẹn.
12 Ọle ki wo sikẹ igeti ọsi ọne agbaẹbho, ẹbho da ha mun okpea ọkpa nọn yu dagbare. Ọle ọkpa inẹn ọlẹn rẹ ha mhọnlẹn. Rẹ deba ọnin, ọne okhuo iyẹ mhọn ọdọ. Ẹbho ne bunbun bhi ọne agbaẹbho da rẹkhan ọlẹn.
13 Jesu ki daghe ọne okhuo, ohan ọlẹn da wo ha to ọle. Ọle da taman ọne okhuo yọle: “Hẹi yẹ viẹ.”
14 Jesu ki da khian bu ele yẹ re obọ so ewa nan rẹ mun ọne olinmhin. Bhiriọ, ene mun ọne olinmhin da mundia. Ọle da yọle: “Okpea, imẹn taman uwẹ, kpano!”
15 Ọne okpea nọn yulu da kpanọ dotua, yẹ munhẹn ha talọ. Jesu da re ọle nin inẹn ọlẹn.
16 Ofẹn da wo ha mun ele rebhe. Ele da munhẹn ha gẹn Osẹnobulua yẹ yọle: “Akhasẹ nọn khua zegbere bhi ẹwẹ imhan,” sẹyẹ, “Osẹnobulua ye ẹbho nesọle re.”
17 Ẹmhọn ebi ọle lu da vẹ gba idunmhun kẹkẹ ne nẹga ọne agbaẹbho nin, bi otọ Judia rebhe.
18 Edibo nesi Jọni da dọ taman Jọni ene emhin nan rebhe ne sunu.
19 Jọni da tie eva bhi edibo nesọle, yẹ je ele bu Jesu nin ele dọ nọọn ọlẹn yọle: “Uwẹ be hi Ọnọn Vade, la nin mhan be ha khẹ ọria ọbhebhe?”
20 Ele ki sẹbhi eji ọle ye, ele da taman ọlẹn yọle: “Jọni nọn re amẹn nin ẹbho je imhan re nin mhan dọ nọọn uwẹ yọle, ‘Uwẹ be hi Ọnọn Vade, la nin mhan be ha khẹ ọria ọbhebhe?’”
21 Bhi ọne ẹghe nin tee, ọle da re egbe daan ẹbho ne bunbun, ẹbho ne ha khọnmhọn emianmhẹn nọn manman kaka, bi ẹbho nin ẹlinmhin-ebe kpokpo. Ọle da yẹ lu ọle nin ẹbho ne bunbun ne ruẹlo ha daghe.
22 Jesu da ki wanniẹn ene ikpea yọle: “Bha ha khian dọ taman Jọni ebi ibha daghe bi ebi ibha họnlẹn. Ene ruẹlo daghe, ene akhun munhẹn ha khian, a re egbe daan ene khọnmhọn emianmhẹn egbekẹn, ene yehọ munhẹn ha hẹnmhọn, a riọ ene yu kpanọ, sẹyẹ a ta ọne ọta nọn mhẹn man ene ibhioguele.
23 Eghọnghọn hi ọsi ọne ọria nọn bha miẹn emhin bhi egbe imẹn nọn ha re ọle dere.”
24 Ene ẹbho nin Jọni je re ki kpanọ fo, Jesu da munhẹn ha tẹmhọn Jọni man ene usun ẹbho. Ọle da yọle: “Be ibha dọ fẹghe bhi ẹkẹ ojẹgbo? Ilunmhun nin ahoho mun-yo-mun-re be nọn?
25 Be ibha ki dọ daghe? Okpea nọn ne ukpọn ne mhọn-ose yọ? Ene ne ukpọn ne mhọn-ose yọ, bi ene mhọn emhin rebhe nin ele guanọ ribhi isi ọnojie.
26 Bhiriọ, be ibha ki dagbare dọ fẹghe? Akhasẹ? Ehe, imẹn taman ibha ghe, ọle bhọ lu okpọria gbera akhasẹ.
27 Ọle hi ọne a tẹmhọnlẹn ẹghe nan rẹ gbẹn yọle: ‘Ghọle! Imẹn je ukọ nọnsẹmhẹn kalo nin uwẹ, nin ọle dọ hẹnhẹn uwedẹ khẹ uwẹ.’
28 Imẹn taman ibha ghe, bhi ẹwẹ eria rebhe ne sẹ nyẹnlẹn bhi ọne otọ nan, a bha sẹ miẹn ọria nọn khua okhun gbera Jọni. Ọkpakinọn, ọria nọn ribhi ihe nọn khere nẹ bhi Agbejele nọnsi Osẹnobulua kpọnọ nẹ ọle.”
29 (Ẹghe nin ene ẹbho rebhe bi ene koko igho uhọnmhọn rẹ họn ọnan, ele da ha yọle uwedẹ nesi Osẹnobulua wo gba, ranmhude Jọni, ọle re amẹn nin ele.
30 Ọkpakinọn, ibhokhan Farisi bi ẹbho ne manman lẹn uhi da re ẹlo gbe adia nin Osẹnobulua re nin ele a, ranmhude, ele bha ji Jọni da re amẹn nin ele.)
31 “Họla mẹn ha ki rẹ khọkhọ ikpea ọsi ọne ore nan? Họla ele khọle?
