AFIKIE YO
ILUẸMHIN 8
Ha Mhọn Iziẹngbe
Ebi Baibo Ta Yẹ: “Ọria nọn mhọn oyẹẹ ziẹngbe emhin.”—1 Kọr. 13:4.
Ijiẹmhin Ọsi Jesu
1. Ghe ọne IVIDIO, la uwẹ ha tie Jọni 7:3-5 bi 1 Kọrint 15:3, 4, 7. Uwẹ ha lu iriọ fo, re ewanniẹn ọbhi ene inọnta ne ribhi otọle.
Be Imhan Luẹ Bhi Obọ Jesu?
2. Ọkhẹke nin mhan ha mhọn iziẹngbe, ranmhude, ikpẹn-obọ rebhe iyi ọkpa. Ọ re ẹghe ọkuẹsẹ ẹbho eso fi ọkhọle denọ yẹ miẹn ọta nọnsi Osẹnobulua ọbhi egbe.
Ebi Mhan Ha Rẹ Re Egbe Khọkhọ Jesu Yẹ
3. Noo uwedẹ ọbhebhe. Ahamiẹn ọne ọria bha sẹ ji uwẹ da ha man ọlẹn Baibo, hẹi sua ọle ọbhọ. Bhi ẹghe nọn khẹke, noo ividio nesẹmhan, la ebe nesẹmhan rẹ rẹkpa ọle lẹn ebi mhan rẹ luẹ Baibo yẹ, bi elele nin ọle ha miẹn bhọ.
4. Hẹi re ọne ọria khọkhọ ọria ọbhebhe. Ẹbho rebhe iyi ọkpa. Ahamiẹn ọria bhi azagba-uwa nọnsẹ, la ọria ọbhebhe nin uwẹ tẹmhọn Osẹnobulua man siegbe re ikeke nin ọle rẹ deba ẹ luẹ Baibo, la nin ọle rẹ re obọ rẹkhan ebi ọle luẹ bhi Baibo, dọnmhegbe ria ẹmhọn ebezẹle nọn da dia iriọ. Asabọmiẹn emhin ribhọ nan man ọle le bhi otuẹ nin ọle re ọkhọle rebhe rẹọ ọi. La asabọmiẹn, ene ribhi azagba-uwa nọnsọle bi idiake nesọle kpokpo ọle. Re ẹghe nanlẹn rẹ ria eria nyan ebi uwẹ man ọle le bhi Baibo.
5. Tẹmhọn ọne ọria man Jehova bhi erọnmhọn. Bhii ọle nọn rẹkpa ẹ rẹ rẹọbhọ ghe, ọne ọria dẹ fidenọ, uwẹ ha yẹ bhii ọle nọn re ẹwanlẹn nin uwẹ rẹ ne ọne ọria lu emhin. Ahamiẹn ọne ọria bha rẹman ghe ebi ọle luẹ ti ọle bhọ, yẹ bhii Jehova nọn rẹkpa uwẹ rẹ lẹn ẹghe nọn rẹ khẹke nin uwẹ rẹ zẹ ọne ọria obọ fo.—1 Kọr. 9:26.
