Imhan rebhe guanọ igho, nin mhan rẹ ri emhin nin azagba–uwa nọn sẹmhan guanọ nele. (Proverbs 30:8) Mhan lẹn ghe, igho zoya bhi egbe. (Ecclesiastes 7:12) Ọnọghọmhin ẹgheso nin ọdọ bi aamhẹn rẹ ha tẹmhọn igho. Ọkpa kinọn, bha hẹi ji ẹmhọn igho mun ọnọgho re bhi ibọdọ bi iriokhuo nọnsẹ bha. (Ephesians 4:32) Ọkhẹke nin ọkhuo bi ọdọ gba ẹkẹ-egbe, sẹyẹ ha wẹnna kugbe, sade ele tẹmhọn ebi ele ha rẹ noo igho yẹ.

EBI BAIBO TALE: ‘Ọria nea bhi ẹwẹ bha, nọn guanọ nọnle bun uwa igedege, nọn ida ka dotua fo lolọle fẹghe, si igho nọnsọle dẹ gbale, ọle kuẹ muhẹn?’ (Luke 14:28) Ọi khẹke nin bha kugbe mhanmhan ebi bha rẹ ha noo igho yẹ. (Amos 3:3) Bha ko tale ebi bha ha dẹ, bi eka nin bha ha sabọ noo. (Proverbs 31:16) Hẹi wọ gheghe adẹ ne ẹmhin ranmhude igho ribhọ. Dọnmhegbe nu hẹi luosa. Dẹ emhin beji igho ẹ sẹle.—Proverbs 21:5; 22:7.

EBI UWẸ HA LU:

• Igho ha kẹre sade uki gbale, bha ko ha zilo ebi bha da rọle lu

• Aha ki miẹn igho nọnsẹ bha bha sẹ, mhanmhan ebi bha arẹ de obọ re yẹ bhi ebi bha ha dẹ. Bhọsi ijiẹmhin, nin bha ha rẹ dẹ ebale nan nyẹn fo bhi ughe, bha ha nyẹn ọsẹbha bhi uwa

EBI BAIBO TALE: ‘Ha lu emhin rebhe bhi uwedẹ ẹmhọn-ata, bhi ẹlo nọnsi Jehova bi ẹlo nọnsi eria.’ (2 Corinthians 8:21) Ta ẹmhọn-ata man ọdọ ẹ la okhuo ẹ eka nuwẹ gene miẹn bi eka nuwẹ noo.

Ka ha nin okhuo ẹ la ọdọ ẹ zilo ọbhọ fo, ibha kuẹ ri igho lu emhin kpataki. (Proverbs 13:10) Ibha kugbe ha ta ẹmhọn igho, ọdẹ rẹkpa bha rẹ ha mhọn ọfure bhi ibọdọ bi iriokhuo nọnsẹ bha. Igho nuwẹ miẹn, ha ghọle bi igho nọnsi azagba-uwa nọnsẹ bha, ọiyi ọsẹ ọkpa.—1 Timothy 5:8.

EBI UWẸ HA LU:

• Bha koko tale eka nin ọdeọde ha sabọ tobọle noo, arẹmiẹn ọle bha rẹ taman ọnọn kẹle

• Bha hẹi ji ọnọghọ vae fo bha kuẹ ha ta emhọn igho