Agbotu nọnsẹ mhan ihian igho bhi Baibo bi ebe nele gbẹn nele gha nin ẹbho. Mhan bọn iKindọn Họọ bi Bẹtẹ bhi ijian kikẹ, mhan yẹ gbẹloghe ele. Mhan ri urẹkpa nin ene wẹnna bhi Bẹtẹ bi ene tẹmhọn Osẹnobulua bhi agba-ẹbho ọbhebhe. Ọsabọ han uwẹ ilo: ‘Ji bha da min igho nin bha rẹ wẹnna?’

Mhan ihian oko igho nin ọria. Arẹmiẹn ghe ọiyi igho khere mhan rẹ lu ọnin iwẹnna itẹmhon Osẹnobulua nan, mhan ibhii igho. Ebe natiọle Watchtower nin mhan gbẹn bhi ikpe nọn gbera 100, tale ghe: ‘mhan rẹọbhọ ghe Jehova ribhi ikeke nọnsẹ mhan, ghe mhan ida bhii igho la bhii eria ne rẹkpa mhan’—mhan bha sẹ gene lu iriọ ghee!—Matthew 10:8.

Iri ọkhọ ọria zẹ mhan rẹ lu ọnin iwenna nan. Ọnin iwẹnna nin mhan rẹ luẹ ẹbho iBaibo yẹẹ ẹbho, ọle zẹle nele da ri obọ kpa mhan. Esali Jehova tobele ri eghọnghọn rẹ re ẹghe, ahu, igho bi emhin nekẹle rẹ ha tuẹn iho nọnsi Osẹnobulua okhun bhi ọnin otọ nan. (1 Chronicles 29:9) Ekpẹti nan re igho fiọ, ribhi ẹkẹ iKindọn Họọ bi eji ada do usikoko nin ẹbho re igho ọ sade ọghọn ele. Bhi ije ne bun bun, obọ ibhioguele ọnin igho da vae. Ele diabi ọnin okhuo nin ọdọ le yu nin Jesu tẹmhọnlẹn. Arẹmiẹn ọbha ha mhọn emhin soso, ọda ne ikpi igho eva nọnle ha mhọn bhi ẹkẹ ẹkpẹti nan ri igho ọ bhi uwa oga. (Luke 21:1-4) Bhiriọ, ọrebhe sabọ ‘ri ọkhọle nọnsọle rẹ ha re igho dagbare ẹghe rebhe.’—1 Corinthians 16:2; 2 Corinthians 9:7.

Mhan lẹnmhin ghe, Jehova wọ ha re obọ so ọkhọle nọnsi ẹbho ne ho nele re ebi le mhọn rẹ ha re ọghọ je ọle. Bhiriọ, iwẹnna nọnsọle ki ha tuẹn okhun, nin iho nọnsi Osẹnobulua munsẹ.—Proverbs 3:9.

• Bezẹle nin agbotu nọnsẹ mhan da dikẹ bhi otuẹ nekẹle?

• Be mhan rẹ noo ọnin igho nan ri ọkhọle rie re yẹ?