Mhan ha tẹmhọn Jehova ẹgheso, ẹbho ki ha khọ ẹkẹ mhan la ele rẹ mhan kpe eyẹyẹ. Ranmhude ọnan, mhan ki aho nin mhan zobọ bhi itẹmhọn nọnsi Jehova. Ọnan sẹ sunu jiẹ ghe?— IBaibo taman mhan ẹmhọn usẹn-ọbhokhan ọso nọn hoẹmhọn iJehova, nin emhin nọn sẹnian sunu jie. Elin ọlẹn hi Jerimaya. Ji mhan luẹ ẹmhọnlẹn.

Ẹghe nin Jerimaya rẹ ha yi usẹn-obhokhan, iJehova da yọle nọn gbi uhi nin ibhokhin Juda ne rẹban emhin ebe. Ọnin ẹsọn nan bha lẹkhẹ nin Jerimaya ranmhude ofẹn da ha mun ọlẹn. Ọda taman iJehova: ‘Ọbhokhan mhẹn khin, ibha lẹn ebi mhẹn ata.’ IJehova da yọle: ‘Hẹi ji ofẹn muẹn, i dẹ miẹnkpa ẹ.’

 IJerimaya da ha gbi uhi nin enin ẹbho ghe, ele dẹ loya sade ele bha rẹban olukhọ. Uwẹ riale ghe enin ẹbho ka iJerimaya ehọ?— Eye. Eda rọle kpe eyẹyẹ. Eso da yẹ aho ne gbọlea. Buwẹ riale ọdia Jerimaya bhi egbe yẹ?— Ofẹn da ha mun ọlẹn, ọda yọle: ‘Mhẹn iyẹ kie tẹmhọn iJehova.’ Ọle ki gene zobọ bhọ?— Eye, ranmhude ọle manman hoẹmhọn iJehova, iJerimaya bha sabọ zobọ bhi itẹmhọn nọnsi Jehova. Ọnan zẹle nin iJehova da miẹn ọlẹn fan.

Bhosi ijiẹmhin, ẹdẹ ọkpa, eria ọbe da mun Jerimaya fiọ bhi uhio nọn dimin nin ekhuọrọkhuọrọ ye. Ọbha miẹn ebale le, ọbha yẹ miẹn amẹn muọn. Ene eria rẹ ha guanọ nin Jerimaya yu ọbhi enin. Ọkpa kinọn, iJehova da miẹnkpa ọle rẹ miẹn uhọnmhọn.

Buwẹ luẹ bhi okha nọnsi Jerimaya?— Arẹmiẹn ofẹn ha mun ọlẹn ẹgheso, ọle wo sẹyẹ ha tẹmhọn iJehova. Uwẹ ayẹ ha tẹmhọn iJehova man ẹbho, eso sabọ ha rẹ ẹ kpe eyẹyẹ la ele khọ ẹkẹ ẹ. Asabọ yẹ miẹn ẹkhọle lu ẹ la ofẹn ki ha muẹn. Ọrẹ yiriọ, hẹi zobọ bhi itẹmhọn nọnsi Jehova. IJehova dẹ miẹnkpa ẹ, bẹji ọle rẹ miẹnkpa iJerimaya.