Noo arẹkhọkhọ ne lẹkhẹ. Re egbe khọkhọ iJesu bhi uwedẹ nin uwẹ ha rẹ ha noo arẹkhọkhọ. Noo emhin nin ẹbho lẹn rẹ man ele ẹmhọanta nin uwẹ ho nin ele lẹn. Noo emhin ne lẹkhẹ rẹ re otọ emhin ne bha lẹkhẹ man nọnsẹn. Hẹi ha gbe okha ne bha diẹn ọbọ mun emhin soso bhi ebi uwẹ man. Ji emhin kẹkẹ ne ribhi arẹkhọkhọ nin uwẹ noo gene diẹn obọ mun emhin nin uwẹ man, ranmhude, ahamiẹn emhin eso ribhọ ọne arẹkhọkhọ ne bha rẹkhan odẹ, ele dẹ sabọ re emhin zughu a bhi ẹlo ọṣi ene uwẹ ne talo.

Ha mhọn eria nin uwẹ ha ne talọ bhi ọkhọle. Guanọ emhin nin uwẹ ha rẹ lu arẹkhọkhọ bhi ẹwẹ emhin nin ẹbho nin uwẹ ha ne talọ lu, bi emhin ne ti ele bhọ. Hẹi ji arẹkhọkhọ nin uwẹ ha noo rahiẹ ene uwẹ ne talọ la re ẹkhọ ha lu ele.

Re ọle man emhin kpataki. Noo arẹkhọkhọ rẹ man emhin kpataki ne ribhi ọne ọta, ọiyi ikuẹkuẹ emhin ne ribhọ. Jamiẹn ghe, ene uwẹ ne talọ yere emhin nin uwẹ re ọne arẹkhọkhọ man, ọiyi ọne arẹkhọkhọ ele ha gheghe yere.