Ọnọghọ kẹkẹ dẹ vae si okhuo bi ọdọ koko muhẹn ha nyẹnlẹn kugbe. Uwedẹ nin bha rẹ ghe emhin bhi iẹnlẹn, la uwedẹ nin bha rẹ ria eria, bi ebi emhin dia bha bhi egbe yẹ kẹkẹ dẹ sabọ mun ọnọghọ re. Ọnọghọ yẹ nin olele vae. Ẹghẹso ebi abha mhanmhan ya, ki wo ri usukpa sunu.

Mhan sabọ rẹ ha ho nin mhan fikeke gbe ọnọghọ, okpa kinọn, iBaibo re ibhude mhan nin mhan ha khọn ọnọghọ nọn irẹ vae. (Matthew 5:23, 24) Ẹkẹ iBaibo uwẹ ada min adia nọn mhẹn fo nọn ha sabọ ri obọ kpa uwẹ bhi ọnọghọ nọnsẹ.

EBI BAIBO TALE: ‘Amiẹn ẹghe . . . nan rẹ talọ.’ (Ecclesiastes 3:1, 7) Bha ha re ẹghe bhi otọ rẹ tẹmhọn ọnọghọ nin bha mhọnlẹn. Gene ji ọdọ ẹ la okhuo ẹ lẹn ebuwẹ gene ria ọnin ẹmhọn yẹ. Bha ha ‘ta ẹmhọn-ata’ man egbe. (Ephesians 4:25) Arẹmiẹn ẹkẹle manman khọ ẹ, hẹi khọnlẹn. Uwẹ ha re ekpẹn re ewaniẹn bhi ọta, ẹmhọn nọn ha rẹ si okhọn re, ki ha yi ọta nan fẹkẹ ta.—Proverbs 15:4; 26:20.

Arẹmiẹn ebi okhuo ẹ la ọdọ ẹ tale bha yẹẹ ẹ, sẹyẹ ri ekpẹn nọnle talọ. Hẹi yelea rẹ ha mhọn ekpẹn bi ihọẹmhọn-egbe da ọdọ ẹ la okhuo ẹ. (Colossians 4:6) Bha ri ẹjẹje ha guanọ ebi bha ha khian ẹmhọn yẹ. Bha hẹi ne egbe lu eghian.—Ephesians 4:26.

EBI UWẸ HA LU:

• Bha ha re ẹghe bhi otọ rẹ tẹmhọn ọnọghọ nin bha mhọnlẹn

• Ẹghe nuwẹ arẹ ha kaehọ, ziengbe nuwẹ hẹi gbọta ọdọ ẹ la okhuo ẹ bhi unun. Ọdẹ sẹ uwẹ bhi egbe rẹ talọ

EBI BAIBO TALE: ‘Bha ha mhọn ẹkẹ agiẹgiẹ da egbe bha. Ha ki odalo bhi imun ekpẹn nin egbe.’ (Romans 12:10) Nanrẹ ha kaehọ nọnsẹn, uhọnmhọn emhin kpataki nọn. Dọnmhegbe nuwẹ lẹn ebi okhuo ẹ la ọdọ ẹ gene ghe emhin yẹ. ‘Aria-ji-egbe bi idegbere,’ ọle uwẹ arẹ lu ọnan. (1 Peter 3:8; James 1:19) Ọdọ ẹ la okhuo ẹ ha talọ, hẹi man ha lu ghe uwẹ kaehọ. Sade uwẹ sabọ re obọ sibhi ebi uwẹ lu re, lu iriọ, nuwẹ da sabọ kaehọ nọnsẹn. Sade uwẹ ida sabọ kaehọ, ranmhude ebi uwẹ lu, nọọn ọdọ ẹ la okhuo ẹ si bha dẹ sabọ talọ sade azẹbue. Ha ghe ọdọ ẹ la okhuo ẹ bii ibolo nọnsẹ, ọiyi ọnọn nuwẹ suan. Uwẹ ha lu iriọ, ‘uwẹ ida kẹ ha min ohu.’—Ecclesiastes 7:9.

EBI UWẸ HA LU:

• Sẹyẹ ri ọkhọle nọnsẹ rebhe ha kaehọ, arẹmiẹn ọta nin ọdọ ẹ la okhuo ẹ ta bha yẹẹ ẹ

• Kaehọ ebi ọnin ọta mudia nan, ọiyi ọnọn ọta tobọle. Lẹn ebi ọdọ ẹ la okhuo ẹ ri egbe nọnsọle ha ta, bi urulu nọn rẹ ha tale

EBI BAIBO TALE: ‘Elele ribhi ẹsọn nọn kakale, ọkpa kinọn, eria ikpunun, ele obọ gbe.’ (Proverbs 14:23) Agheghe ta ebi bha da lu emhin yẹ bha sẹ, ọkhẹke nin bha lu rẹkhan ebi bha tale. Ọnan iyi emhin nọn lẹkhẹ, ọkpa kinọn ebe khẹke nan lu nọn. (Proverbs 10:4) Ibha ha koko ku obọ gbe ha wẹnna, bha ki miẹn ‘elele nọn mhẹn’ bhi iwẹnna nọnsẹ bha.—Ecclesiastes 4:9.

EBI UWẸ HA LU:

• Bha koko tale uwedẹ nin bha ha rẹkhan, nin bha da sabọ khọn ọnọghọ nọnsẹ bha

• Ẹghe resi ẹghe, bha ha fẹghe ebi obọ bha sẹ dale sẹyẹ