1, 2. Họla ha sabọ gbega mhan ẹlẹnan?

JIA MAN yọle ghe, ẹdẹ ọkpa, uwẹ da ha khian bhi uwedẹ. Okhun da wo re isukpa hore. Okhun da ha hian ẹlo, avan da yẹ ha de. Ọ bha sẹ bue egbe, amẹn da munhẹn ha rọlọ, bhiriọ, uwẹ da ha guanọ eji uwẹ ha da nẹko. Be udu nọnsẹ ha diayẹ sade uwẹ miẹn eji uwẹ ha da nẹko? Ọ ki wo lọre.

² Idia nọn sẹnian mhan ye ẹlẹnan. Ọne agbọn nan wo kie manman ha khọ ọbhọ. Uwẹ sabọ ha riale, ‘Ejela imẹn ha da miẹn ugbega?’ Ebe nọnsi psalm yọle: “Imẹn dẹ taman iJehova yọle: ‘Uwẹ hi ugue nọnsẹmhẹn bi eji mẹn da nẹko, Osẹnobulua nọnsẹmhẹn nin mẹn mun udu nyan.’ ” (Psalm 91:2) Bhi ọsi ẹmhọanta, Jehova dẹ rẹkpa mhan rẹ ziẹngbe ọnọghọ kẹkẹ nin mhan miẹn ẹlẹnan. Ọle yẹ re ikhuaẹloghe nọn mhẹn nin mhan rẹji ẹghe odalo.

3. Be imhan ha lu nin Jehova da ha gbega mhan?

³ Be iJehova ha rẹ sabọ gbega mhan yẹ? Ọle dẹ sabọ rẹkpa mhan rẹ ziẹngbe ọnọghọ nin mhan hi ki rẹ ha ye. Jehova mhọn ahu nẹ ọria nọn hi ki rẹ khin nọn ho nọn kuan mhan. Aharẹmiẹn emhin ọbe sunu ji mhan ẹlẹnan, mhan mhọn ọne iruduba ghe, Jehova dẹ hẹnhẹn emhin nọnsẹn bhi ẹghe odalo. Baibo yọle ghe, nin mhan ha lu emhin ne ha re Osẹnobulua wo ha hoẹmhọn mhan. (Jude 21) Ọkhẹke nin mhan wo manman ha sikẹ iJehova, nin ọle da ha rẹkpa mhan bhi ẹghe ọkakale. Be imhan ha rẹ sabọ lu ọnan yẹ?

4, 5. Be iJehova rẹ rẹman yẹ ghe, ọle manman hoẹmhọn mhan?

⁴ Nin mhan rẹ sabọ sikẹ iJehova, ọkhẹke nin mhan lẹn ebi ọle hoẹmhọn mhan sẹ yẹ. Ria ẹmhọn emhin rebhe nin  Jehova sẹ lu nin mhan. Ọle da man otọ nọn mhọn-ose a nin mhan da ha nyẹnlẹn. Ọle da yẹ man eran bi elanmhan kẹkẹ bhi ọne otọ nan nin mhan. Ọle da yẹ ne ebale bi amẹn nin mhan. Jehova da ji mhan lẹn elin nọnsọle, bi ikpẹ esili nesọle bhi Baibo. Ọnọn ki sẹ ke okhun nẹ hi, ọle da ji Ukpọmọn ọkpa nọnsọle re nọn dọ yu nin mhan. (John 3:16) Ranmhude izọese nọnsi Jesu zẹle nin mhan da mhọn ikhuaẹloghe nọn mhẹn bhi ẹghe odalo.

⁵ Jehova mun Agbejele nọnsọle gbọ bhi okhun. Ọle dẹ kẹ re ọne Agbejele re ọkpẹnlẹn ọbhi iloya rebhe. Ọne Agbejele dẹ re ọne otọ nan kiẹn otọ ọfubhegbe​—eji ẹbho rebhe ha da ha nyẹnlẹn bhi ọfure bi eghọnghọn rẹ ha khian ighegheghe. (Psalm 37:29) Uwedẹ ọbhebhe nin Jehova rẹ rẹman ghe ọle hoẹmhọn mhan hi, ọle man mhan uwedẹ nọn mhẹn nẹ nin mhan ha rẹ ha nyẹnlẹn ẹlẹnan. Ọle yẹ ji mhan ha nan erọnmhọn ji ọle. Ọle yẹ muegbe nin ọle rẹ họn erọnmhọn nọnsẹmhan. Jehova wo gene re oyẹẹ nọnsọle man mhan.

