Be Imẹn Ha Rẹ Sabọ Ha Yi Ọmọẹ Osẹnobulua Yẹ?
UHỌNMHỌN-ỌTA NỌNZI 35
Be Imẹn Ha Rẹ Sabọ Ha Yi Ọmọẹ Osẹnobulua Yẹ?
Ọkakale nin Jeremy miẹn bhi egbe, da re ọle lẹn ebi ọ lu uhọnmhọn-emhin sẹyẹ nan rẹ deba Osẹnobulua ha lu ọmọẹ. Ọle da yọle: “Ẹghe nin mẹn rẹ ha ribhi ikpe 12, aba mẹn da zẹ azagba-uwa nọnsẹmhan obọ. Mẹn ki ribhi uke ibẹdi ọsasọn ọkpa, mẹn da nan erọnmhọn ji Osẹnobulua. Mẹn da taman ọlẹn nin ọle lu ọle nin aba mẹn da fikie vae bhi uwa.”
Bhi ẹkẹ ọne idia nan, Jeremy da munhẹn ha tie Baibo. Ẹghe nin ọle ki rẹ tie ẹmhọn nọn ribhi Psalm 10:14, ọ da wo rẹso ọle. Ọne ulọnlẹn nin da yọle ghe, ene imhọn urẹkpa bi ene imhọn aba, Jehova, ọle rẹkpa ele. Jeremy da yọle: “Ọ da diabe Jehova taman mẹn yọle ghe ọle hi aba mẹn, ghe, ọle dẹ rẹkpa mẹn. Aba nọn mhẹn nẹ ọnan iribhọ.”
AHARẸMIẸN ghe idia nọnsi uwẹ bha diabe ọsi Jeremy, Baibo yọle ghe Jehova guanọ nin uwẹ ha yi ọmọẹ nọnsọle. Bhi ọsi ẹmhọanta, Baibo da yọle: “Sikẹ Osẹnobulua, ọle ki yẹ sikẹ ẹ.” (James 4:8) Be uwẹ ghe ọne ẹmhọn nan yẹ? Arẹmiẹn ghe uwẹ isabọ daghe Osẹnobulua, sẹyẹ uwẹ bi ọle iyi otu bhi emhin soso, ọle da yọle nin uwẹ dọ kiẹn ọmọẹ nọnsọle.
Ọkpakinọn, nin uwẹ rẹ sabọ deba Osẹnobulua ha lu ọmọẹ, uwẹ dẹ miẹnsọn bhọ. Bhi ọsi ijiẹmhin: Ji a yọle ghe uwẹ kọ aroro bhi uwa nọnsẹ. Nọn da sabọ wanre, uwẹ dẹ kọ ọlẹ ọbhi eji ọ ha da sabọ lu nọnsẹn, yẹ ha sa amẹn khakha le. Uwẹ bha da lu iriọ, ọ ida wanre. Iriọ ikolu nin mhan bi Jehova ko mhọnlẹn yẹ dia. Be uwẹ ha sabọ lu nin ọne ikolu da ha ziẹn ọbhọ?
Baibo Nan Luẹ Manman Lu Uhọnmhọn-emhin
Ahamiẹn mhan ne ọria lu ọmọẹ, mhan dẹ ha ka ọle ehọ, yẹ nanlẹn talọ. Iriọ ikolu nin mhan bi Jehova ko mhọnlẹn yẹ dia. Baibo nin mhan tiẹ, ọle hi uwedẹ nin Jehova rẹ ne imhan talọ.—Psalm 1:2, 3.
Bhi ọsi ẹmhọanta, asabọmiẹn ghe, ọ iti uwẹ bhọ rẹ ha luẹ ebe. Ọ manman ti usẹn ne bunbun bhọ rẹ ha ghe TV, gbe igemu, la re ẹnẹ ji imọẹ ele. Sokpan, ahamiẹn uwẹ guanọ nin uwẹ ha yi ọmọẹ nọnsi Osẹnobulua, uwẹ dẹ lu emhin nin ọle yọle nin uwẹ lu. Uwẹ dẹ ha ka ọle ehọ beji uwẹ ha rẹ ha tie iBaibo.
