Obulu nuwẹ rẹ re ẹghe ọbhi otọ rẹ tie ọnin ebe nan, nuwẹ rẹ lẹn ẹbho nin Esali Jehova khin, iwẹnna nele lu bi ebi ele rẹ wẹnna yẹ. Mhan re ọkhọle bhọ ghe, ọnin ebe nan rẹkpa ẹ rẹ lẹn ghe Esali Jehova lu iho nọnsi Osẹnobulua ẹlẹnan. Mhan bhii ẹ nuwẹ hẹi zobọ bhi iluẹmhin nọnsi Osẹnobulua, nuwẹ taman azagba-uwa nọnsẹ bi ikolu nọnsẹ ebi uwẹ luẹle. Mhan yẹ bhii ẹ nuwẹ yẹ dọ ha deba mhan yo ikolo oga.—Hebrews 10:23-25.

Uwẹ a luẹ ẹmhọn Jehova, uwẹ ki dọ kere ghe ọlẹ gene hoẹmhọn ẹn. Ọki a yẹẹ ẹ nuwẹ yẹ rẹman lẹn ghe uwẹ hoẹmhọn lẹn. (1 John 4:8-10, 19) Be uwẹ a ki rẹ re ọnan man yẹ bhi iẹnlẹn nọnsẹ? Bezẹle nọn da yi ọmhẹn nọnsẹ nuwẹ rẹ ha re obọ rẹkhan uhi nọnsi Osẹnobulua? Be ha rẹkpa ẹ rẹ ha guanọ nuwẹ deba mhan ha lu iho nọnsi Osẹnobulua? Ọdẹ yẹẹ ọnọn man uwẹ Baibo rẹ deba ẹ guanọ ewaniẹn rẹji enin inọnta nan. Bhiriọ, uwẹ bi azagba-uwa nọnsẹ ki sabọ ‘deziẹn bhi ahoẹmhọn-egbe nọnsi Osẹnobulua, . . . nin bha da sabọ ha mhọn ikhuaẹloghe bhi iẹnlẹn ọsi ighegheghe.’—Jude 21.