6. Be uwẹ ha rẹ rẹman yẹ ghe, oyẹẹ nin Jehova mhọn da uwẹ ti uwẹ bhọ?

⁶ Be uwẹ ha rẹ rẹman yẹ ghe, oyẹẹ nin Jehova mhọn da uwẹ ti uwẹ bhọ? Ji ọle lẹn ghe, emhin rebhe nin ọle lu nin uwẹ ti uwẹ bhọ. Ọkpakinọn, emhin nin Jehova lu nin mhan iti ẹbho ne bunbun bhọ ẹlẹnan. Ọnan hi emhin nọn sunu bhi ẹghe nin Jesu rẹ ha ribhi ọne otọ nan. Ẹghe ọkpa ribhọ nin Jesu rẹ re egbe daan itue igbe ne ha khọnmhọn emianmhẹn egbekẹn. Ọkpakinọn, otuọnkpa bhi ẹwẹ ele vae dọ khuẹnmhẹn iJesu. (Luke 17:​12-17) Ọkhẹke nin mhan re egbe khọkhọ ọne okpea nọn vae dọ khuẹnmhẹn iJesu. Ọ yẹ khẹke nin mhan ha khuẹnmhẹn iJehova ẹghe rebhe.

7. Be imhan ha hoẹmhọn iJehova sẹ yẹ?

⁷ Ọ yẹ khẹke nin mhan ha rẹman iJehova ghe, mhan hoẹmhọn ọlẹn. Jesu da taman edibo nesọle ghe, nin ele re  udu rebhe, egbe rebhe, bi ọkhọle rebhe rẹ hoẹmhọn iJehova. (Tie Matthew 22:37.) Be bhọ a re ọnan ta?

8, 9. Be imhan ha rẹ rẹman yẹ ghe, mhan hoẹmhọn iJehova?

⁸ Nin mhan rẹ gheghe yọle ghe mhan hoẹmhọn iJehova bha sẹ. Mhan ha yọle ghe, mhan re udu rebhe, egbe rebhe, bi ọkhọle rebhe hoẹmhọn iJehova, mhan ki ha re ọle man bhi uwedẹ nin mhan rẹ lu emhin. (Matthew 7:​16-20) Baibo ji mhan lẹn ghe, nin mhan rẹ rẹman ghe mhan hoẹmhọn iJehova, mhan ki ha re obọ rẹkhan uhi nesọle. Uhi nesi Jehova be nọghọ gbe nan rẹ re obọ rẹkhan? Eye. “Uhi nesọle iyi ihẹ ne denyẹnyẹn ọria.”​—Tie 1 John 5:3.

⁹ Ahamiẹn mhan re obọ rẹkhan uhi nesi Jehova, mhan ki ha ghọnghọn bhi iẹnlẹn. (Isaiah 48:​17, 18) Ọkpakinọn, be ha rẹkpa mhan rẹ manman ha sikẹ iJehova? Bha ji mhan zilo nyan emhin eso ne ha re imhan ha sikẹ iJehova.

10. Bezẹle nọn da khẹke nin uwẹ ha luẹ ẹmhọn iJehova ẹghe rebhe?

¹⁰ Be uwẹ rẹ dọ kiẹn ọmọẹ iJehova yẹ? Baibo nin uwẹ luẹle rẹkpa ẹ rẹ dọ lẹn iJehova nọnsẹn, bhiriọ, uwẹ da dọ kiẹn ọmọẹ ọlẹn. Ikolu nin uwẹ bi Jehova ko mhọnlẹn, inian ọ diabe eranlẹn nin uwẹ bha ho nọn fun. Ahamiẹn uwẹ ne eran kpọn ba eranlẹn nan ka fie, ọ ki re ọne eranlẹn manman ha bhala. Iriọ yẹ nọn sade uwẹ manman ha luẹ ẹmhọn iJehova ẹghe rebhe. Ranmhude, ọnan dẹ re ikolu nin uwẹ bi ọle ko mhọn ha deziẹn ọbhọ.​—Proverbs 2:​1-5.

