MUNHẸN NE ỌRIA HA ZILO
ILUẸMHIN 2
Ne Ọria Zilo Bọsi Ọmọẹ
Ebi Baibo Ta Yẹ: “Ọ manman wo mhẹn sade ọria ta ọta bhi ẹghe nọn khẹke.”—Prov. 15:23.
Ijiẹmhin Ọsi Filip
1. Ghe ọne IVIDIO, la uwẹ ha tie Iwẹnna 8:30, 31. Uwẹ ha lu iriọ fo, re ewanniẹn ọbhi ene inọnta ne ribhi otọle.
Be Imhan Luẹ Bhi Obọ Filip?
2. Ahamiẹn mhan ka ne ọria zilo bọsi ọmọẹ, mhan kuẹ munhẹn ha tẹmhọn Osẹnobulua man ọlẹn, ọ dẹ sabọ rẹkpa ọle rẹ de ọkhọle re, yẹ muegbe rẹ re ehọ ọbhi ọne uhọnmhunje.
Ebi Mhan Ha Rẹ Re Egbe Khọkhọ Filip Yẹ
3. Gbẹlokotọ nin uwẹ daghe ebe sunu. Mhan dẹ sabọ lẹn emhin ne bunbun rẹji ọria sade mhan gbẹlokotọ bhi ebi ẹlo ọle diayẹ bhi uhọnmhọn, bi ebi ọle rẹ ha lu emhin yẹ. Dọnmhegbe rẹ lẹn si ọne ọria muegbe nin ọle rẹ ne uwẹ talọ. Uwẹ sabọ rẹ nọọn ọlẹn ọta bọsi, “Uwẹ be lẹn ghe . . . ?” rẹ munhẹn ha nanlẹn zilo bhi ẹkẹ Baibo. Ahamiẹn ghe, ọne ọria bha muegbe nin ọle rẹ ne uwẹ talọ, fẹkẹ zẹ ọle obọ.
4. Ha mhọn iziẹngbe. Ọ iyi oko ghe uwẹ dẹ re ẹjẹje taman ọria uhọnmhunje nọn ribhi ẹkẹ Baibo. Ọkhẹke nin uwẹ ziẹngbe khẹ ẹghe nin uwẹ ha rẹ sabọ ne ọne ọria zilo ẹmhọn Baibo bọsi ọmọẹ. A bhọ sabọ rẹ miẹn ghe, uwẹ dẹ mundia khẹ ẹdẹ ọbhebhe nin uwẹ ha kie ne ọne ọria talọ.
5. Fi ebi uwẹ rẹ mhanmhan nin uwẹ ta denọ. Ọne ọria nin uwẹ ne zilo sabọ rẹ munhẹn ha ta ẹmhọn nin uwẹ bha rẹ mun ọkhọle ọi. Bhi idia nọn sẹ iriọ, muegbe nin uwẹ rẹ ta ọta nọn ha diẹn mun idia nin ọne ọria ye, aharẹmiẹn ọ iyi ebe uwẹ rẹ ha mhọn bhi ọkhọle nin uwẹ rẹ ne ọne ọria zilo bhi Baibo.
YẸ FẸ ENE BAIBO NAN GHE
Eccl. 3:1, 7; 1 Kọr. 9:22; 2 Kọr. 2:17; Kol. 4:6