Hẹi kpokpo egbe, Baibo nan luẹ iyi ihẹ. Baibo nan tie dẹ sabọ ha ti uwẹ bhọ, aharẹmiẹn ọ imanman ti uwẹ bhọ rẹ ha luẹ ebe. Emhin ọhẹnhẹn nọn khẹke nin uwẹ lu hi, nin uwẹ rẹ mhanmhan ẹghe ọbhi otọ nin uwẹ ha rẹ ha luẹ iBaibo. Obhokhan ọmanmhẹn ọkpa natiọle Lais da yọle: “Mẹn mhọn emhanmhan nin mẹn rẹ tie iBaibo. Emhin ọhẹnhẹn nin mẹn ka lu sade mẹn riọ bhi owe ọsewewiẹ hi, mẹn ki tie uhọnmhọnlẹn ọkpa bhi Baibo. Obhokhan ọmanmhẹn ọbhebhe ribhọ natiọle Maria. Ikpe 15 ọle khin. Ọle da yọle: “Ọkuẹsẹ mẹn nọwẹ ọsasọn, mẹn ki fẹkẹ tie iBaibo khere.”
Nin uwẹ rẹ mun iluẹmhin Baibo nọnsẹ hẹn, fẹ ọne ẹkpẹti nọn mhọn uhọnmhọn-ọta nọn yọle: “ ebi uwẹ ha rẹ ha luẹ iBaibo yẹ.” Bhi otọle, gbẹn eka ẹghe nin uwẹ ha sabọ noo rẹ luẹ iBaibo ọbhọ. Ọ sabọ rẹ ha yi ihuẹnlo 30 la eka ẹghe nọn yẹẹ uwẹ.
․․․․․
Uwẹ ha rẹ mhanmhan ẹghe fo, yẹ munhẹn ha tie iBaibo fo, uwẹ sabọ dọ kere ghe, obọ eso ribhọ nọn bha lẹkhẹ nan rẹ tie. Uwẹ sabọ dọ kere ghe, ẹmhọanta usẹn obhokhan ọkpa natiọle Jezreel tale. Ọle da yọle: “Ijeso ribhi Baibo nọn bha lẹkhẹ nan rẹ lẹn otọle.” Ahamiẹn iriọ uwẹ yẹ riale le, hẹi ji egbe lọ uwẹ. Ha ghe ẹghe nin uwẹ rẹ tie iBaibo bii ẹghe nin uwẹ rẹ ha ka Osẹnobulua nin ọmọẹ nọnsẹ ehọ. Obọ nọnsẹ ọ ye nin uwẹ rẹ lu emhin rebhe nọn khẹke, nin Baibo nan tie da manman ha ti uwẹ bhọ!
Emhin Kpataki Erọnmhọn Khin
Erọnmhọn nin mhan nan, ọle mhan rẹ ne iJehova talọ. Isẹhoa nin Jehova re nin mhan rẹ ha nan erọnmhọn ji ọle, ẹsele nọn khua nọn! Uwẹ dẹ sabọ ha ne iJehova talọ bhi ẹghe nọn hi ki rẹ khin. Ọle wo muegbe nin ọle rẹ ka uwẹ ehọ. Rẹ deba ọnin, ọle guanọ nin ọle họn ebi uwẹ ha taman ọlẹn. Ọle zẹle nin Baibo da taman mhan yọle: “Bhi emhin rebhe, bha ha re erọnmhọn, ubhiimhin bi ekhuẹnmhẹn rẹ taman Osẹnobulua ebi bha guanọ.”—Philippians 4:6.
