Ji mhan luẹ ẹmhọn usẹn-ọbhokhan ọkpa nọn miẹn obhio inẹn ọlẹn fan. Pọlu nin odibo ha yi obhio inẹn ọlẹn. Arẹmiẹn ghe mhan bha lẹn elin ọsi ọnin usẹn-ọbhokhan nan, mhan lẹnmhin ghe emhin izebhudu ọle lu. Uwẹ ho nuwẹ lẹn ebi ọle lu?—

IPọlu da ha ribhi ighan bhi iJerusalẹmu ranmhude ẹmhọn iJesu nọnle a ta. Eria ọbe eso ne bha hoẹmhọn iPọlu da mhanmhan ọbe nerẹ gbọlea. Ele da yọle: ‘Bha ja taman ọnọn ri egbanegbe khian nọnle ji egbanegbe nesọle, ne mun iPọlu re bhi ikotu. Ẹghenin, mhan ki dọ rẹko bhi uwedẹ. Pọlu aki ha gbera, mhan ki sabọ gbọlea.’

Ọmọn nọnsi obhio iPọlu da họn ọnin emhanmhan nan. Bebhọ ọle ki da lu yẹ? Ọda ha bu iPọlu bhi ighan dọ taman lẹn. Ẹjẹje, iPọlu da yọle nọn dọ taman ọnọn ri egbanegbe khian. Uwẹ riale ebe lẹkhẹ nọn, nọnle rẹ dọ taman lẹn?— Eeye, ranmhude ọnọn re egbanegbe khian, okpọria nọn. Ọrẹ yiriọ, ọnin usẹn-obhokhan da ri izebhudu dọ taman lẹn.

Ọnọn re egbanegbe khian lẹn ebi ọle a lu. Ọle da koko egbanegbe nọn sẹbhi itue 500 [iyisẹn isẹn] rẹ gbogbaga iPọlu. Ọle da yele ne mun iPọlu ha khin iSizẹria ọnin asọn nin. Pọlu ki be miẹn uhọnmhọn?— Ehe, enin eria ọbe bha yẹ sabọ lu ọle emhin soso. Emhanmhan ọbe nọnsele da kiẹn ihohoo.

Bebhọ uwẹ ki miẹn luẹ bhi ọnin okha nan?— Uwẹ dẹ sabọ zebhudu bii ọmọn nọnsi obhio iPọlu. Ọkhẹke nin mhan zebhudu sade mhan tẹmhọn iJehova man ẹbhọ. Uwẹ dẹ yẹ zebhudu ha tẹmhọn iJehova man ẹbhọ?— Uwẹ ha lu iriọ, uwẹ ki sabọ miẹn ọria fan.