OBỌ 9
Azagba-uwa—Bha Kugbe Ha Ga IJehova
‘Ha ga Ọnọn man otọ bi okhun.’ —Revelation 14:7
Beji mhan luẹ bhi ọnin ebe nan, iBaibo mhọn uhi ne bunbun nọn ha re obọ kpa uwẹ bi azagba-uwa nọnsẹ. Jehova guanọ nuwẹ ha ghọnghọn. Ọle vive ghe uwẹ ha mun oga nọnsọle kalo, ‘emhin nekẹle rebhe, ọle dẹ ne ba uwẹ le.’ (Matthew 6:33) IJehova guanọ nuwẹ a yi ọmọẹ ọle. Ha ri ẹghe nuwẹ mhọn rebhe rẹ mun ikolu nọnsẹ bi ọsi Jehova ziẹn bhọ. Emhin non kpọnọn nẹn nin ọria ha sabọ ha mhọn, ọle khọnan.—Matthew 22:37, 38.
1 HA MUN IKOLU NỌNSẸ BI ỌSI JEHOVA ZIẸN
EBI BAIBO TALE: ‘Jehova yọle ghe, imhẹn dẹ kiẹn aba nọnsẹ bha, ibha ki kiẹn imọn nesẹ mhẹn.’ (2 Corinthians 6:18) IJehova guanọ nuwẹ kiẹn ọmọẹ nọn manman sikẹ ọle. Erọnmhọn, ọle hi uwedẹ ọkpa nan rẹ lu ọnan. IJehova tie ẹ nuwẹ ha nan ‘erọnmhọn ji ọle ẹghe rebhe.’ (1 Thessalonians 5:17) Ọti Jehova bhọ nọn rẹ họn ọta nuwẹ ria bhi ọkhọ bi emhin nọn kpokpo ẹ. (Philippians 4:6) Uwẹ ha deba azagba-uwa nọnsẹ ha nan erọnmhọn, eki daghe ebi Jehova rẹ yi ọria ẹjẹje yẹ bhi ẹlo nọnsẹ.
Deba erọnmhọn nan nan, ọkhẹke nuwẹ yẹ ka iJehova ehọ. IBaibo bi ebe nan gbẹn dagbare bhi ẹkẹ iBaibo dẹ rẹkpa ẹ rẹ lu ọnan. (Psalm 1:1, 2) Ebi uwẹ luẹ, ha riale dinmhin. (Psalm 77:11, 12) Nanrẹ ha ka Osẹnobulua ehọ, ọyẹ khẹke nuwẹ rẹ ha yi ikolo oga ẹghe rebhe.—Psalm 122:1-4.
Nuwẹ rẹ ha ta ẹmhọn iJehova man ẹbho, uwedẹ ọbhebhe kpataki nọn nuwẹ rẹ ha mun ikolu nọnsẹ bi ọsi Jehova ziẹn. Uwẹa manman ha lu ọnan, uwẹ ki manman ha sikẹ ọle.—Matthew 28:19, 20.
EBI UWẸ HA LU:
-
Ha re ẹghe ọbhi otọ nuwẹ rẹ ha tie iBaibo sẹyẹ ha nan erọnmhọn ẹdẹdẹ
-
Bhi azagba-uwa nọnsẹ, ji oga nọnsi Jehova kalo nin iregbe re ahoho bi ikhiẹnlẹn
2 HA MHỌN ỌNYẸNMHẸN BHI OGA AZAGBA-UWA NỌNSẸ
EBI BAIBO TALE: ‘Sikẹ Osẹnobulua, ọle ki yẹ sikẹ uwẹ.’ (James 4:8) Ọkhẹke nuwẹ rẹ ha mhọn emhanmhan ọsi oga azagba-uwa. Ha re obọ rẹkhan ọnin emhanmhan nan ẹghe rebhe. (Genesis 18:19) Deba ọnin, bha ji Jehova ha ribhi iẹnlẹn nọnsẹ bha ẹdẹdẹ. Bha ha tẹmhọn Osẹnobulua ‘sade bha dotua bhi uwa, sade bha khian bhi uwedẹ, sade bha nowẹ, bi sade bha kpanọ.’ Ọnan dẹ re ikolu nin bha mhọn da ọle ziẹn. (Deuteronomy 6:6, 7) Ha khu ọbhọ nuwẹ rẹ diabi Joshua, nọn tale: ‘IJehova imhẹn bi azagba-uwa mhẹn da ga.’—Joshua 24:15.
EBI UWẸ HA LU:
-
Ha mhọn emhanmhan nuwẹ rẹkhan ẹghe-ẹghẹ, nuwẹ rẹ man azagba-uwa nọnsẹ emhin. Ji ebi bha ha luẹ rẹso ebi ọdeọde bhi azagba-uwa mhọn bhi ọkhọle