Beji Baibo nin mhan tiele rẹman, emhin ne bunbun ribhọ nin mhan ha sabọ taman iJehova bhi erọnmhọn. Mhan dẹ sabọ taman ọlẹn emhin ne kpokpo mhan. Uwẹ dẹ yẹ sabọ khuẹnmhẹn ọlẹn bhi emhin nin ọle sẹ lu nin uwẹ. Ahamiẹn ọmọẹ ẹ lu emhin nin uwẹ, uwẹ ibe khuẹnmhẹn ọlẹn? Bhiriọ, ọ yẹ khẹke nin uwẹ ha khuẹnmhẹn iJehova bhi ekutu emhin nin ọle lu nin uwẹ. Ọria ọbhebhe iribhọ nọn ha sabọ lu emhin nin Jehova sẹ lu nin uwẹ.—Psalm 106:1.
Gbẹn ọbhi otọle emhin eso nin Jehova sẹ lu nin uwẹ.
․․․․․
Edandan iribhọ ghe, ofẹn dẹ sabọ ha mun mhan ẹgheso. Mhan dẹ yẹ sabọ ha mhọn emhin ne kpokpo mhan bhi ọkhọle. Ọkpakinọn, ebe nọnsi Psalm 55:22 da taman mhan yọle: “Mun ihẹ nọnsẹ fi nin Jehova, ọle dẹ rẹkpa ẹ. Ọle ida ji ọria nọn khiale da dere ghẹdẹ.”
Gbẹn ọbhi otọle emhin nọn hi ki rẹ khin nọn kpokpo uwẹ bhi ọkhọle, nin uwẹ guanọ nin uwẹ taman iJehova bhi erọnmhọn.
․․․․․
Emhin Ne Sẹ Sunu Ji Uwẹ bhi Iẹnlẹn
Ahamiẹn uwẹ guanọ nin ikolu nin uwẹ bi Jehova ko mhọnlẹn ha ziẹn ọbhọ, emhin ọbhebhe ribhọ nọn khẹke nin uwẹ lu. Bhi Baibo, David da gbẹn yọle: “Dọnmhẹn iJehova fẹghe nin uwẹ daghe ghe ọle mhẹnmhin.” (Psalm 34:8) David wo la miẹn okhẹnan fo bhi egbẹghe nin ọle rẹ gbẹn ẹmhọn ne ribhi uhọnmhọnlẹn nọnzi 34 bhi ebe nọnsi Psalm. Ọle da ha nẹ bhi otọ bi okhun ranmhude Saul nin Ojie da ha guanọ nin ọle gbe ọle a. Bhi ọne ẹghe nan nian, ọle da dọ rẹko bhi ẹwẹ ibhokhan iPhilistines ne yi eghian ọle. Ẹghe nin ele ki rẹ lẹn ọria nin ọle khin, yẹ ha guanọ nin ele gbe ọle, ọle da man ha lu bii ọmhẹnmhẹn. Iriọ ọle rẹ sabọ miuhọnmhọn.—1 Samuel 21:10-15.
David bha riale ghe ẹwanlẹn nọnsọle ọle rẹ sabọ miuhọnmhọn. Ọkpakinọn, ọle da re ekhuẹnmhẹn ji Jehova. Bhi ebe nọnsi Psalm, David da gbẹn yọle: “Mẹn da bhii Jehova, ọle da wanniẹn mẹn. Ọle da hinmhin mẹn bhi emhin rebhe ne ha re ofẹn mun mẹn.” (Psalm 34:4) Ranmhude uwedẹ nin Jehova rẹ hinmhin ọle tobọle, ọle zẹle nin David da sabọ yọle nin mhan ‘dọnmhẹn iJehova fẹghe nin mhan daghe ghe ọle mhẹnmhin.’
Emhin be ribhọ nọn sẹ sunu bhi iẹnlẹn nọnsẹ nọn rẹman uwẹ ghe, Jehova gene hoẹmhọn uwẹ? Ahamiẹn iriọ, gbẹn ele ọbhi otọle. Emhin nọn ha rẹkpa uwẹ: Ọ iyi okpemhin nọn sunu ji uwẹ ọkpa uwẹ ha sabọ gbẹn ọbhọ. Ria ẹmhọn ikuẹkuẹ emhin nin Jehova lu nin uwẹ ukpẹdẹ-ukpẹdẹ. Ọ sabọ ha yi emhin nin uwẹ re ẹlo gbe a ẹgheso.
