Bezẹle nin enin ẹbho nan da ghọnghọn? Ele wo jẹ. Usikoko ele ye. Bhi ẹghe nọn gbera, beji are taman ene ga Osẹnobulua ne ha sikoko bhi igba ea bhi ukpe, iriọ mhan rẹ yẹ guanọ nin mhan ha sikoko bhi usun nọn bun. (Deuteronomy 16:16) Usikoko ea mhan yo bhi ukpe: ukpẹdẹ ọkpa igba eva bhi ukpe, bi usikoko nọn nẹ ọsi ikpẹdẹ ea bhi ọsukpa bhi ukpe. Elele bea mhan miẹn bhi enin usikoko nan?

Ọrẹkpa mhan rẹ ha mhọn okugbe. Beji ibhi Izrẹl rẹha ghọnghọn bhi ogẹn nele rẹji Jehova bhi ‘usikoko,’ iriọ mhan yẹ rẹ sọnyẹnmhẹn bhi enin usikoko nan. (Psalm 26:12; 111:1) Enin usikoko nan ri isẹhoa mhan rẹ deba ibhio mhan ne nin ije ikẹkẹ vae muobọ. Bhi ọsodamhẹn, mhan mhọn ẹghe nanrẹ koahuaa rẹ ko le ebale, ghọnghọn kugbe. Ọnan rẹkpa mhan rẹha mhọn okugbe. (Acts 2:42) Enan mhan da manman daghe oyẹẹ nọn ku mhan gbe bhi otọ agbọn rebhe.—1 Peter 2:17.

Erẹkpa mhan rẹ khua okhun bhi ẹkẹ oga. Ibhi Izrẹl miẹn elele bhi Baibo nan taan otọ ọle man ele. (Nehemiah 8:8, 12) Mhan yẹ ghọnghọn bhi ebi mhan luẹ bhi usikoko nọnsẹ mhan. Ẹkẹ iBaibo eba luẹ bhọ da dagbare. Ọta ogbakha, urẹma bi ọta nan diẹnkugbe man rẹ luẹ ebi mhan rẹ ha lu iho nọnsi Osẹnobulua yẹ. Mhan ha họn okha ọsi ibhio mhan ne mun urẹọbhọ nọnsele mudia bhi ẹkẹ okpokpo, ọki ri izebhudu mhan yẹ rẹ ziengbe. Uremhinman ọsi okha nọn ribhi Baibo bhi usikoko nọn nẹ re ẹwanlẹn mhan. Enin usikoko nan re otọ nin ene ho ne rẹman ghe ele ho nele ga Osẹnobulua rẹ gbe egberuẹ bhi amẹn.

• Bezẹle nin usikoko da yi ẹghe eghọnghọn?

• Elele bea uwẹ ha miẹn bhọ sade uwẹ yo ẹnin usikoko nan?