Mak 13:1-37
13 Ẹghe nin ọle ki rẹ ha sibhi ọne uwa oga re, ọkpa bhi edibo nesọle da yọle: “Ọman-emhin, sẹ ghe ebi ọne uwa nan bi ene udo nan rẹ mhọn-ose a yẹ!”
2 Ọkpakinọn, Jesu da taman ọlẹn yọle: “Uwẹ daghe ọne udede uwa nan, a dẹ dunmhun ọlẹn sotọ sẹsẹsẹ. Udo ọkpa ida kẹre bhọ.”
3 Beji ọle dotua bhi uke Oke ọsi Oliv, yẹ ha ghe ọne uwa oga, Pita, Jemis, Jọni bi Andru da fẹkẹ bu ọle re. Ele da taman ọlẹn yọle:
4 “Taman imhan, ẹghela ene emhin nan ha rẹ sunu? Be hi iyaman nọn ha rẹman ghe ọkpẹnlẹn ọsi ene emhin nan rebhe sire?”
5 Jesu da ki taman ele yọle: “Ibha gbẹlokotọ nin ọria soso hẹi hiẹ ibha.
6 Ẹbho ne bunbun dẹ re elin nọnsẹmhẹn vae. Ele ki ha yọle, ‘Imẹn hi Kristi,’ ele ki yẹ hiẹ ẹbho ne bunbun.
7 Ibha ha hẹnmhọn okhọn bhi ije kẹkẹ, ibha hẹi ji ofẹn mun ibha; ene emhin nan dẹ sunu, ọkpakinọn, ọkpẹnlẹn isẹ da vae.
8 “Agbaẹbho ọkpa dẹ mun okhọn bu agbaẹbho ọbhebhe, sẹyẹ agbejele ọkpa dẹ mun okhọn bu agbejele ọbhebhe; otọ ki ha munvẹa bhi ije kẹkẹ; ukhunmhun ki ha fi. Ene emhin nan rebhe ki ha yi umunhẹn ọsi ọbalọ, bọsi okhuo nin ubiẹmhin lu.
9 “Bhi ọsẹbha, ibha gbẹlokotọ bhi egbe ibha. Ẹbho dẹ muno ibha ha khian ikotu, ele dẹ gbe ibha bhi sinagọg, yẹ muno ibha bu gọvanọ bi enijie ranmhude imẹn. Ọnan ki re otọ nin ibha rẹ sọsali man ele.
10 Sẹyẹ, a dẹ ka ta ọne ọta nọn mhẹn na bhi ene agbaẹbho rebhe.
11 Ahamiẹn ele mun ibha khian, ibha hẹi ha kpokpo egbe ba ẹmhọn ebi ibha ha ta; ebi a ha re nin ibha bhi ọne ẹghe nin, ọle ibha ha ta. Ranmhude, ọ iyi ibha da ha talọ. Ẹlinmhin nọn khiale da ha noo ibha rẹ talọ.
12 Rẹ deba ọnin, okpea ki mun obhio ọle re nan gbe ọle a. Aba ki mun ọmọn nọnsọle re nan gbe ọle a. Imọn ki yẹ ne ene biẹ ele ha suan, yẹ mun ele re nan gbe ele a.
13 Ẹbho rebhe ki he ibha ranmhude elin nọnsẹmhẹn. Ọkpakinọn, ọria nọn ziẹngbe sẹ ọkpẹnlẹn dẹ miuhọnmhọn.
14 “Ahamiẹn ibha daghe ọne emhin nọn sọnnọn nọn si ugbekhuelo re mundia bhi eji ọ bha da khẹke nọn da mundia (ji ọria nọn tie ene ẹmhọn nan noo ẹwanlẹn), ji ene ribhi Judia munhẹn ha nẹ diọbhi uke oke.
15 Ọria nọn ribhi okhun uwa hẹi huẹnre, la nabhi ẹkẹ uwa nọnsọle dọ re emhin soso sibhi ẹkẹ uwa re;
16 sẹyẹ, okpea nọn ribhi ugbo hẹi fikie vae bhi uwa dọ re ukpọn nin ọle yọ ke okhun.
17 Ọ dẹ khọ bhi egbe nin ikhuo ne hanmhan bi ikhuo ne mun ọmọn bhi obọ bhi ọne ẹghe nin!