․․․․․
Asabọmiẹn ene biẹ ẹ man uwẹ ẹmhọanta nọn ribhi Baibo. Emhin esili ele wo lu nin uwẹ riọ. Ọrẹyiriọ, ọkhẹke nin uwẹ tobuwẹ deba Jehova ha mhọn ikolu. Ahamiẹn uwẹ bha sẹ lu iriọ, ẹmhọn nin mhan zilo ọle bhi ọne uhọnmhọn-ọta nan dẹ sabọ rẹkpa uwẹ. Uwẹ ha dọnmhegbe rẹ lu ọnan, Jehova dẹ nan erọnmhọn nin uwẹ. Baibo da yọle: “Ha bhii, a ki re nin uwẹ; ha guanọ, uwẹ ki miẹn.”—Matthew 7:7.
EBI UWẸ HA LUẸ BHI UHỌNMHỌN-ỌTA NỌN RẸKHAN ỌLẸN Ọ be nọghọ uwẹ rẹ ne ẹbho zilo ẹmhọn Osẹnobulua? Luẹ ebi uwẹ ha rẹ sabọ taman ẹbho emhin nin uwẹ rẹọ i yẹ.
KEY SCRIPTURE
“Eghọnghọn hi ọsi ẹbho ne lẹn ghe ọkhẹke nin ele khu ọbhi emhin oriọn.”—Matthew 5:3.
EMHIN NỌN HA RẸKPA UWẸ
Ha tie apapa-ebe enẹn bhi Baibo ukpẹdẹ-ukpẹdẹ. Ọnan dẹ rẹkpa uwẹ rẹ tie iBaibo rebhe fo bhi ẹkẹ ukpe ọkpa.
UWẸ BE RẸ LẸN . . .?
Ọne ebe nan nin uwẹ tie, bi uwedẹ nin uwẹ rẹ re obọ rẹkhan adia nọn ribhi ẹkẹ ọle rẹman ghe Jehova guanọ nin ọle si uwẹ kẹ egbe—John 6:44.
EBI MẸN HA LU!
Nin mẹn rẹ manman miẹn elele bhi Baibo nan luẹ, mẹn dẹ ․․․․․
Nin mẹn rẹ sabọ ha nan erọnmhọn ẹghe rebhe, mẹn dẹ ․․․․․
Ebi mẹn ho nin mẹn nọọn ene biẹ mẹn le rẹji ọne uhọnmhọn-ota nan ․․․․․
BE UWẸ RIALE YẸ?
● Be uwẹ ha lu nin uwẹ da manman ha sọnyẹnmhẹn bhi Baibo nan luẹ?
● Bezẹle nin Jehova da kaehọ erọnmhọn nọnsẹmhan arẹmiẹn ghe ọ bha gba nin mhan?
● Be uwẹ ha lu nin uwẹ da sabọ ha nan erọnmhọn nọnsẹn?
[Ẹkpẹti]
Ẹghe nin mẹn rẹ ha yi obhokhan, mẹn ha nan erọnmhọn, ebi mẹn ka ta mẹn yẹ wo ta. Bhi ejayenan nian, emhin ne sunu bhi ukpẹdẹ, ọle mẹn rẹ nan erọnmhọn. Ọnan wo rẹkpa mẹn nin mẹn hẹi ha ta emhin nin mẹn ka ta, beji a miẹn ghe ukpẹdẹ rebhe iyi ọkpa.”—Eve
[Ẹkpẹti/Adudu]
Ebi uwẹ ha rẹ ha luẹ iBaibo yẹ
1. Zẹ eji uwẹ guanọ nin uwẹ tie. Bhii Jehova nọn rẹkpa uwẹ rẹ lẹn otọle.
2. Gbẹlokotọ tie ọle nọnsẹn. Hẹi tua tie ọle. Beji uwẹ ha rẹ ha tie ọle, ha re ọkhọle nọnsẹ muno emhin nan tẹmhọn ọlẹn. Ha re ọkhọle nọnsẹ ria ẹmhọn ẹbho nan tẹmhọn ọlẹn, ebi ele rẹ talọ yẹ, emhin nin ele lu, ebi eji ele yẹ dia yẹ, bi emhin nekẹle nan tẹmhọn ọlẹn bhi ọne okha. Ọnan ki re ọne okha diabe emhin nọn sunu bhi isira uwẹ.
