Ẹbho ne ribhi Bẹtẹ wẹnna bhi ihe kikẹ nele rẹ gbẹloghe iwẹnna itẹmhọn Osẹnobulua bhi agba-ẹbho ọkpa la ene bun. Eso wẹnna bhi eji ada zedu ebe diọ bhi urolo ọbhebhe, eji ada ri masini rẹ gbẹn ebe dagbare, eji ada gban ebe kugbe, eje da mun ebe ya, bi eji ada ta ọta ọbhi uri. Ele yẹ gbẹloghe emhin ebhebhe nọn rẹsui oga bhi ọnin agba-ẹbho.

Ene sun Bẹtẹ gbẹloghe iwẹnna kikẹ. Obọ ọsi ewanlẹn eso ne manman sẹlo bhi emhin, ọle otu ne sun oga mun ugbẹloghe ọsi iwẹnna bhi Bẹtẹ nan. Ele atiọli Ene Sun IBẹtẹ. Enin otu nan, ele ji Otu Ne Sun Oga lẹn ebi iwẹnna rẹ khian yẹ, sade ọnọghọ dagbare bhi agbaẹbho nele gbẹloghe, ele ki yẹ ji ele lẹn. Ọnan Otu Ne Sun Oga rẹ lẹn ebi ele agbẹn dagbare bhi ebe nan tie bi ọta nele ata bhi ikolo oga la usikoko bhi ẹghe odalo. Aji ene mudia nin Otu Ne Sun Oga dọ ha fẹ Bẹtẹ kikẹ ghe, nele ha re adia nin Otu Ne Sun IBẹtẹ, nọn rẹkpa ele rẹ lu iwẹnna nele lu bhi enin. (Proverbs 11:14) Ene mudia nin Otu Ne Sun Oga nan, mhọn emhanmhan ọta nele rẹ ri izebhudu nin ẹbho ne ribhi otọ iBẹtẹ nan jie ele yo.

Iwẹnna nan lu bhi Bẹtẹ re urẹkpa nin agbotu. Ibhio mhan eso bhi Bẹtẹ ribhọ ne re obọ bhọ nanrẹ mun agbotu ọgbọn gbọ. Ele yẹ re obọ bhọ nanrẹ ri ibhio mhan nin ikpea kiẹn ewanlẹn la ene zẹ sike ewanlẹn bhi agbotu. Ibhio mhan bhi Bẹtẹ yẹ gbẹloghe iwẹnna ọsi otu ekanẹfan, ene tẹmhọn Osẹnobulua bhi agba-ẹbho ọbhebhe bi ene fẹotughe bhi agba-ẹbho non ọnin Bẹtẹ da gbẹloghe. Ele mhọn obọ bhi emhanmhan ọsi usikoko bi Kindọn Họọ ọgbọn nan bọn. Ele yẹ mhọn obọ nanrẹ ji ebe nan gbẹnlẹn diọ bhi agbotu kikẹ ne miẹn rẹ wẹnna. Iwẹnna kikẹ nan lu bhi Bẹtẹ zẹle nan da sabọ mun iwẹnna itẹmhọn Osẹnobulua sẹ nọnsẹn.—1 Corinthians 14:33, 40.

• Be Ene Sun IBẹtẹ rẹ rẹkpa Otu Ne Sun Oga yẹ?

• Iwẹnna bela alu bhi Bẹtẹ?