Re Egbe Khọkhọ IJesu, Ha Yi . . .
ỌRIA NỌN MHỌN ẸKẸ-ẸJẸJẸ
Ranmhude ọria nọn gbale iJesu ha khin, ọle bha miẹn ọbalọ ne bunbun nin eria ne bunbun bhi ọne agbọn nan miẹn bhi egbe. Ọrẹyiriọ, ọle da wo ha mhọn itohan da ẹbho. Ọle da wo muegbe nin ọle rẹ rẹkpa ele. Ọle bhọ da rẹkpa ele gbera beji ele mun ọkhọle ọi. Ẹkẹ-ẹjẹjẹ nin Jesu ha mhọnlẹn, ọle re ọle ha rẹkpa ẹbho.
ỌRIA NIN ẸBHO SABỌ SIKẸ
Ẹbho rebhe sabọ ha sikẹ iJesu, ranmhude ọle ihianbhegbe la tẹngbemun. Ofẹn bha ha mun ẹbho rẹ sikẹ Jesu, ranmhude, ele lẹnmhin ghe ẹmhọn ele rẹtẹ ọle.
ỌRIA NỌN MANMAN NAN ERỌNMHỌN
Ẹghe rebhe iJesu rẹ ha nan erọnmhọn ji Aba ọle. Ẹgheso, ọle ọkpa ki nan erọnmhọn. Ẹghe ebhebhe, ọle ki deba edibo nesọle nan erọnmhọn. Ọ iyi ebale ọkpa ọle ha nan erọnmhọn ọi. Ọle yẹ wo ha nan erọnmhọn bhi ẹghe ebhebhe. Ọle wo ha nan erọnmhọn rẹ khuẹnmhẹn Jehova. Ọle da yẹ ha nan erọnmhọn rẹ gẹn ọlẹn. Sẹyẹ, ọkuẹsẹ ọle zẹ emhin nin ọle ho nin ọle lu, ọle ki ka nan erọnmhọn rẹ guanọ adia bhi obọ Aba ọle.
ỌRIA NỌN RIA ẸMHỌN ẸBHO NEKẸLE
Jesu wo ha mun ẹmhọn eria ebhebhe kalo gbera ẹmhọn egbe ọle. Bhi ọsi ijiẹmhin, bhi ẹghe nọn rẹ khẹke nin ọle rẹ koahua yẹ re egbe re ahoho, ọle da sẹyẹ muegbe nin ọle rẹ rẹkpa ẹbho. Ọle bha ha mhọn ọkhọle ọsi “ọsegbemẹn ọkpa.” Ọkhẹke nin mhan re egbe khọkhọ ijiẹmhin nọnsọle.
ỌRIA NỌN RẸHUNMHAN
Jesu wo ha taman ẹbho ghe ọkhẹke nin ele ha rẹhunmhan ibo ele. Ọkpakinọn, ọ iyi unun ọkpa iJesu gheghe rẹ ha tale. Ọle da yẹ re ijiẹmhin esili man bhi uwedẹ nin ọle rẹ ha rẹhunmhan edibo nesọle bi ẹbho ebhebhe.
ỌRIA NỌN MHỌN ỌHUBHUDU
Ene akhasẹ ka tale ghe ibhokhan iJew ne bunbun ida miẹn ọne Ọmiẹnmhanfan ọbhi egbe. Ele da yẹ yọle ghe, eso bhi ẹwẹ ibhokhan iJew bhọ dẹ gbe ọle a. Ọrẹyiriọ, Jesu da sẹyẹ re ọhubhudu ha taman ibhokhan iJew ẹmhọn oga ẹmhọanta. Ijiẹmhin esili nin ọle re ọbhi otọ dẹ rẹkpa ene rẹkhan ọlẹn rẹ sẹyẹ re ọhubhudu ha tẹmhọn Osẹnobulua, aharẹmiẹn ẹbho bha ka ele ehọ, la ẹbho kpokpo ele.
ỌRIA NỌN MHỌN IDEGBERE
Ranmhude ọria nọn gbale iJesu khin, ọle mhẹn gbera ẹria nekẹle ne ribhi ọne agbọn nan. Ọle lẹn emhin nẹ ele, yẹ mhọn ẹwanlẹn nẹ ele. Ọle yẹ wo nẹ ele. Egbe wo gba nanlẹn. Ọrẹyiriọ, Jesu da re idegbere ha ga ẹbho nekẹle.
ỌRIA NỌN MHỌN IZIẸNGBE
Ẹghe rebhe iJesu rẹ ha re iziẹngbe man bhi egbe edibo nesọle bi ẹbho nekẹle, manman nọn, sade ene ẹbho bha re obọ rẹkhan ẹmhọn nin ọle tale la ijiẹmhin nin ọle rẹman. Ọle da re iziẹngbe bi ifuẹkẹ rẹ kie man ele emhin nin ọle ka man ele le, beji ele ha da sabọ sikẹ iJehova.