3. Uwẹ ha tie ọle fo, ria ẹmhọn emhin nin uwẹ tiele. Nọọn egbe ẹ inọnta bọsi:
● Bezẹle nin Jehova da ji ọne okha nan ha ribhi ẹkẹ Baibo?
● Bhi ẹwẹ eria nin mẹn tie okha nọnsele, hela ọkhẹke nin mẹn re egbe khọkhọ? Hela ọkhẹke nin mẹn rẹban uwedẹ nin ele rẹ lu emhin?
● Emhin nela mẹn miẹn luẹ bhi eji mẹn tiele?
● Be ọne okha nan man mẹn le rẹji Jehova bi uwedẹ nin ọle rẹ lu emhin?
4. Nan erọnmhọn ji Jehova. Taman ọlẹn emhin nin uwẹ luẹle bhi eji uwẹ tiele bhi Baibo, bi ebi uwẹ guanọ nin uwẹ rẹ noo ọle yẹ bhi iẹnlẹn nọnsẹ. Hẹi yelea rẹ khuẹnmhẹn ọlẹn bhi Baibo nin ọle rẹ lu ẹsele nin uwẹ!
[Adudu]
“Orukpa ọta nọnsẹ khin rẹji ukpoẹ nọnsẹmhẹn, ẹfua nin mẹn rẹ daghe uwedẹ nọn.”—Psalm 119:105.
[Ẹkpẹti/Adudu]
Ota nin elasẹre nọọn
Be imẹn ha rẹ sabọ ha yi ọmọẹ Osẹnobulua yẹ? Be imẹn ha rẹ sabọ ha yi ọmọẹ Osẹnobulua yẹ?
Lu ọne emhin nan ghe: Re bọkẹti, uwẹ ha ne udede udo ọbhi ẹkẹ ọle. Uwẹ ha ne ene udo ọbhọ fo, biri ekẹn nyan ele, uwẹ ha re ọne ekẹn vuọn ọne ibọkẹti.
Ejayenan nian, biri ọne ekẹn bi ene udo sibhi ọne ibọkẹti re. Ka zẹ ọne ekẹn ọbhi ọne ibọkẹti, uwẹ kuẹ ne ene udo ọbhi ẹkẹ ọle. Uwẹ ki kere ghe ene udo rebhe bha yẹ sabọ nabhi ọne bọkẹti. Bezẹle? Ranmhude, ekẹn uwẹ ka zẹ ọbhi ọne ibọkẹti.
Be imhan miẹn luẹ bhi ọne arẹkhọkhọ nan? Baibo da taman mhan yọle: “Bha manman tobọbha lẹn emhin ne kiẹn okpemhin nẹ.” (Philippians 1:10) Ahamiẹn ghe emhin ne bha manman lu uhọnmhọn-emhin, bọsi iregbe re ahoho, ele uwẹ mun kalo, uwẹ ida miẹn ẹghe rẹ lu emhin ne lu uhọnmhọn-emhin nẹ bhi iẹnlẹn nọnsẹ, emhin bọsi ilọnmhọn oga. Sokpan, uwẹ ha lu rẹkhan ebi Baibo tale, uwẹ ki kere ghe uwẹ dẹ miẹn ẹghe rẹ lu ilọnmhọn oga nọnsẹn yẹ re egbe re ahoho beji ọ khẹke. Ọ dẹ fo uwẹ sade uwẹ mun emhin ne lu uhọnmhọn-emhin nẹ kalo.
[Adudu]
Beji mhan rẹ miẹnsọn bhọ nin aroro nin mhan kọ da sabọ wanre, iriọ ọ yẹ khẹke nin mhan ha khu ọbhọ nin ikolu nin mhan bi Jehova ko mhọnlẹn da ha ziẹn ọbhọ
