Uwẹ riale ghe ọnọghọmhin nan rẹ lu ebe diale?— Ẹbho nebunbun riale ọnọghọmhin. IBaibo rẹman ghe ọbha lẹkhe hiehie nin obhokhan okpea natiọle iJosaya rẹ lu ebe diale. Ọkpa kinọn, ọle da ha mhọn imọẹ ne rẹkpa ọle. Ji mhan luẹ emhọn iJosaya bi imọẹ nesọle.

Amọni, ojie nọnsi Juda, ọle aba iJosaya. Ọria ọbe nọn. Ẹbọ ọle yẹ ga. Ọle ki yu, iJosaya da kiẹn ojie. Ikpe elẹnlẹn ọle sẹ ha khin beji ọle kiẹn ojie. Uwẹ riale ọle rẹkhan uwedẹ ọsi aba le?— Hiehie!

Ọle rẹ ha yi obhokhan, ọle da ho nọnle ka iJehova ehọ. Ranmhude ọnan, ene hoẹmhọn iJehova ọkpa ọle ha zẹ bhi imọẹ. Eda gene miẹnkpa ọle lu iho nọnsi Jehova. Ebhọ enin imọẹ ọle nan?

Zẹfanaya da ha yi ọkpa bhi imọẹ ọle. Ohẹn akhasẹ ọle ha khin. Ọle ha gbi uhi nin ibhokhin Juda ghe sade ele bha rẹban ẹbọ nele ga, emhin ọbe ki ruan ele. iJosaya da ka iZẹfanaya ehọ. Bhiriọ ọle da ha ga iJehova, ọiyi ẹbọ.

 Ọbhebhe bhi imọẹ nọnsi Josaya da ha yi Jerimaya. Otu ọle bi iJosaya akhin, ele nyẹn diake egbe ẹghe nele rẹ ha wanre. Ikolu ele ha khin. Ọnan zẹle nin Jerimaya da so illo akhiẹ ẹghe nin iJosaya rẹ yu. Ele wo miẹnkpa egbe rẹ lu iho nọnsi Jehova.

Bebhọ uwẹ luẹ bhi okha nọnsi iJosaya?— Arẹmiẹn obhokhan iJosaya sẹ ha khin, ọle da guanọ nọnle lu ebe diale. Ọle lẹnmhin ghe ọkhẹke nọnle zẹ imọẹ ne hoẹmhọn iJehova. Gbẹlokotọ nuwẹ rẹ zẹ imọẹ ne hoẹmhọn iJehova, nea sabọ rẹkpa ẹ rẹ a lu ebe diale.