18 Ibha ha bhii nọn hẹi sunu bhi ẹghe ulinlin;
19 ranmhude ọne ẹghe nin dẹ ha yi ẹghe ekpokpo nọn khua. Ọne ekpokpo dẹ ha yi ọne a bha sẹ ka miẹn egbọle khẹ rẹ na bhi ẹghe nin Osẹnobulua rẹ man ọne agbọn nan, rẹ dọ sẹbhi ọne ẹghe nin. Sẹyẹ, a ida kie miẹn egbọle ghẹdẹ.
20 Bhi ọsi ẹmhọanta, ahamiẹn Jehova* bha hian sibhi ene ikpẹdẹ nin re, ọria soso ida miuhọnmhọn. Ọkpakinọn, ranmhude ene ọle zẹle, ọle dẹ hian sibhi ene ikpẹdẹ nin re.
21 “Sẹyẹ, ahamiẹn ọria soso taman ibha ẹghenin yọle, ‘Ghọle! Kristi ribhi enan,’ la, ‘Ghọle! Ọ ribhi enin,’ ibha hẹi rẹọ ọle bhọ.
22 Ranmhude, Kristi ohoghe bi akhasẹ ohoghe dẹ zegbere. Ele ki ha lu emhin ọhan-ilo kẹkẹ, beji ele ha da hiẹ enanzẹle, sade ọ fo ele.
23 Bhiriọ, ibha wo ha babegbe. Imẹn ta emhin rebhe ne ha sunu man ibha fo.
24 “Ọkpakinọn, ekpokpo nọn ha sunu bhi ọne ẹghe nin ha fo, ovuẹn ki so ebiuki a, sẹyẹ, uki ida bhala.
25 Ene ahiẹnhiẹn ki ha de sibhi okhun re. Emhin ne ribhi okhun ki yẹ ha mun lueghe.
26 Ẹghenin, ele ki daghe Ọmọn nọnsi okpea re uyi bi ahu nọn khua vade bhi ẹkẹ adudu amẹn.
27 Ọle ki je ene ẹhi dagbare, nin ele dọ koko enanzẹle nesọle bhi obọ nenẹn ọsi ọne otọ nan, rẹ na bhi eji otọ da munhẹn rẹ sẹbhi eji okhun sẹle.
28 “Ibha luẹ emhin bhi ọne arẹkhọkhọ nan ọsi eran fig: Ọ ha ki jẹ ikpabọ-eran ọsọgbọn, nọn yẹ munhẹn ha sọnnọn ebe re, ibha ki lẹn ghe ẹghe nin eran rẹ mọn ikpẹ sire.
29 Iriọ yẹ nọn rẹji ibha. Ẹghe nin ibha ha rẹ daghe ene emhin nan sunu, ibha lẹn sẹbhọ ghe, Ọmọn nọnsi okpea sire. Ọle ribhi ununro.
30 Bhi ọsi ẹmhọanta, imẹn taman ibha ghe, ọne ore nan ida gbera kie ọkuẹsẹ ene emhin nan rebhe sunu.
31 Otọ bi okhun ha rẹ gbera kie, a ida miẹn ghe ọta nọnsẹmhẹn bha munsẹ.
32 “Ọria soso iribhọ nọn lẹn ọne ukpẹdẹ nin, bi ọne uriagogo nin. Ene ẹhi ne ribhi okhun bha lẹn, ọne Ọmọn bha yẹ lẹn. Ọne Aba ọkpa lẹn ọne ukpẹdẹ.
33 Ibha wo ha babegbe, ibha hẹi wẹ, ranmhude ibha bha lẹn ọne ẹghe nan rẹyi.
34 Inian ọ diabe okpea nọn kpanọ ha khian agbaẹbho ọbhebhe, nọn mun uwa nọnsọle ọbhi obọ ọsi igbọn nesọle. Ọle da gha ẹsọn kẹkẹ nin ele, yẹ taman ọnọn khẹ odẹ nọn wo ha khẹ odẹ.
35 Bhiriọ, ibha wo ha babegbe, ranmhude, ibha bha lẹn ẹghe nin ọne ọwanlẹn nọn nyan uwa rẹ vade. Ibha bha lẹn si ọ dẹ vae sade ebi fẹkẹ ha lo, la bhi ọsasọn ogiziẹn, la sade ẹdẹ fẹkẹ ha we de,* la ọsewewiẹ bhibhi.
36 Beji a ha da miẹn, ẹghe nin ọle ha rẹ re osukpa vae, ọle bha dọ kere ghe ibha wẹ.
37 Ọkpakinọn, ebi imẹn taman ibha, ọle imẹn yẹ taman ọrebhe, ibha ha babegbe.”
