Ibhio mhan ne daan mhan:

Bhi ore nọnzi ihilọn a kuẹ biẹ iJesu, Ezekiel nin akhasẹ da miẹn imianlo ọkpa nọn han ọria ilo. Ọle da miẹn udede awẹnẹwẹnẹ bhi okhun. Osẹnobulua nọn kokhun nẹ, ole re ọne awẹnẹwẹnẹ khian. Ọnọn ki han ilo nẹ, ọle hi, uwedẹ nin ọne awẹnewẹnẹ rẹ khian. Iriọ ọ rẹ manman tua khian. Ọa rẹ ha denọ egbe diọ bhi ije ebhebhe, ọ ki sẹyẹ wo manman ha tua khian.​—⁠Ezek. 1:​4, 9, 12, 14, 16-27.

Ọne imianlo nan rẹman mhan ghe, agbotu ọsi Jehova nọn ribhi okhun imundia bhi ijian ọkpa. Ọnọn ribhi otọ kii? Ukpe ọsi iwẹnna oga nọn gbera, rẹman ghe Jehova gene re ahu nin ẹbho nesọle ne ribhi otọ rẹ manman ha wẹnna rẹ tuẹn oga nọnsọle okhun.

Bhi United States nin mhan ye, ibhio mhan ne bunbun ne wẹnna bhi Bẹtẹl nọn khua nọn ribhi Brooklyn kpanọ sibhi enin re diọ bhi ọnan la bọn bhi Warwick, New York. Eso yẹ diọ bhi Bẹtẹl ebhebhe. Eso da yẹ kpanọ a khian olele nin ele dọ deba ibhio mhan nekẹle ha tẹmhọn Osẹnobulua. Ene wẹnna bhi Bẹtẹl kẹkẹ bhi agbaẹbho nekẹle yẹ manman miẹnsọn. Eso bọn iBẹtẹl ọsọgbọn, eso bọn ba iBẹtẹl nin ele ye, eso bhi ẹwẹ ele sẹyẹ sibhi eji ele rẹ ka ha ye re ha khian iBẹtẹl ọsọgbọn. Uwẹ kii? Arẹmiẹn uwẹ bha gene kpanọ bhi eji uwẹ ye diọ bhi ije ebhebhe, mhan lẹnmhin ghe uwẹ wo manman miẹnsọn bhi uwedẹ ebhebhe.

Ọ wo manman re Otu Ne Sun Oga ghọnghọn nin ele rẹ daghe uwedẹ nin ẹbho nesi Osẹnobulua bhi ọne agbọn nan rebhe rẹ wẹnna rẹkhan agbotu nọnsi Jehova. Ene bunbun kpanọ diọ bhi eji a da manman guanọ urẹkpa bhi itẹmhọn Osẹnobulua. Eso da dọ deba ha tẹmhọn Osẹnobulua man ẹbho ne zẹ urolo ọbhebhe. Eso da yẹ ha lu iwẹnna itẹmhọn Osẹnobulua bhi uwedẹ ọgbọn. Ene bunbun da yẹ lu emhin esili ebhebhe nin ele rẹ lu gbera eka nin ele ka lu khẹ. Ibhio mhan rebhe, rẹsẹbhi ene ki wanre bi ene egbe bha dan, wo dọnmhegbe bhi unẹ ọsi aribhọ nin ele ru. Ele wo wẹnna kaka bhi oga nọnsi Jehova. Bhiriọ, ele rẹman ghe ọbha ohoghe nọn khua, ọle Esu khin.​—⁠1 Cor. 9:⁠24.

Bha lẹn ghe uwedẹ nin bha rẹ mun okhọle ọbhọ rẹ wẹnna nin Jehova, wo ti Jehova bhọ. (Heb. 6:10) Uwedẹ nin bha rẹ zegbere rẹ wẹnna, rẹ mhan ye Abraham bi Sarah re. Ẹghe nin Abraham bha sẹ rẹ sẹbhi ikpe 80, ọle da ne azagba-uwa nọnsọle kpanọ bhi ẹbho natiọle Ur. Ọle da ne ele ha khian ije manman ree, natiọle Canaan. Bhi enin, ọle da ha nyẹnlẹn bhi ibọkpọ rẹsẹbhi ukpẹdẹ uu nọnsọle. Ọkhọ nanrẹ zegbere, ọle Abraham bi okhuo ọle wo ha rẹman!​—⁠Gen. 11:31; Acts 7:​2, 3.