11. Be iman-emhin ne ribhi Baibo ha rẹ rẹso uwẹ yẹ?

¹¹ Ahamiẹn uwẹ manman ha luẹ iBaibo, uwẹ ki dọ luẹ emhin ne ha rẹso uwẹ bhi ọkhọle. Ọnan hi ebe sunu ji itue eva bhi edibo nesi Jesu bhi ẹghe nin ọle rẹ ha re otọ akhasẹ ne ribhi Baibo man ele. Ele da yọle: “Ọ iyi ọ kuẹ manman ha hu mhan bhi udu, beji ọle rẹ ha taan otọ Ebenọnkhiale a man mhan, bhi ẹghe nin ọle rẹ ha ne mhan talọ bhi uwedẹ?”​—Luke 24:32.

12, 13. (a) Be ha sabọ sunu ji oyẹẹ nin mhan mhọn da iJehova? (b) Be imhan ha lu nin oyẹẹ nin mhan mhọn da iJehova hẹi fuọfuọ a?

 ¹² Beji emhin nin ene edibo luẹle bhi ẹkẹ Ebenọnkhiale rẹ rẹso ele bhi ọkhọle, asabọmiẹn iriọ emhin nin uwẹ luẹle rẹ rẹso uwẹ bhi okhọle ẹghe nin uwẹ rẹ munhẹn ha luẹ iBaibo. Ọnan rẹkpa uwẹ rẹ lẹn iJehova yẹ hoẹmhọn ọlẹn. Hẹi ji ọne oyẹẹ nin uwẹ mhọn da ọle fuọfuọ a.​—Matthew 24:12.

¹³ Nin uwẹ rẹ gheghe kiẹn ọmọẹ Osẹnobulua bha sẹ, ọkhẹke nin uwẹ dọnmhegbe rẹ ji ikolu nin uwẹ bi Osẹnobulua ko mhọnlẹn ha ziẹn ọbhọ. Ọkhẹke nin uwẹ ha luẹ ẹmhọn iJehova bi Jesu, yẹ ha ria eria nyan ebi uwẹ luẹ, bi ebi uwẹ ha rẹ ha noo ele yẹ bhi iẹnlẹn nọnsẹ. (John 17:3) Ahamiẹn uwẹ tie iBaibo, ọkhẹke nin uwẹ ha nọọn egbe ẹ ene inọnta nan: ‘Be ọnan man mẹn le rẹji Jehova? Bezẹle nọn da khẹke nin mẹn re ọkhọle rebhe, bi egbe rebhe hoẹmhọn iJehova?’​—1 Timothy 4:15.

14. Be erọnmhọn rẹ rẹkpa mhan rẹ manman ha hoẹmhọn iJehova yẹ?

 ¹⁴ Ahamiẹn uwẹ mhọn ọmọẹ ọsaje, ẹghe rebhe uwẹ ha rẹ ha ne ọle talọ. Bhiriọ, ikolu nọnsẹbha ki ha ziẹn ọbhọ. Iriọ yẹ nọn rẹji ikolu nin mhan bi Jehova ko mhọnlẹn. Ahamiẹn mhan ne iJehova talọ bhi erọnmhọn ẹghe rebhe, ọnan ki re ikolu nin mhan bi ọle ko mhọnlẹn ha deziẹn ọbhọ. (Tie 1 Thessalonians 5:17.) Ẹsele nọn rẹji mhan, nin mhan rẹ sabọ ha ne iJehova talọ bhi erọnmhọn. Ọkhẹke nin mhan ha re ọkhọle rebhe nan erọnmhọn ji ọle ẹghe rebhe. (Psalm 62:8) Ọ bha khẹke nin mhan ha mhọn erọnmhọn ọkpa bhi uhọnmhọn nin mhan wo nan ẹghe rebhe. Ọkpakinọn, ọkhẹke nin mhan ji erọnmhọn nọnsẹmhan ha na bhi ẹkẹ ọkhọle vae. Bhi ọsi ẹmhọanta, ahamiẹn mhan wo ha luẹ iBaibo ẹghe rebhe yẹ re ọkhọle rebhe nan erọnmhọn ji Jehova, ọ ki re imhan manman ha hoẹmhọn ọlẹn.

15, 16. Ẹlo nela ọkhẹke nin uwẹ rẹ ha ghe iwẹnna itẹmhọn Osẹnobulua?

