Matiu 1:1-25
1 Ebe nọn tẹmhọn okha* ọsi Jesu Kristi* nin ọmọn nọnsi Devid, nin ọmọn nọnsi Ebraham:
2 Ebraham da biẹ Aiziki;Aiziki da biẹ Jekọp;Jekọp da biẹ Juda bi ibhio ọle nin ikpea;
3 Juda da biẹ Pirẹz bi Zira; Tema biẹ ele nanlẹn.
Pirẹz da biẹ Hẹzrọn;Hẹzrọn da biẹ Ram;
4 Ram da biẹ Aminedab;Aminedab da biẹ Nashọn;Nashọn da biẹ Samọn;
5 Samọn da biẹ Boaz; Rehab biẹ ọle nanlẹn.
Boaz da biẹ Obẹd; Rut biẹ ọle nanlẹn.
Obẹd da biẹ Jesi;
6 Jesi da biẹ Devid nin ojie.
Devid da biẹ Solomọn; okhuo Uraya biẹ ọle nanlẹn.
7 Solomọn da biẹ Rehoboam;Rehoboam da biẹ Abaija;Abaija da biẹ Esa;
8 Esa da biẹ Jehoshafat;Jehoshafat da biẹ Jehoram;Jehoram da biẹ Uzaya;
9 Uzaya da biẹ Jotam;Jotam da biẹ Ehaz;Ehaz da biẹ Hẹzẹkaya;
10 Hẹzẹkaya da biẹ Manasẹ;Manasẹ da biẹ Emọn;Emọn da biẹ Josaya;
11 Josaya da biẹ Jẹkonaya bi ibhio ọle nin ikpea bhi egbẹghe nan rẹ mun ibhokhan Izrẹl ha khian Babilọn.
12 A ki mun ibhokhan Izrẹl kpanọ ha khian otọ Babilọn fo, Jẹkonaya da biẹ Sheatiẹl;Sheatiẹl da biẹ Zẹrubabẹl;
13 Zẹrubabẹl da biẹ Abaiud;Abaiud da biẹ Ẹliakim;Ẹliakim da biẹ Ezọ;
14 Ezọ da biẹ Zedọk;Zedọk da biẹ Ekim;Ekim da biẹ Ilaiud;
15 Ilaiud da biẹ Ẹlieza;Ẹlieza da biẹ Matan;Matan da biẹ Jekọp;
16 Jekọp da biẹ Josẹf nin ọdọ Meri, nọn biẹ Jesu natiọle Kristi.
17 Ene ore rebhe, rẹ nabhi ẹghe ọsi Ebraham rẹ dọ sẹbhi ẹghe ọsi Devid, da ha yi ore igbenẹn; rẹ nabhi ẹghe ọsi Devid rẹ dọ sẹbhi ẹghe nan rẹ mun ibhokhan Izrẹl ha khian Babilọn, da ha yi ore igbenẹn; rẹ nabhi ẹghe nan rẹ mun ibhokhan Izrẹl ha khian Babilọn rẹ dọ sẹbhi ẹghe ọsi Kristi, da ha yi ore igbenẹn.
18 Ọnan hi ebe sunu ọkuẹsẹ a biẹ Jesu Kristi. Ẹghe nan rẹ ha muegbe nan rẹ re Meri nin Josẹf bhi amhẹn, a da kere ghe ahu ẹlinmhin nọn khiale re ọle ha hanmhan, ọkuẹsẹ ele bọ egbe.
19 Ọkpakinọn, ranmhude ọria esili Josẹf nin ọdọ ọle khin, ọle bha guanọ nin ọle re ọle bhi unun bhi ughe, bhiriọ, ọle da ha mhọnlẹn bhi ọkhọle ghe, ọle dẹ sọ ebe a bhi ẹkhokho.
20 Sokpan, ẹghe nin ọle ki rẹ ria ọne ẹmhọn nan fo, ẹhi nọnsi Jehova* da bu ọle re bhi ebhohiẹ, yẹ taman ọlẹn yọle: “Josẹf nin ọmọn nọnsi Devid, hẹi ji ofẹn mun uwẹ rẹ re Meri nin okhuo ẹ nabhi uwa. Ranmhude, ẹlinmhin nọn khiale, ọle re ọle ha hanmhan.
21 Ọle dẹ biẹ ọmokpea, sẹyẹ uwẹ ki hẹ ọle Jesu,* ranmhude, ọle dẹ miẹn ẹbho nesọle fan bhi olukhọ nọnsele.”
22 Ene emhin nan rebhe da gene sunu, beji a ha da miẹn ghe, ebi Jehova* na obọ akhasẹ nọnsọle ta ki munsẹ, nọn yọle:
23 “Ghọle! Ọne ọmanmhẹn nọn bha sẹ hẹgẹn dẹ ha hanmhan. Sẹyẹ, ọle ki biẹ ọmokpea. A ki ha tiọle Imanuẹ.” Ebi a re ọne elin ta hi, “Osẹnobulua ne mhan dia.”
24 Bhiriọ Josẹf da riọre bhi owe. Ọle da lu beji ẹhi nọnsi Jehova* taman ọlẹn, yẹ re okhuo ọle nabhi uwa.
25 Ọkpakinọn rẹ sẹbhi ẹghe nin Meri rẹ biẹ ọne ọmọn, ọle bha nanlẹn nowẹ, sẹyẹ, ọle da hẹ ọne ọmọn Jesu.
Eba gbẹn bho otọle
^ La “ulin-uwa.”
^ La “Jesu nin Mezaya.” “Ọnanzẹle,” ọle Kristi bi Mezaya mundia nan.
^ Bhi ọne Baibo nan, igba 237, ọle elin nọnsi Osẹnobulua “Jehova” zegbere bhi obọ Baibo nan re urolo Grik gbẹn. Enan hi ije ọhẹnhẹn nọn da zegbere. Fẹ Ebi A Gbẹn Ba Ọle Nọnzi A5.
^ Ọne elin nan hi Jeshua la Joshua bhi urolo Hibru. Ebi ọne elin mundia nan hi “Jehova Hi Ọnọn Miẹn Ọria Fan.”
