ILUẸMHIN 7
Be Bhọ Agbejele Nọnsi Osẹnobulua?
1. Be Bhọ Agbejele Nọnsi Osẹnobulua?
Bezẹle nan da miẹn iJesu Ojie khẹke?—MARK 1:40-42.
Ugbẹloghe nọn ribhọ okhun, ọle ha Agbejele nọnsi Osẹnobulua. Ọdẹ re ugbelọghe ọsi ọnin agbọn nan kie. Ọki rẹ ẹbho a lu iho nọnsi Osẹnobulua bhi otọ bi okhun. Ọta nọn mhẹn nọn ghe, Jehova dẹ ri Agbejele nọnsọle rẹ lu ọnan. Ọnin Agbejele da ha yi ugbẹloghe nọn mhẹn nin agbọn rebhe guanọ. Ọle da re okugbe nin ẹbho rebhe ne nyẹn bhi otọ. —Tie Daniel 2:44; Matthew 6:9, 10; 24:14.
Aimiẹn ejele nọn i mhọn ojie. Iriọ yẹ Agbejele nọnsi Osẹnobulua. Jesu Kristi, ọle iJehova zẹle nọn ha yi Ojie ọsi Agbejele nọnsọle.—Tie Revelation 11:15.
Ghe ọne ividio Be Bhọ Agbejele Nọnsi Osẹnobulua?
2. Bezẹle nan da miẹn iJesu Ojie khẹke?
IJesu Ojie khẹke ranmhude ọle fuẹkẹle. Ẹmhọn-ata ọle mudia nan. (John 1:14) Ọle mhọn ahu nọn da rẹ miẹnkpa ẹbho, ranmhude okhun ọle da ha nan gbẹloghe ọnin otọ nan rebhe. Beji ọle riọ kpanọ fo, ọda ha khin okhun dọ dotọa bhi obera nọnsi Jehova. (Hebrews 10:12, 13) Ọkuẹsẹ Osẹnobulua re ahu nanlẹn rẹ ha gbẹloghe.—Tie Daniel 7:13, 14.
3. Ebhọ da deba iJesu gbẹloghe?
Usun nin Baibo tiọle ‘ene khiale’ dẹ deba Jesu gbẹloghe bhi okhun. (Daniel 7:27) Etuegbe nesi Jesu eria ọhẹnhẹn nan ka zẹ bhi ọnin usun nan. Rẹsẹbhi ẹlẹnan, iJehova sẹyẹ hanọn ikpea bi ikhuo ne da deba ọnin usun nan. Ele ha yu, egbe ẹlinmhin eda rẹ riọ kpanọ bii Jesu.—Tie John 14:1-3; 1 Corinthians 15:42-44.
Eki itue khin okhun? Jesu tiele ‘ihuan ne bha bun.’ (Luke 12:32) Itue 144,000 da deba Jesu gbẹloghe ọnin otọ nan.—Tie Revelation 14:1.
4. Be sunu beji Jesu muhẹn a gbẹloghe?
Jesu muhẹn agbẹloghe agbejele nọnsi Osẹnobulua bhi 1914. * Emhin ọhẹnhẹn nọnle ka lu, ọda khue Esu bi ẹhi nei mhẹn nesọle diọbhi otọ. Ranmhude ọnin, ẹlo ki da bha Esu. Ọlezẹle nọnda siọ ọnọghọ bhi otọ rebhe. (Revelation 12:7-10, 12) Nanbhi ẹghenin avade, ọnọghọ nọnsi agbọn kakabọ situa. Okhọnlẹn, ukhunmhun, emianmhẹn, otọ-umuvẹa ne sunu ẹlẹnan ribhi ‘iyaman’ nin mhan rẹ lẹn ghe Agbejele nọnsi Osẹnobulua dẹ kẹ a gbẹloghe ọnin agbọn nan.—Tie Luke 21:7, 10, 11, 31.
5. Be Agbejele nọnsi Osẹnobulua sẹ lu, bọ da yẹ lu?
Itẹmhọn Agbejele, ọle Osẹnobulua rẹ koko ẹbho bhi agba-ẹbho rebhe. Ene bunbun dọ ha de uhọnmhọnre nin ugbẹloghe nọnsi Jesu. Agbejele nọnsi Osẹnobulua dẹ gbogba ga ele, ẹghe nọn arẹ fuẹn agbọn nei mhẹn aan. Ọrebhe ne ho ne nyẹn bhi otọ ọnin Agbejele nin, dẹ de uhọnmhọnre ka Jesu ehọ.—Tie Revelation 7:9, 14, 16, 17.
Ikpe 1,000 Agbejele nọnsi Osẹnobulua da rẹ mun emhanmhan nọnsi Osẹnobulua sẹ bhi ọnin agbọn nan. Otọ nan rebhe ki kiẹn otọ ọfubhegbe. Ọkike ọle, Jesu ki mun ọnin Agbejele nan Aba le. (1 Corinthians 15:24-26) Ọbhọ uwẹ ho nu ta ọnin ẹmhọn Agbejele nan man?—Tie Psalm 37:10, 11, 29.
^ udu ọle 6 Uwẹ a ho nu lẹn otọ akhasẹ bhi Baibo nọn tẹmhọn 1914, fe apapale 215-218 ọsi ọnin ebe natiọle What Does the Bible Really Teach? ghe.