¹⁵ Ahamiẹn mhan guanọ nin mhan wo ha sikẹ iJehova nọnsen, ọkhẹke nin mhan ha taman ẹbho ebi mhan luẹ bhi Baibo. Ekpẹn Jehova re ọle mun mhan bhi egbe, nin ọle rẹ ji mhan da ha tẹmhọn ọlẹn man ẹbho. (Luke 1:74) Iwẹnna nin Jesu mun nin Kristiẹn rebhe nọn. Ọkhẹke nin ọdeọde bhi ẹwẹ mhan ha tẹmhọn Agbejele nọnsi Osẹnobulua man ẹbho. Uwẹ be sẹ munhẹn ha lu ọnan?​—Matthew 24:14; 28:​19, 20.

¹⁶ Ẹlo nọn ghanlẹn, ọle iPaul nin odibo rẹ ha ghe iwẹnna itẹmhọn Osẹnobulua nin ọle ha lu. Ọnan zẹle nin ọle da tiọle, “emhin nọn ghanlẹn.” (2 Corinthians 4:7) Iwẹnna nọn ke okhun nẹ nin uwẹ ha sabọ lu ẹlẹnan hi, nin uwẹ rẹ ha tẹmhọn Osẹnobulua bi iho nọnsọle man ẹbho. Uwedẹ ọkpa nan rẹ ga iJehova khọnan. Ọnan manman ti ọle bhọ. (Hebrews 6:10) Iwẹnna itẹmhọn Osẹnobulua dẹ rẹkpa uwẹ bi ene ka uwẹ ehọ rẹ sabọ sikẹ iJehova, yẹ re ibha miẹn iẹnlẹn  ighegheghe. Elele nọn khua khọnan. (Tie 1 Corinthians 15:58.) Iwẹnna ọbhebhe be ribhọ nọn ha re uwẹ ghọnghọn gbera ọnan?

17. Bezẹle nin iwẹnna tẹmhọn Osẹnobulua da yi iwẹnna nan ha re ẹjẹje lu?

¹⁷ Iwẹnna nọn khẹke nan tuabe lu, ọle iwẹnna itẹmhọn Osẹnobulua khin. Ọkhẹke nin mhan ha tẹmhọn Osẹnobulua man ẹbho, yẹ re ẹjẹje lu ọle. (2 Timothy 4:2) Ọkhẹke nin ẹbho họn ọne ẹmhọn Agbejele nan. Baibo yọle: “Ukpẹdẹ nọn khua nọnsi Jehova sire! Ọ sire! Ọ runẹ vade ẹjẹje!” Ọkpẹnlẹn ọsi ọne agbọn nan “dẹ vae bhi ẹghe nan rẹyi nanlẹn tee!” (Zephaniah 1:14; Habakkuk 2:3) Bhi ẹghe nọn bha yẹ ree gbe nian, Jehova ki dọ re ọkpẹnlẹn ọbhi ọne agbọn Esu nan. Ọne ẹghe nin kuẹ vae, ọkhẹke nin mhan ha sekhae nin ẹbho, nin ele da sabọ zẹ rẹ dọ ga iJehova.

18. Bezẹle nọn da khẹke nin mhan deba iKristiẹn ọsaje ha ga iJehova?

¹⁸ Jehova guanọ nin mhan deba iKristiẹn ọsaje ha ga ọle. Baibo yọle: “Bha ji mhan ha mhọn aria-ji-egbe, nin mhan da ha lu emhin nọn ha re imhan ha mhọn ahoẹmhọn-egbe yẹ lu iwẹnna esili, nin mhan hẹi ha gbẹdẹ bhi usikoko nesẹmhan, beji eso guẹle. Nan ha re izebhudu nin egbe yẹ manman ha lu iriọ, beji bha rẹ ha daghe ọle ghe, ọne ukpẹdẹ sire.” (Hebrews 10:​24, 25) Bhiriọ, ọkhẹke nin mhan ha lu eka nin mhan ha sabọ lu rẹ ha yo ikolo oga rebhe. Ranmhude, enin mhan da re izebhude nin egbe.

19. Be ha sabọ rẹkpa mhan rẹ hoẹmhọn ibhio mhan nin mhan koko ga?

¹⁹ Ahamiẹn uwẹ yo ikolo oga, uwẹ ki miẹn imọẹ esili ne ha rẹkpa uwẹ ha ga iJehova. Uwẹ dẹ yẹ kere ghe ibhio mhan kẹkẹ yẹ dọnmhegbe nin ele rẹ ha ga iJehova bọsi uwẹ. Ọ bha gba nin ele fo, beji ọ bha yẹ rẹ gba nin uwẹ fo. Ele dobọ ẹgheso. Ọnan ha sunu, dọnmhegbe rẹ ha rẹhunmhan ele. (Tie Colossians 3:13.) Wo ha ghe eji ibhio ẹ da lu nọnsẹn. Ranmhude, ọnan dẹ rẹkpa uwẹ rẹ ha hoẹmhọn ele. Ọnan dẹ sẹyẹ rẹkpa uwẹ rẹ manman sikẹ iJehova.

