Osẹnobulua mhanmhan imọn nesi Ebrahamu. Ọda rele kiẹn agba-ẹbho. Ọda yẹ ne uhi nele. Osẹnobulua da tiele ‘Izrẹl.’ Ọnin agba-ẹbho nan ọkpa mun oga ẹmhọn-ata mhọn. Ele ọkpa re ọta nọnsi Osẹnobulua khian. (Psalm 147:19, 20) Bhiriọ, agba-ẹbho rebhe ki nanbhi obọ nọnsi Izrẹl miẹn elele.—Tie Genesis 22:18.

Osenobulua zẹ ibhokhan Izrẹl nele ha yi esali nesọle. Okha nọnsele rẹman elele nọn ribhọ sade ẹbho re obọ rẹkhan uhi nọnsi Osẹnobulua. (Deuteronomy 4:6) Bhiriọ, obọ si ibhokhan Izrẹl, agba-ẹbho nekẹle aki da luẹ ẹmhọn-ata nọnsi Osẹnobulua.—Tie Isaiah 43:10, 12.

Akizẹbue, Izrẹl da gbo obọ ra uhi. Ranmhude ọnin, Jehova da re agbotu ọsi ene rẹkhan Kristi fi ọbhi ihe nọnsi Izrẹl. (Matthew 21:43; 23:37, 38) Ẹlẹnan nian, ene rekhan Kristi ki esali nesi Jehova, ọiyẹ yi Izrẹl.—Tie Acts 15:14, 17.

Jesu mhanmhan ene rẹkhan lẹn nele rẹ sabọ atẹmhọn Agbejele, rẹkpa ẹbho rẹ kiẹn odibo nesọle bhi agba-ẹbho rebhe. (Matthew 10:7, 11; 24:14; 28:19, 20) Ọkpẹnlẹn ọsi ọnin iwẹnna nan aki yẹ, bhi ẹghe ọkike ọsi ọnan agbọn nan. Jehova ku eria nebunbun bhi agba-ẹbho rebhe kugbe bhi oga ẹmhọn-ata. Abha sẹ ka miẹn ebe sẹriọ khẹ! (Revelation 7:9, 10) Amhanmhan ene rẹkhan Jesu, beji ele ada sabọ a rẹkpa egbe, yẹ re izebhudu negbe. Iluẹmhin iBaibo ọkpa ele luẹ bhi ikolo oga nọnsele bhi otọ agbọn rebhe.—Tie Hebrews 10:24, 25.

Ọki gbera ikpe 130 nin ikpeta eria eso muhẹn kugbe aluẹ iBaibo nele rẹ lẹn otọle. Ele da miẹn ẹmhọn-ata ne rẹ yua. Ele lẹnmhin ghe iJesu ka mhanmhan ene rẹkhan lẹn, nerẹ tẹmhọn Agbejele. Iriọ, ele da muhẹn atẹmhọn Agbejele nanbhi otọ agbọn rebhe. Bhi ukpe 1931 ada muhẹn atiele Esali Jehova.—Tie Acts 1:8; 2:1, 4; 5:42.

Egbe ẹghe nin Jesu rẹ yu fo, otu ne sun oga ha ribhọ, nea gbẹloghe agbotu ọsi ene rẹkhan Jesu ne ha ribhi agba-ẹbho kẹkẹ. Ọnin otu ne sun oga nan lẹnmhin ghe iJesu hi uhọnmhọn ọsi agbotu. (Acts 16:4, 5) Iriọ yẹ nọn ẹlẹnan. Esali Jehova bhi ọnin agbọn nan rebhe mhọn Otu Ne Sun Oga. Ewanlẹn ne ribhi ọnin otu nan, ele kakabọ sẹlo bhi emhin. Ọnin otu nan gbẹloghe Betẹl ọsi Esali Jehova bhi agba-ẹbho kẹkẹ. Betẹl ada gbẹn ebe nan gha nẹn ẹbho bhi urolo ne gbera 700. Bhiriọ, ọnin otu nan sabọ nanbhi ẹkẹ iBaibo re izebhudu bi adia nin agbotu ne gbera 110,000 bhi otọ agbọn rebhe. Ikpea ne re obọ rẹkhan ebi Baibo tale rẹji enea deba Ewanlẹn bhi agbotu, ele gbẹloghe ọdeọde bhi enan agbotu nan. Ihoẹmhọṇ-egbe ele rẹ gbẹloghe usun ohuan nọnsi Osẹnobulua.—Tie 1 Peter 5:2, 3.

Amhanmhan Esali Jehova nele ha tẹmhọn Agbejele, yẹ rẹkpa ẹbho rẹ kiẹn odibo nesi Jesu. Mhan tẹmhọn Agbejele nanbhi ukuwa rẹ sẹbhi ukuwa beji etuegbe nesi Jesu lu. (Acts 20:20) Mhan yẹ nin ẹbho ne gene hoẹmhọn ẹmhọn-ata luẹ iBaibo. Esali Jehova i gheghe yi agbotu. Mhan yẹ yi azagba-uwa ne mhọn Aba nọn hoẹmhọn mhan. Ibhio ne hoẹmhọn egbe mhan khin. (2 Thessalonians 1:3) Ranmhude a mhanmhan mhan nin mhan sabọ miẹnkpa ẹbho yẹ lu ebe ti Osẹnobulua bhọ, ọle zẹle nin mhan da yi azagba-uwa ne ghọnghọn nẹn bhi ọnin agbọn nan.—Tie Psalm 33:12; Acts 20:35.