 Uwẹ rẹman ghe uwẹ mhọn ọkhọle nọn dia iriọ? Mhan rebhe ne ziẹngbe ọkakale bhi ẹghe nin mhan ye nan wo lu ebi Jesu yọle nin mhan ha lu. Ọ da yọle: ‘Bha ha khian dọ tẹmhọn Agbejele man ọrebhe bhi agbaẹbho rebhe. Gbe ele ruẹ bhi amẹn bhi elin ọsi Aba bi ọsi Ọmọn bi ọsi ahu ẹlinmhin nọn khiale.’​—⁠Matt. 28:⁠19.

Nin Jesu rẹ yọle ‘bha ha khian,’ ọle da rẹman ghe ọkhẹke nin mhan ha sasa bhi oga. Ọ wo ti mhan bhọ rẹ daghe emhin ne bunbun nin bha lu bhi agbotu bhi ukpe ọsi iwẹnna oga nọn gbera. Ọ wo khia bhi ẹlo a ghe, obọ nọnsi Jehova wo ribhi ọne iwẹnna itẹmhọn Agbejele nan lu nanbhi otọ agbọn nan rebhe.​—⁠Mark 13:⁠10.

Ẹbho ne bunbun ki wo kaehọ. Ọle zẹle nin ene tẹmhọn Osẹnobulua bhi ukpe nọn gbera da ha yi 8,340,847. Ẹbho nan man ele iBaibo bhi uki-uki da ha yi 10,115,264. Ọnan rẹman ghe beji ọne awẹnẹwẹnẹ nọn ribhi okhun rẹ tua khian, iriọ ibha yẹ rẹ tua rẹkhan ọlẹn! Ọkuẹsẹ ẹghe nin Jehova re ọbhọ nọn rẹ miẹn ẹbho ọbhi egbe sotọ, bha hẹi ji egbe lọ bha bhi ọne iwẹnna esili nan nin bha lu.

Emhin esili nọn ghe uhọnmhọn-ọta ọsi ukpe 2017 yọle: ‘Mun udu nyan iJehova yẹ ha lu emhin nọn mhẹn’! (Ps. 37:⁠3) Bha a ha re obọ rẹkhan ọne adia nan, yẹ ha lu emhin nọn mhẹn bhi oga nọnsi Jehova, bha ki rẹman ghe ibha mun udu nọnsẹbha nyan iJehova. Wowo, bha ha mhọn ọlẹn bhi ọkhọle ghe ọiyi bha ọkpa khian. Ẹmhọn nin Jesu tale ifidenọ. Ọ da yọle: ‘Ghọle! Mhẹn ri bha bhi ikeke bhi ikpẹdẹ rebhe rẹsẹbhi ẹghe ọkpẹnlẹn ọsi ọne agbọn nan.’​—⁠Matt. 28:⁠20.

Bha hẹi yelea ghe Jehova dẹ wo ha nan erọnmhọn nin bha bhi oga nin bha re ọkhọle rebhe re nanlẹn. Eka nọn irẹakhin nin uwẹ sabọ lu nin Jehova, ọkhọle nin uwẹ rẹ lu ọle hi emhin nin Jehova ghe. Ene emhin rebhe nin mhan lu nanlẹn wo manman ti ọle bhọ. Ọle ki yẹ ha re ẹlo nọn mhẹn rẹ ghe mhan. (2 Cor. 9:​6, 7) Bhiriọ, bha ha nan erọnmhọn, ha luẹ iBaibo, ha yọ ikolo oga bi itẹmhọn Osẹnobulua ẹghe rebhe. Ene emhin nan rebhe bha ha lu nin bha rẹ manman ha sikẹ Aba bha nọn mhọn ahoẹmhọn-egbe.

Bhi ọne ‘obhi ẹghe khere’ nọn ki kẹ Esu re, ọle wo re ọkhọle ọbe nọnsọle rẹ lu emhin rebhe nin ọle rẹ sua mhan fia bhi oga bi urẹọbhọ nin mhan mhọn da iJehova. (Rev. 12:12) Bha ha sikẹ iJehova, obọ ọsi Esu ida sẹ bha bhi egbe. (Ps. 16:⁠8) Bha wowo, bha lẹn ghe mhan manman hoẹmhọn bha. Emhin rebhe nin bha lu nin bha rẹ rẹkpa bhi iwẹnna Agbejele bhi ẹghe ọkpẹnlẹn nan, wo ti mhan bhọ.

Ibhio bha,

Otu Ne Sun Oga ọsi Esali Jehova