Emhin idunmhure ha sunun, Esali Jehova ki jẹje ri urẹkpa ji ibhio ele nọn sunu je. Urẹkpa nọn dia iriọ rẹman ghe mhan mhọn ahoẹmhọn-egbe ẹjẹje da ibhio mhan. (John 13:34, 35; 1 John 3:17, 18) Uwedẹ nela mhan rẹ rẹkpa ibhio mhan?

Mhan ri igho rẹ ri obọ kpa. Ẹghe nin ukhunmhun nọn khua rẹ ha fi bhi otọ nọnsi Judia bhi ore nọn gbera, iKristiẹn nea ribhi Antiọki da ri igho rẹ ri obọ kpa ibhio ele bhi oga ne ha ribhi enin. (Acts 11:27-30) Iriọ yẹ nọn ẹlẹnan nian, mhan ha lẹn ghe emhin sunu ji ibhio mhan bhi ẹbho ọbhebhe, mhan yẹ dọ ha ri urẹkpa nele.—2 Corinthians 8:13-15.

Mhan yẹ rẹkpa bhi uwedẹ ọbhebhe. Emhin idunmhure ha sunu, enin ewanlẹn ne ribhi agbotu ki ha khu ọbhọ nin ọrebhe rẹ miẹn uhọnmhọn. Usun ne mhanmhan urẹkpa ji enin emhin sunu je ki ne ebale, amẹn nan muọn, ukpọn, eji ele ha dia, bi urẹkpa rẹji enin egbe bha dan. Ibhio mhan ne mhọn iwẹnna obọ ki tobọ ele dagbare dọ rẹkpa enin ibhio mhan bun uwa la Kindọn Họọ nọn guọghọa. Ọkugbe bi ilẹnmhin nin mhan mhọn ranmhude mhan ko wẹnna kugbe, rẹkpa mhan rẹ jẹje re obọ kpa ibhio mhan nin emhin idunmhure sunu jie. Mhan yẹ rẹkpa eria nin ekẹle, otuẹ nele irẹ ha yo.—Galatians 6:10.

Mhan ri Baibo rẹ ri ikoudure nin eria. Eria nin emhin idunmhuri sunu je mobọ guanọ isudu. Bhi ẹghe nọn dia nian, mhan miẹn ahu bhi obọ iJehova, ‘Osẹnobulua ọsi ikoudure.’ (2 Corinthians 1:3, 4) Ọyẹẹ mhan nin mhan rẹ ha ri ive nọn ribhi Baibo rẹ ha rẹkpa eria ne ribhi ọnọghọ rẹ lẹn ghe, obhi ẹghe khere ki kẹrẹ nin Agbejele nọnsi Osẹnobulua rẹ dọ ri ọkpẹnlẹn ji emhin ebe rebhe ne re ọbalọ bi iloya re.—Revelation 21:4.

• Bezẹle nin Esali Jehova da jẹje re urẹkpa ji ẹbho nin emhin idunmhure sunu je?

• Ikoudure nela mhan sabọ re nin ene miẹn uhọnmhọn?