IRebeka da hayi okhuo nọn hoẹmhọn iJehova. Elin ọdọ le da ha yi Aiziki. Aiziki da yẹ hoẹmhọn iJehova. Bebhọ ele rẹ miẹn egbe yẹ? Bi Rebeka lu nọn rẹman ghe ọle ho nọnle lu iho nọnsi Jehova? Ji mhan luẹ ẹmhọn lẹn.

Ebrahamu bi Sera biẹ Aiziki. Agba– ẹbho natiọle iKena ele da ha nyẹnlẹn. Ẹbho ne ribhi Kena i ga iJehova. Ebrahamu da ha guanọ nin Aiziki re okhuo nọn ga iJehova. Ọda ji odibo nọnsọle, asabọ miẹn Ẹliaza nọn, nọn dọ guanọ okhuo nin Aiziki bhi agba-ẹbho natiọle iHeran, bhi eji ibhio Ebrahamu ye.

Odibo ebhebhe ọsi Ebrahamu da yẹ deba Ẹliaza akhin ọne ẹbho. Ọnin uwedẹ manman ree. Ele da ri ekẹtẹkẹtẹ igbe rẹ mune ebale bi emhin nele da rẹ lu ẹse. Bebhọ Ẹliaza arẹ sabọ lẹn okhuo nọnle azẹ nin Aiziki yẹ? Ele ki sẹbhi otọ iHeran, ele da mudia bhi isi omin ọso, ranmunde Ẹliaza lẹnmhin ghe ikhuo dẹ kẹ vae dọ sa amẹn. Enin ọki da nan erọnmhọn ji Jehova yọle: ‘Ọmanmhẹn nin mhẹn ha taman nọn sa amẹn mhẹn muọn, nọa gene sa amẹn mhẹn, sẹyẹ sa nin ekẹtẹkẹtẹ nọn sẹmhẹn, mhẹn ki lẹn ghe, ọnan okhuo nuwẹ zẹ nin Aiziki.’

Ẹghe nọn bha re gbe, iRebeka da vae dọ sa amẹn. IBaibo taman mhan ghe  iRebeka wo manman mhọn-ose. Ẹliaza da taman lẹn: ‘sa amẹn mẹn muọn.’ IRebeka da yọle: ‘I dẹ sa niẹn bi ekẹtẹkẹtẹ nọnsẹ.’ Ọiyi obhi amẹn khere ekẹtẹkẹtẹ muọn, ọnan zẹle iRebeka da yi isi omin ekigba nebunbun. Uwẹ daghe ọle bhi ọnin ifoto nan beji ọle rẹ manman wẹnna yẹ?— Ewaniẹn ẹjẹje nin iJehova re bhi erọnmhọn nọnsi Ẹliaza da kiẹn ọle emhin ọnyunuan.

Ẹliaza da ne emhin ọhẹ nin iRebeka. IRebeka da yi ele vae bhi isi abale. Ẹliaza da tare ebezẹle nin Ebrahamu da jọle vae bhi enin, bi ebi Jehova rẹ ri ewaniẹn bhi erọnmhọn nọnle nanlẹn yẹ. Erebhe da ha ghọnghọn nin Rebeka rẹ ha yi aamhẹn nọnsi Aiziki.

Uwẹ riale ghe iRebeka guanọ nọnle hayi aamhẹn Aiziki?— IRebeka lẹnmhin ghe iJehova ji Ẹliaza re. Ọnin zẹle ẹghe nin azagba-uwa nọnsi iRebeka ki rẹ nọon lẹn sọle ho nọnle ha khin iKena nọnle dọ bọ Aiziki, iRebeka da taman ele: ‘I dẹ yomhin.’ Ọle da wo rẹkhan Ẹliaza ẹjiẹje akhin iKena dọ bọ Aiziki.

Ranmhude iRebeka lu ebi iJehova guanọ, iJehova da nan erọnmhọn nanlẹn. Ikpe ne bunbun ki gbera, ada biẹ iJesu bhi ulin-uwa nọnsọle. IJehova dẹ yẹ nan erọnmhọn niẹn sade uwẹ diabi iRebeka lu ebe yẹẹ iJehova.