IBaibo tẹmhọn usun eva ne gbẹloghe agbotu—‘enin ewanlẹn bi ene zẹ sike ewanlẹn.’ (Philippians 1:1) Enin ibhio mhan nan gbẹloghe bhi agbotu ikikẹ. Be hi iwẹnna nin ene zẹ sike ewanlẹn lu bhi ẹkẹ agbotu?

Ele rẹkpa enin ewanlẹn bhi ẹkẹ agbotu. Ene wanre ribhi ẹwẹ ene zẹ sike ewanlẹn, eso yi elasẹre. Ẹbho ne mudia nọnsẹn bhi oga ele khin, ẹbho nan gba ẹkẹọle bi ene ri udu rebhe rẹ wẹnna. Ele rẹkpa lu iwẹnna eso nan lu bhi ẹkẹ agbotu. Ọnan rẹkpa ene ewanlẹn ne rẹ ha mhọn ẹghe rẹ ha lu iwẹnna iman-emhin iBaibo bhi ẹkẹ agbotu.

Ele ri obọ kpa. Bhi ẹwẹ ene zẹ sike enin ewanlẹn, eso ribhọ nan zẹle ne gbi ọbokhian nin ene vae bhi Kindọn Họọ. Eso wẹnna bhi isi ebarẹ talọ, eso bhi eji ada hẹ ebe nin ẹbho, eso gbẹloghe igho ọsi agbotu, eso bhọ man ẹbho eji ele ada ha tẹmhọn Osẹnobulua. Eso ribhọ ne gbẹloghe Kindọn Họọ. Enin ewanlẹn sabọ taman ele nele rẹkpa ene dọmalẹn. Nele rẹ ri ọkhọle rebhe rẹ lu iwẹnna nọn irẹ akhin, ọrebhe mun ekpẹn nele.—1 Timothy 3:13.

Ẹbho nan sabọ ri egbe khọkhọ bhi ẹkẹ agbotu ele khin. Are ele ọbhi ihe ọsi ene zẹ sike ewanlẹn ranmhude, ele rẹkpa ẹbho ziẹnlẹn bhi agbotu. Ele ri iwẹnna iman-emhin ne lu bhi ikolo oga rẹ mun urẹọbhọ ọsi mhan ziẹn. Nele rẹ mun ọkalo bhi itẹmhọn Osẹnobulua, ọnan rẹ mhan mhọn ọhubhudu. Nele rẹ wẹnna rẹkhan enin ewanlẹn, ọki ha ri eghọnghọn bi okugbe re bhi agbotu. (Ephesians 4:16) Ọ ha ki zẹbue, esabọ dọ sẹbhi ihe ọsi enin ewanlẹn.

• Eria nela ene zẹ sikẹ ewanlẹn khin?

• Uwedẹ nela ene zẹ sikẹ ewanlẹn rẹ rẹkpa ene ewanlẹn rẹ ri agbotu khian nọnsẹn yẹ?