Rẹkpa ene uwẹ ne talọ rẹ tobele fẹ egbe ele ghe. Nọọn ene uwẹ ne talọ inọnta nọn ha rẹkpa ele rẹ fẹ ebi emhin gene dia ele yẹ bhi egbe.

Ji ene uwẹ ne talọ lẹn ghe, uwẹ lẹnmhin ele muegbe nin ele rẹ lu emhin esili. Taman ene uwẹ ne talọ nin ele fẹghe ebezẹle nin ele da lu iwẹnna esili. Rẹkpa ele rẹ lẹn emhin ne khẹke nin ele ha mhọn bhi ọkhọle, nọn ha manman re ele ha lu emhin ne mhẹn, ọnin hi, oyẹẹ nin ele mhọn da iJehova, oyẹẹ nin ele mhọn da eria, bi oyẹẹ nin ele mhọn da iman-emhin ne ribhi Baibo. Rẹkpa ele rẹ daghe ẹwanlẹn nọn ribhi ebi Baibo tale. Hẹi ha ne ele talọ bọsi ikuẹkuẹ ibhokhan. Nin uwẹ ha rẹ ha re unun gbe ele, ji ọta nọnsẹ mun ele udu zeze, nin ele manman kie ha mhọn ọtibhọ rẹ ha lu emhin ne khẹke.

Denọ ele ẹlo bu iJehova. Ji ene uwẹ ne talọ lẹn ebi iman-emhin, adia bi uhi ne ribhi Baibo rẹ re ikpẹ nesi Osẹnobulua man yẹ, bi oyẹẹ nin ọle mhọn da mhan. Rẹkpa ele rẹ hoẹmhọn iJehova. Ọnan ki re ele ha ria ẹmhọn ebi emhin dia iJehova yẹ bhi egbe, bhiriọ, ele ki ha guanọ nin ele ha lu emhin ne ti ọle bhọ.