20, 21. Be bhọ hi “iẹnlẹn ọsaje”?

²⁰ Jehova guanọ nin imọẹ nesọle rebhe ha mhọn iẹnlẹn nọn mhẹn nẹ. Baibo ji mhan lẹn ghe, iẹnlẹn nin mhan ha miẹn bhi ẹghe odalo dẹ dikẹ bhi ọne imhan ye ẹlẹnan.

²¹ Bhi ẹghe odalo mhan dẹ nyẹnlẹn bhi ighegheghe, ọ iyi nin mhan rẹ gheghe nyẹnlẹn bhi ikpe 70 la 80. Mhan dẹ nyẹnlẹn bhi otọ ọfubhegbe rẹ ha khian ighegheghe. Ẹghenin, mhan ki ha mhọn egbe nọn gbale, ọfure bi eghọnghọn nọn ifo. Ọnan iBaibo tiọle “iẹnlẹn ọsaje.” Jehova vele ghe, ọle dẹ re ọne iẹnlẹn nan nin mhan. Ọkpakinọn, ọkhẹke nin mhan lu emhin rebhe nin mhan ha sabọ lu nian, nin mhan da sabọ miẹn ọne iẹnlẹn nan.​—1 Timothy 6:​12, 19.

22. (a) Be imhan ha lu nin mhan da sabọ “fi obọ mun iẹnlẹn ọsaje”? (b) Bezẹle nin iẹnlẹn ọsi ighegheghe ida yi emhin nin mhan ha sabọ re umhẹnmhin nọnsẹmhan dẹ?

²² Be imhan ha rẹ sabọ “fi obọ mun iẹnlẹn ọsaje” yẹ? Ọkhẹke nin mhan ha lu emhin esili, yẹ manman ha lu iwẹnna nọn gbale. (1 Timothy 6:18) Ebi a re ọnan ta hi, nin mhan ha re obọ rẹkhan emhin nin mhan luẹ bhi Baibo. Ọrẹyiriọ, ọ iyi ranmhude mhan mhẹn gbe zẹle nin mhan ha da sabọ miẹn iẹnlẹn ọsaje. Ẹghe iribhọ nin iwẹnna nesẹmhan ha rẹ mhẹn sẹbhọ ghe, mhan ki sabọ re ọle dẹ iẹnlẹn ọsi ighegheghe. Ẹseọhẹ nin Jehova ha re nin eguọmhandia nesọle, ọle iẹnlẹn ighegheghe khin. Ifuẹkẹ nọn bha khẹke mhan nin Jehova mhọn da mhan khọnan. (Romans 5:15) Aba mhan nọn ribhi okhun guanọ nin ọle re ọne ẹsele nan nin eguọmhandia nesọle.

23. Bezẹle nọn da khẹke nin uwẹ ha lu emhin ne mhẹn nian?

²³ Ọkhẹke nin uwẹ nọọn egbe ẹ ọne inọnta nan, ‘Imẹn be ga Osẹnobulua bhi uwedẹ nin ọle guanọ?’ Ahamiẹn uwẹ kere ghe, uwẹ mhọn eje khẹke nin uwẹ da fidenọ bhi iẹnlẹn nọnsẹ, ọkhẹke nin uwẹ re ẹjẹje fidenọ. Ahamiẹn mhan mun udu nyan iJehova, yẹ dọnmhegbe ha re obọ rẹkhan uhi nesọle, ọle  ki gbega mhan. Ọle dẹ gbega eguọmhandia nesọle ne sun rẹkhan ọlẹn bhi ẹghe ọkike ọsi ọne agbọn nan. Jehova dẹ re otọ Ọfubhegbe nin mhan da ha nyẹnlẹn rẹ ha khian ighegheghe, beji ọle vele. Bhi ọsi ẹmhọanta, uwẹ dẹ miẹn iẹnlẹn ọsaje sade uwẹ zẹ rẹ ha lu emhin ne mhẹn nian!