Osẹnobulua nin Jehova *, ọle kui okpea bi okhuo nin ọhẹnhẹn kugbe. IBaibo taman mhan ghe, Osẹnobulua man okhuo nin ọhẹnhẹn ‘ọda re ọle ji ọnin okpea.’ Adamu ghọnghọn sẹ, ọda yọle: ‘Ọsha vae, uguẹ mhẹn bi efun mhẹn khọnan.’ (Genesis 2:22, 23) IJehova sẹyẹ guanọ nin okhuo bi ọdọ ha ghọnghọn.

Uwẹ sabọ ha riale ghe, emhin rebhe dẹ dia nọnsẹn sade uwe bọdọ la uwẹ re okhuo. Bhọsi ẹmhọn-ata, okhuo bi ọdọ ne manman họẹmhọn egbe, de sẹyẹ ha mhọn ọnọghọ. (1 Corinthians 7:28) Bhi ẹkẹ ọnin ebe nan, uwẹ dẹ miẹn uhi kẹkẹ bhi ẹkẹ iBaibo. Uwẹ ha re obọ rẹkhanlẹn, ọki re eghọnghọn re bhi azagba-uwa nọnsẹ.—Psalm 19:8-11.

EBI BAIBO TALE: Ọdọ, ọle uhọnmhọn ọsi azagba uwa.—Ephesians 5:23.

Ahamiẹn ọdọ uwẹ khin, iJehova guanọ nin uwẹ ha ri ẹkẹ agiẹgiẹ gbeloghe okhuọ ẹ. (1 Peter 3:7) IJehova man okhuo nọn ha yi ọzeva ẹ, nọn ha rekpa ẹ. Ọlẹ guanọ nuwẹ ha ri obọ-ekpẹn bi ihọẹmhọn-egbe muọnlẹn. (Genesis 2:18) Okhẹke nuwẹ manman hoẹmhọn okhuo ẹ sẹbhi eji uwẹ ada ha mun ẹmhọnlẹn bi ebe yẹ ọle kalo gbera ọsẹ.—Ephesians 5:25-29.

Ahamiẹn aamhẹn uwẹ khin, iho nọnsi Jehova nọn, nuwẹ rẹ manman mun ekpẹn nọn dinmhin nin ọdọ ẹ, sẹyẹ ha rẹkpa ọdọ ẹ bhi esọn nọnsọle. (1 Corinthians 11:3; Ephesians 5:33) Ha re obọ bhi emhanmhan nọnsọle. Ri ọkhọle nonsẹ rebhe kugbe deba ọdọ ẹ. (Colossians 3:18) Uwẹ ha lu iriọ, uwẹ ki manman ha mhọnse bhi ẹlo nọnsi ọdọ ẹ bi Jehova.—1 Peter 3:1-6.

EBI UWẸ HA LU:

• Nọọn okhuo ẹ la ọdọ ẹ, ebi ọle guanọ nuwẹ lu, nuwe rẹ ha yi ọdọ nọn mhẹn, la okhuo nọn mhẹn. Bha ka egbe ẹhọ nọnsẹn. Bha lu ebi bha ha sabọ lu rebhe, nin bha rẹ manman ha mhẹn ọbhọ

• Bha ha mhọn iziengbe, ranmhude, ọdẹ re ẹghe, bha kuẹ guẹ ebi bha rẹ ha re egbe ghọnghọn yẹ

EBI BAIBO TALE: Ọkhẹke nuwẹ lẹn ebi okhuo ẹ la ọdọ ẹ guanọ nuwẹ lu nanlẹn. (Philippians 2:3, 4) Re obọ mun okhuo ẹ la ọdọ ẹ bii ebe ghanlẹn, uwẹ ha yere ghe iJehova guanọ nin ene gale rebhe ha mhọn ‘idegbere da ẹbho rebhe.’ (2 Timothy 2:24) ‘Ọkhọbhunu dia bi afi ọria ọpia, ọkpa kinọn, ọta nọn mhẹn bhi ehọ ọsi ọria nọn wanlan, ri egbe nọn daanlẹn re.’ Ranmhude ọnan, ha hannọ ọta nuwẹ ta nonsẹn. (Proverbs 12:18) IJehova dẹ ri ahu-ẹlinmhin nọn khiale nọnsọle rẹ rẹkpa ẹ, nuwẹ rẹ sabọ ri ihoẹmhọn-egbe bi ifuẹkẹle talọ.—Galatians 5:22, 23; Colossians 4:6.

EBI UWẸ HA LU:

• Ọkuẹsẹ uwẹ bi okhuo ẹ la odọ ẹ muhẹn ha zilo emhin kpataki, ọkhẹke nuwẹ bhii ji Jehova, nọn rekpa ẹ re ha mhọn ọkhọ non lọre, nuwẹ rẹ ka ehọ nọnsẹn

• Ha ria ọta fo ukuẹ talọ. Uwẹa sẹyẹ ria ebi uwẹ arẹ tale yẹ

EBI BAIBO TALE: Uwẹ ha bọdọ la uwẹ re okhuo, ibha veva ki dọ ha yi ‘efun-egbe ọkpa.’ (Matthew 19:5) Ọrẹ dia iriọ, ọria kẹkẹ bha sẹyẹ khin. Asabọ miẹn ibha ghe emhin bhi odẹ kẹkẹ ẹgheso. Ọnan zẹle nọn da khẹke nin bha ha luẹ ebi bha rẹ ha mhọn ọkhọ ọkpa bi iluemhin ọkpa yẹ. (Philippians 2:2) Okugbe, emhin kpataki nọn sade ibha mhanmhan emhanmhan. IBaibo tale: ‘Aha kugbe ria eria, ọle emhanmhan nan di odẹ re.’ (Proverbs 20:18) Bha ji adia ne ribhi Baibo ha dia bha, sade ibha zilo emhanmhan kpataki.—Proverbs 8:32, 33.

EBI UWẸ HA LU:

• Taman okhuo ẹ la ọdọ ẹ ebi emhin dia uwẹ yẹ bhi egbe. Ọiyi agheghe mhanmhan ebare lu emhin yẹ ọkpa

• Ji okhuo ẹ la ọdọ ẹ ha lẹn emhin fo ukuẹ ha luọle