ẸMHỌN ugbele, okhọnlẹn, bi ọkakale kẹkẹ, ele a ki kẹ wo họn bhi niuz. Uwẹ tobuwẹ bhọ mhọn ọkakale nin uwẹ ye. Asabọmiẹn ekhọnmhọn bha yẹ ji uwẹ da wọn amẹn re ukpu ọbhi otọ, la ọria nin uwẹ hoẹmhọnlẹn yu.

Nọọn egbe ẹ ene inọnta nan:

• Ọnan Osẹnobulua be guanọ nin mẹn bi azagba-uwa nọnsẹmhẹn?

• Ejela mẹn ha da miẹn urẹkpa rẹ khọn ọnọghọ nesẹmhẹn?

• Ọfure ọsaje dẹ be ha ribhọ ghee?

Baibo re ewanniẹn nọn gbale ọbhi ene inọnta nan.

• Ẹbho ida yẹ ha miẹn ọbalọ bhi egbe. Ele iyẹ da ha dọnmanlẹn, la yu.​—Revelation 21:4

• “Ene akhun ki ha san bii ẹruẹ.”​—Isaiah 35:6

• “Ẹlo ọsi ene ru ẹlo dẹ tuje a.”​—Isaiah 35:5

•  A dẹ riọ ẹbho ne yu kpanọ bhi idin.​—John 5:​28, 29

• Ọria soso iyẹ da ha khọnmhọn.​—Isaiah 33:24

• Ẹbho rebhe ne da ha nyẹnlẹn bhi ọne otọ nan dẹ miẹn ebale ne bunbun ha le.​—Psalm 72:16

Uwẹ sabọ rẹ ha riale ghe, emhin rebhe nan wo la tẹmhọnlẹn ida sabọ sunu. Ọkpakinọn, Osẹnobulua vele ghe, ẹghe nọn bha yẹ ree gbe nian, ọle dẹ mun ene ive nan rebhe sẹ bhi ọne otọ nan. Baibo ji mhan lẹn ebi Osẹnobulua ha rẹ mun ene ive nan sẹ yẹ.

Ọ iyi ọnan ọkpa Baibo tẹmhọnlẹn. Baibo yẹ ji mhan lẹn ebi mhan ha rẹ sabọ ha sọnyẹnmhẹn yẹ bhi iẹnlẹn bhi ejayenan nian. Ria ẹmhọn emhin eso ne ha sabọ re uwẹ ha kpokpo egbe. Ene emhin nan sabọ ha yi ẹmhọn igho, ẹmhọn azagba-uwa la emianmhẹn. A sabọ yẹ miẹn ghe, ọria nin uwẹ hoẹmhọnlẹn yu. Baibo dẹ sabọ rẹkpa uwẹ rẹ khọn ene ọnọghọ nan. Uwẹ dẹ yẹ sabọ miẹn ikoudure sade uwẹ miẹn ewanniẹn rẹji inọnta kpataki bhi ẹkẹ iBaibo. Inọnta bọsi:

• Bezẹle nin mhan da ha loya?

• Be imhan ha rẹ sabọ khọn ọnọghọ nesẹmhan yẹ?

• Azagba-uwa nọnsẹmhan dẹ be sabọ ha ghọnghọn?

• Be sunu ji ọria nọn yu?

• Mhan dẹ be yẹ miẹn ẹbho nesẹmhan ne yu?

• Bezẹle nin mhan ha da rẹọbhọ ghe, Osẹnobulua dẹ gene mun ive nesọle rebhe sẹ?

 Mhan lẹnmhin ghe, uwẹ guanọ nin uwẹ lẹn iman-emhin ne ribhi Baibo. Ọnan zẹle nin uwẹ da re ẹghe ọbhi otọ rẹ ha luẹ ọne ebe nan. Ọne ebe nan dẹ gene sabọ rẹkpa uwẹ rẹ lẹn ebi Baibo tale. Uduọle kẹkẹ mhọn inọnta ne ha sabọ re uwẹ lẹn otọ iBaibo nọnsẹn. Ọ wo yẹẹ ẹbho ne bunbun rẹ deba Esali Jehova ha luẹ iBaibo. Mhan rẹọbhọ ghe, ọ dẹ yẹ yẹẹ uwẹ rẹ deba Esali Jehova ha luẹ iBaibo. Mhan bhii nin Osẹnobulua nan erọnmhọn nin uwẹ, beji uwẹ ha rẹ ha luẹ ẹmhọanta ne ribhi Baibo!