“Ọkhẹke bha ha yi ene man emhin.” (Heb. 5:12) Riale! Jehova—Ọria nọn guẹ iman-emhin nẹ bhi otọ bi okhun—tie mhan nin mhan ha man ẹbho ẹmhọn ọle! Ekpẹn nọn manman ti mhan bhọ, ọle iJehova re ọle mun mhan bhi egbe, nin ọle rẹ re ọne isẹhoa nin mhan rẹ ha man ẹbho ẹmhọanta nọnsọle, ọ ha rẹ ha yi bhi ẹkẹ azagba-uwa nọnsẹmhan, la bhi ẹkẹ agbotu, la bhi inẹbho, la eji ọ hi rẹ khin. Sẹyẹ, ẹsọn nin mhan ha mun-ọle-ẹgba nọn. Be imhan ha rẹ sabọ lu ọle ye?

Mhan dẹ miẹn ewanniẹn rẹji ọne inọnta nin bhi ẹkẹ ebe nin Paul gbẹn ji Timothy. Paul da yọle: “Ọkuẹsẹ mẹn vae, ha mun egbe ọbhi ebe nan tie bhi ogbakha, izebhudu nan re nin ẹbho, iman-emhin.” Deba ọnin, Paul da sẹyẹ yọle: “Ranmhude, uwẹ da ha lu iriọ, uwẹ ki miẹn egbe ẹ bi ene ka uwẹ ehọ fan.” (1 Tim. 4:13, 16) Uhọnmhunje nọn ha re iẹnlẹn nin ẹbho, ọle uwẹ wewe khian. Ranmhude ọnin, ọkhẹke nin uwẹ ha lu re alo bhi uwedẹ nin uwẹ rẹ tie ebe bi uwedẹ nin uwẹ rẹ man emhin. Ọne ebe nan dẹ rẹkpa uwẹ rẹ lu ọnan. Fẹ emhin eso ne ribhi ẹkẹ ọle ghe:

Jehova hi ọman-emhin nọn kokhun nẹ. (Isa. 30:20) Beji ọne ebe nan ha rẹ ha rẹkpa uwẹ rẹ manman sabọ ha tie ebe yẹ man emhin, ha yere ghe, Jehova nyan ẹmhọn nin mhan taman ẹbho, ghe ọle yẹ rẹkpa ẹbho rẹ dọ ha ga ọle. (John 6:44) Bhiriọ, ha bhii Jehova nin ọle re ẹlinmhin nọn khiale nin uwẹ. Ha noo iBaibo ẹghe rebhe. Ha re ogẹn ji Jehova, ọiyi egbe ẹ. Ọkhẹke nin uwẹ ha man ẹbho nin uwẹ ne talọ ebi ele ha rẹ manman hoẹmhọn iJehova yẹ.

Ẹsọn nin ekpẹn ye, ọle a mun mhan bhi ọbo riọ—ẹsọn nọn re ogẹn ji Jehova. Mhan lẹn ghe, uwẹ ha mun udu nyan Osẹnobulua, uwẹ dẹ sabọ lu ọle.—1 Pet. 4:11.

Ene ibha koko man emhin,

Otu Nọn Sun Oga ọsi Esali Jehova