Nanbhi ẹghe nin Samuẹl rẹ ha yi ọbhokhan, uwa oga ọle da ha nyẹnlẹn. Enin ọle da yẹ ha wẹnna. Uwa oga nin ẹbho vae da dọ ha ga iJehova. Uwẹ lẹn ebi ọle rẹ sẹbhi enin yẹ? Ja ka luẹ ẹmhọn inẹn-ọlen nin Hanna.

Hanna bha kẹ miẹn ọmọn biẹ, arẹmiẹn ọle manman guanọ ọmọn. Ranmhude ọnan, ọle da bhii Jehova nọn miẹnkpa ọle, nọnle miẹn ọmọn biẹ. Ọle da vi ive ghe, aha miẹn ọle biẹ ọmọn okpea, ọle ki ji ọnin ọmọn, nọn dọ ha nyẹn bhi uwa oga, sẹyẹ ha wẹnna nin Jehova bhi enin. Jehova da re ewaniẹn bhi erọnmhọn nọnsi Hanna. Ọda biẹ ọmọn okpea, ọda tie ọnin ọmọn iSamuẹl. Ọnin ọmọn ki ribhi ikpe ea, la enẹn, iHanna da re ọle ha khian uwa oga, nọn dọ ha ga Osẹnobulua bhi enin.

Ilai elin ọsi ojọhen bhi uwa oga ẹghenin. Enin imọn ikpea eva nesọle da yẹ wẹnna. Yere ghe uwa nan da ga Osẹnobulua ọle ọnin uwa oga nan ha khin. Ebe mhẹn ọkhẹke nin ẹbho ha lu bhi enin. Ọkpa kinọn, imọn nesi Ilai da ha lu emhin nei mhẹn hiehie. ISamuẹl daghe ebe ele lu. ISamuẹl ki be deba ele ha lu emhin ebe?— Eye, ebe diale ọle wo ha lu, beji ene biẹ ọle manlẹn le.

Buwẹ riale ọrẹ khẹke nin Ilai khin imọn nesọle yẹ?— Ọrẹ khẹke nọnle re oya nele. Ọle irẹ ji ele sẹyẹ ha wenna bhi uwa oga. Ọle bha lu iriọ. Ọnan zẹle nin Jehova da ha khọ ẹkẹ Ilai bi imọn nesọle. IJehova da yọle ghe ọle dẹ re oya nele.

Asọn ọkpa ki re, iSamuẹl ki wẹ, ọda họn ọria so tiọle: ‘iSamuẹl!’ ọda runẹ bu Ilai, Ilai da yọle: ‘Ibha tie ẹ.’ Ọda yẹ di riọ sunu igba eva. Ọki sunu ọsugba ọze ea, Ilai da taman Samuẹl ghe ọha kiekie họn ọnin ukpuru nan, ọha yọle: ‘Huẹan iJehova, ne mhẹn talọ; imhẹn ka ehọ.’ Iriọ iSamuẹl gene lu, iJehova da yọle: ‘Taman Ilai ghe idẹ re oya na lẹn bi azagba-uwa nọnsọle ranmhude emhin ebe nele lu.’ Uwẹ riale ghe ọlẹkhẹ nin Samuẹl rẹ  ta ọnin ọta nan man Ilai?— Hiehie. Arẹ miẹn ofẹn ha mun iSamuẹl, ọda sẹyẹ lu ebi Jehova jọle. Ilai bi imọn nesọle da yu beji Jehova tale.

ISamuẹl, ọria nin mhan ha re egbe khọkhọ nọn. Ranmhude, arẹmiẹn ẹbho ebhebhe lu ebe i mhẹn, ọle bha deba ele. Ebe mhẹn ọkpa ọle wo ha lu. Uwẹ kii? Ọbha be yẹẹ ẹ nuwẹ rẹ dia bi Samuẹl? Nuwẹ wo ha lu ebe mhẹn ẹghe rebhe? Uwẹ ha lu iriọ, uwẹ ki ri Jehova bi ene biẹ ẹ ha ghọnghọn.