ỌRIA ribhọ nọn ha sẹyẹ sun rẹkhan Osẹnobulua sade iẹnlẹn nọnsọle ribhi okhẹnan, la nọn ha sẹyẹ sun rẹkhan Osẹnobulua sade ọle lẹn ghe emhin esili ida nabhọre? Ọne inọnta zegbere bhi emhin nọn sunu ji Job, uwedẹ nin Job rẹ lu emhin yẹ re ewanniẹn ọbhi ọne inọnta nan.

Obhio Abraham Job ha khin, ulin uwa ọkpa ele na vae. Ẹghe nin ibhokhan Izrẹl rẹ ha nyẹnlẹn bhi otọ Egypt, ọle da ha nyẹnlẹn bhi eji a ki tiọle Arabia nian. Bhi ọne ẹghe nan, ene ẹhi rebhe da si egbe koko bhi odalo nọnsi Osẹnobulua bhi okhun, Esu da yẹ ha ribhi enin. Jehova da taman ene ẹhi ghe, Job manman ghan bhi ẹlo nọnsọle ranmhude uwedẹ nin ọle rẹ mun oga mhọn nọnsẹn. Bhi ọsi ẹmhọanta, Jehova da yọle ghe, ọria soso iribhọ nọn mun oga mhọn nọnsẹn bii Job. Ọkpakinọn, Esu da yọle ghe, ranmhude Osẹnobulua nan erọnmhọn nin Job yẹ gbega ọle, ọle zẹle nin Job da ha ga Osẹnobulua. Esu da yẹ yọle ghe, a ha miẹn Job emhin rebhe nin ọle mhọnlẹn, ọle ki ghunmhun Osẹnobulua.

Osẹnobulua da re otọ nin Esu rẹ miẹn Job ẹfe, miẹn ọle imọn, yẹ mun emianmhẹn gbe ọle. Job bha lẹn ghe Esu si ọkakale bi oya nin ọle ye, bhiriọ, ọle bha lẹn ebezẹle nin ene emhin nan da ha sunu ji ọle. Ọrẹyiriọ, Job bha fikeke gbe Osẹnobulua.

Ikolu ea ne imhẹn da rẹnẹ ji Job. A gbẹn ọta nin ele tale ọbhi uhọnmhọnlẹn eso bhi ebe nọnsi Job. Ele da taman Job ghe, Osẹnobulua re oya nanlẹn ranmhude emhin ebe nin ọle lu bhi ẹkhokho. Ele bhọ da yẹ yọle ghe Osẹnobulua bha hoẹmhọn eria ne ga ọle, sẹyẹ ọle bha gbaẹkẹ ele. Job bha re ehọ bhi ọta nọn bha gba nin ele ha ta. Job da wo taman ele ghe, ọle dẹ sun rẹkhan Jehova rẹ dọ sẹbhi ukpẹdẹ uu nọnsọle!

Ọkpakinọn, Job da dobọ, ọle da wo manman ha dọnmhegbe nin ọle rẹ rẹman ghe ọle khiamhin. Ele ki sẹ talọ, usẹn okpea ọkpa natiọle Elihu nọn ha ka ele ehọ da munhẹn nin ele ha zilo. Elihu da rẹkpa Job rẹ lẹn ghe, ebi ọle ha rẹ kpe elin nọnsi Jehova khia yẹ, ọle emhin nọn khẹke nin ọle mun kalo, ọ iyi nin ọle rẹ mun ẹmhọn egbe ọle kalo. Sẹyẹ, Elihu bha rẹhe nin imọẹ Job, ọle da ji ele lẹn ghe ọta nin ele ta bha gba.

Jehova da nin Job zilo, Ọle da rẹkpa ọle rẹ fi iria-eria nọnsọle denọ. Jehova da noo emhin kẹkẹ nan manlẹn rẹ rẹkpa Job rẹ lẹn ghe eria bha si emhin soso bhi eji ọle nin Osẹnobulua ye. Job da degbere miẹn adia nọnsi Osẹnobulua ọbhi egbe. Ranmhude Jehova “manman mhọn ẹkẹ-ẹjẹjẹ bi itohan,” ọle da re egbe daan Job, ọle re ẹfe nanlẹn gbera ọnikhẹ, ọle da yẹ re imọn igbe nanlẹn. (James 5:11) Nin Job rẹ mun oga mhọn nọnsẹn arẹmiẹn ọle miẹn edọnmhẹn nọn manman kaka, ọle da rẹman ghe ohoghe Esu bha beji ọle yọle ghe, ọria soso iribho nọn ha sun rẹkhan Osẹnobulua sade ọle miẹn edọnmhẹn.

—Ebe ọsi Job a da re ọne uhọnmhọn-ọta nan.