Arẹmiẹn bha manman dọnmhegbe nin azagba-uwa nọnsẹ bha rẹ a ghọnghọn, emhin idumhurẹ nọn re eghọnghọn kie bhi ẹkẹ azagba-uwa dẹ sabọ sunu. (Ecclesiastes 9:11) Imhan ha ribhi ọnọghọ, Osẹnobulua re obọ kpa mhan. Ebi enin ọnọghọ irẹ kaka yẹ, azagba-uwa nọnsẹ dẹ sabọ ziengbe ọle, sade ele re obọ rẹkhan uhi nọnsi Osẹnobulua ne ribhi ẹkẹ iBaibo.

EBI BAIBO TALE: ‘Mun ọnọghọ nọnsẹ rebhe nyan Jehova, ranmhude ọle gbẹloghe ẹ.’ (1 Peter 5:7) Ha yere ghe, ọiyi Osẹnobulua uwẹ ha ne gui bhi edọnmhẹn nọnsẹ. (James 1:13) Osẹnobula dẹ rẹkpa ẹ bhi uwedẹ nọn mhẹn nẹ, sade uwẹ sikẹ ọle. (Isaiah 41:10) ‘Ha viẹ oya nọn ri uwẹ bhi ọkhọle man iJehova.’—Psalm 62:8.

Uwẹ ha tie iBaibo ẹdẹdẹ, uwẹ dẹ yẹ miẹn ikoudure bhọ. Uwẹ dẹ kere ebi Jehova rẹ ri ‘ikoudure mhan yẹ bhi ẹghe edọnmhẹn.’ (2 Corinthians 1:3, 4; Romans 15:4) Osẹnobulua vive ghe, ọle dẹ re ‘ọfure nọnsọle nọn gbera ilẹn otọ emhin rebhe nuwẹ.’—Philippians 4:6, 7, 13.

EBI UWẸ HA LU:

• Ha bhii nin Jehova rẹkpa uwẹ rẹ ha mhọn ọkhọ nọn dere bi ẹwanlẹn nanrẹ ria eria nọnsẹn

• Fẹ emhanmhan nọnsẹ rebhe ghe nọnsẹn, uwẹ ha zẹ ọnọn mhẹn nẹn bhi ẹwẹ ele

EBI BAIBO TALE: ‘Ọkhọle ọsi ọnọn lẹn otọ emhin, ọle miẹn ilẹnmhin, ehọ ọsi ọnọn wanlan ọle guanọ nọn miẹn ilẹnmhin.’ (Proverbs 18:15) Guanọ ẹmhọn-ata. Lẹn emhin rebhe nin ọdeọde bhi ẹkẹ azagba-uwa nọnsẹ guanọ. Ha nele talọ. Uwẹ a yẹ ha ka ele ehọ.—Proverbs 20:5.

Ọria nuwẹ họẹmhọn lẹn ha ki yuu? Hẹi ji ofẹn mun uwẹ rẹ viẹ dagbare. Yere ghe Jesu tobọle sẹyẹ ‘gbe eviẹ a.’ (John 11:35; Ecclesiastes 3:4) Ha koahu a nọnsẹn, uwẹ yẹ ha wẹ sotọ. (Ecclesiastes 4:6) Ọnan dẹ rẹkpa ẹ nuwẹ rẹ ha ziengbe ọnọghọ nọnsẹ.

EBI UWẸ HA LU:

• Ọkuẹsẹ emhin idunmhure nọn si ọnọghọ sunu, ji ọle ha yi ebi uwẹ guẹle, nuwẹ rẹ ha nin azagba-uwa nọnsẹ zilo ẹghe-ẹghẹ. Bhiriọ, ele ki sabọ ne ẹ talọ sade ọnọghọ vae

• Nin ẹbho ne ka yẹ miẹn ọnọghọ nọn dia iriọ bhi egbe talọ

EBI BAIBO TALE: ‘Ọmọẹ ẹjẹje, ọle ri ahọẹmhọn-egbe man ẹghe rebhe, ọle obhio nan biẹ, nọn rẹkpa bhi ẹghe ọnọghọ.’ (Proverbs 17:17) Asabọ miẹn imọẹ ẹ guanọ ebe ele arẹ rẹkpaẹ yẹ, ele bha ki lẹn ebi ele ha lu. Taman ele ebi uwẹ gene guanọ. (Proverbs 12:25) Sẹyẹ guanọ urẹkpa ọsi oriọn bhi obọ ọsi eria ne lẹn otọ iBaibo. Ibhude nele ha rẹ niẹn bhi ẹkẹ iBaibo dẹ rẹkpa ẹ.—James 5:14.

Uwẹ ha nin ene mhọn urẹọbhọ da Osẹnobulua bi ive nesọle mun obọ, uwẹ dẹ miẹn urẹkpa nuwẹ guanọ. Uwẹ dẹ yẹ miẹn ikoudure sade uwẹ ri izebhudu nin ene guanọ ọlẹn. Ha man ẹbho urẹọbhọ nuwẹ mhọn da iJehova bi ive nesọle. Hẹi wo dotọa. Ha rẹkpa ẹbho ne guanọ urẹkpa, hẹi ha si egbe kie bhi ẹwẹ ẹbho ne họẹmhọn ẹn, ne yẹ mhọn emhọn ẹn bhi ọkhọle.—Proverbs 18:1; 1 Corinthians 15:58.

EBI UWẸ HA LU:

• Nin ọmọẹ nọn manman sike ẹ talọ. Ji ọle da rẹkpa ẹ

• Emhin nin uwẹ gene guanọ uwẹ ha taman lẹn