32 Inian ele diabe ibhokhan ne dotua bhi ẹki ha sotie ibo ele, yẹ yọle: ‘Imhan fi ufele nin ibha, ọkpakinọn ibha bha gbe ikhiẹn. Imhan so illo akhiẹ nin ibha, ọkpakinọn ibha bha viẹ-egbe.’
33 Iriọ yẹ nọn, ẹghe nin Jọni nọn re amẹn nin ẹbho rẹ vae, ọle bha ha da, ọle bha ha le, ọkpakinọn ibha da yọle: ‘Ẹlinmhin-ebe kpokpo ọle.’
34 Sokpan, Ọmọn nọnsi okpea ki vae, ọle da ha da yẹ le, ọkpakinọn, ibha da yọle: ‘Ghọle! Okpea nọn le okpebale, nọn yẹ manman da anyọn ọle khin. Ọmọẹ ọsi eria olukhọ bi ene koko igho uhọnmhọn ọle yẹ khin!’
35 Ọrẹyiriọ, emhin esili nin ọria lu, ọle ha rẹman ghe ọria nọn wanlan ọle khin.”
36 Ọkpa bhi ibhokhan Farisi da taman Jesu nin ọle vae dọ le ebale bhi isi ọle. Bhiriọ, Jesu da nabhi uwa nọnsọle, yẹ dotua sikẹ itebu.
37 Sẹ ghe, okhuo ọkpa nan lẹn bhi ọne agbaẹbho ghe ọluemhiebe ọle khin da lẹn ghe Jesu le ebale bhi uwa ọsi ọne obhokhan Farisi. Bhiriọ, ọle da re uko ọsi alabasta nin abhii nọn vin-ohin ye re bhi enin.
38 Ọle ki debhẹre bhi egbegbe oẹ nọnsi Jesu, ọle da munhẹn ha viẹ ọle bhi uke oẹ. Ọle da re eto nọnsọle rẹ gbo ọne ameviẹ si Jesu bhi oẹ re. Sẹyẹ, ọle da re unun fiofio oẹ nọnsi Jesu, yẹ gbe ọne abhii nọn vin-ohin ọbhọ.
39 Ọne obhokhan Farisi nọn tie Jesu vae bhi isi ọle ki daghe ọnan, ọle da taman egbe ọle yọle: “Sade akhasẹ ọne okpea nan gene khin, ọle ha re lẹn unan ọria nin ọne okhuo nan khin nọn a re obọ so ọle, ghe ọria olukhọ nọn.”
40 Jesu da taman ọlẹn yọle: “Saimọn, emhin ribhọ nin imẹn ho nin imẹn taman ẹn.” Ọle da yọle: “Tale, Ọman-emhin!”
41 “Ikpea eva da ha mhọn ọria osa. Ọkpa bhọ da ha mhọn ọlẹn dinariọs* iyisẹn isẹn,* ọnọnkẹle da ha mhọn ọlẹn dinariọs igbe nyan egbọ eva.*
42 Beji ele bha ki miẹn emhin soso rẹ ha ọle osa, ọle da gbe ọne osa kua nin ele.* Bhiriọ, họla ha manman hoẹmhọn ọne okpea nẹ bhi ẹwẹ ele?”
43 Saimọn da wanniẹn ọlẹn yọle: “Imẹn riale ọne osa nọnsọle hu nẹ.” Jesu da taman ọlẹn yọle: “Iriọ wo nọn.”
44 Bhiriọ, ọle da denọ ẹlo da ọne okhuo yẹ taman Saimọn yọle: “Ẹghe nin imẹn rẹ na uwẹ bhi uwa, uwẹ bha sa amẹn nin imẹn rẹ kpe oẹ. Ọkpakinọn, uwẹ daghe ọne okhuo nan, ọle da re ameviẹ nọnsọle re gbo oẹ nọnsẹmhẹn, yẹ re eto nọnsọle ka ọle.
45 Uwẹ bha re unun fiofio imẹn. Ọkpakinọn, rẹ na bhi eghe nin imẹn rẹ na bhi uwa nọnsẹ, ọne okhuo nan bha zobọ bhọ rẹ ha re unun fiofio oẹ nọnsẹmhẹn.
46 Uwẹ bha sa abhii mẹn bhi uhọnmhọn. Ọkpakinọn ọne okhuo nan da sa abhii nọn vin-ohin imẹn bhi oẹ.
47 Bhiriọ, imẹn taman uwẹ ghe, arẹmiẹn olukhọ nin ọle lu manman bunbun,* imẹn rẹhunmhan ọlẹn, ranmhude ọle manman mhọn oyẹẹ. Ọria nan re obhi emhin khere hunmhan, obhi oyẹẹ khere ọle rẹman.”
48 Jesu da ki taman ọne okhuo yọle: “Imẹn re olukhọ nesẹ hunmhan uwẹ.”
49 Ene ele ko ha le ebale bhi itebu ọkpa da ha tale bhi ẹwẹ ele yọle: “Họ bhọ kuẹ hi ọne okpea nan, nọn a rẹhunmhan olukhọ?”
50 Ọle ki da taman ọne okhuo yọle: “Urẹọbhọ nin uwẹ mhọnlẹn miẹn ẹn fan. Ha khian, egbe fu ẹ re.”
