Kindọn Họọ nọnsi Esali Jehova rebhe noo elin nọnsi Osẹnobulua. Ranmhude ọnin, mhan daghe ugbẹloghe nọnsi Kindọn Họọ bii oga kpataki nin mhan rẹji Jehova. Ọrebhe dẹ sabọ deba gbẹloghe ọle.

Zegbe re rẹ gbọnọ iKindọn Họọ sade a do ikolo fo. Ibhio mhan nin ikpea bi ikhuo re eghọnghọn rẹ gbọnọ Kindọn Họọ sade a do ikolo fo. Osukpa bhi uzana, ọle arẹ re ẹghe ọbhi otọ nanrẹ hẹnhẹn Kindọn Họọ. Ọkpa bhi ene ewanlẹn la ene zẹ sikẹ enin ewanlẹn, ọle rẹkhan emhanmhan nọn ribhi otọ nan rẹ gbẹloghe ọnin iwẹnna nan. Eso gbọnọ otọ, eso kpe otọ, eso hẹnhẹn aga, eso kpe eja da yo ikeke uwa, eso kpe windo, eso bi iku kua, eso gbẹn ilunmhun, iwẹnna kikẹ wọ ribhọ nan lu. Osukpa bhi ukpe, mhan re ẹghe ọbhi otọ nanrẹ manman hẹnhẹn iKindọn Họọ. Nin mhan rẹ ne imọn mhan ba egbe rẹ lu ọnin iwẹnna nan, mhan man ele ghe ọkhẹke nin mhan rẹ ha mun ekpẹn nin eji mhan da ga Osẹnobulua.—Ecclesiastes 5:1.

Zegbe dagbare rẹ hẹnhẹn iKindọn Họọ. Ukpu ukpe arẹ fẹ Kindọn Họọ ghe nan lẹn eba hẹnhẹn bhọ. Aha ki fẹ ọle ghe nan lẹn eba hẹnhẹn bhọ, aki jẹje lu ọle. Bhiriọ, mhan ida noo igho gbe. (2 Chronicles 24:13; 34:10) Bhi ẹkẹ iKindọn Họọ nọn mhọn-ose, nan hẹnhẹn nọnsẹn, ọle khẹke nan da ha ga iJehova. Mhan ha deba bhi ọnin iwẹnna nan, mhan ki rẹman ghe mhan mhọn emhọn nọnsi Jehova bi eji mhan da gale bhi ọkhọle. (Psalm 122:1) Ọnan yẹ rẹman eria nin mhan nyẹnlẹn sikẹ, ẹbho nin man khin.—2 Corinthians 6:3.

• Bezẹle nọn da khẹke nin mhan rẹ ha hẹnhẹn eji mhan da ga Osẹnobulua nọnsẹn?

• Emhanmhan nela ribhi otọ nin mhan rẹ ha hẹnhẹn iKindọn Họọ?