ILUẸMHIN 13
Be bhọ Da Sunu Ji Otu Oga?
1. Otu oga rebhe be mhẹn?
Ẹria ne ho ne gene ga Osẹnobulua ribhi ẹkẹ otu oga rebhe. Ọta nọn mhẹn nọn ghe Osẹnobulua daghe ele, ọle yẹ mhọn ẹmhọn ele bhi ọkhọ. Ọba-bhegbea ghe otu oga nebunbun mhọn obọ bhi akhailu kẹkẹ ẹlẹnan. (2 Corinthians 4:3, 4; 11:13-15) Beji ahọn, otu oga eso mhọn obọ bhi okhọnlẹn, ifuẹn agba-ẹbhoa bi ugbele. Ohẹn otuẹ eso yẹ ria ibhokhan an. Ene gene ho ne ga Osẹnobulua, ene emhin nan rebhe ba ele bhi egbe.—Tie Matthew 24:3-5, 11, 12.
Oga ẹmhọn-ata re ogẹn ji Osẹnobulua, oga ohoghe sọnọn lẹn. Iman-emhin ọsi oga ohoghe iribhi Baibo. Ebi ele man rẹji Osẹnobulua bi ene yu, iman-emhin ohoghe nọn. Jehova ho nin ẹbho lẹn ẹmhọn-ata nọnsọle.—Tie Ezekiel 18:4; 1 Timothy 2:3-5.
2. Be bhọ da sunu ji otu oga?
Otu oga ne hoẹmhọn ọnin agbọn ọsi Esu nan, ele ida sabọ hiẹ Jehova, arẹmiẹn ele tale ghe ele hoẹmhọn Osẹnobulua. (James 4:4) Bhi ẹkẹ iBaibo, otu oga ohoghe rebhe a tiọle ‘Babilọn nọn Khua.’ Babilọn ha tie agba-ẹbho nẹ ẹdẹlẹ nin oga ohoghe da muhẹn, bhi ẹghe nin okpamẹn nọn khua ẹghe nọnsi Noa rẹ rọ fo. Osẹnobulua dẹ kẹ re ọkpẹnlẹn ji oga ohoghe rebhe ne hiẹ ẹbho, yẹ denyẹnyẹn ele.—Tie Revelation 17:1, 2, 5, 16, 17; 18:8.
Ọta nọn mhẹn sẹyẹ ribhọ. Ene ho ne gene ga iJehova ne ribhi ẹkẹ oga ohoghe kẹkẹ bhi agbọn nan rebhe, Jehova bha ye elea. Ọle hanọn ele sibhi oga ohoghe re dọa man ele ẹmhọn-ata.—Tie Micah 4:2, 5.
3. Bọ khẹke nin ene ho ne gene ga Osẹnobulua lu?
Oga ẹmhọn-ata ku ẹbho kugbe
Ene ho ne lẹn ẹmhọn-ata yẹ lu ebe mhẹn, Jehova mhọn ele bhi ọkhọle. Ọle taman ele ne sibhi oga ohoghe re. Ene gene hoẹmhọn Osẹnobulua muegbe ne rẹ fidenọ alu ebe yẹẹ ọle.—Tie Revelation 18:4.
Egbe ẹghe nin Jesu rẹ yu fo, ene gene ho ne ga Osẹnobulua, da re ghọnghọn miẹn ọta nọn mhẹn nele họn bhi egbe. Unun ọsi etuegbe nesi Jesu ele da họn. Ele da luẹ uwedẹ iẹnlẹn ọsọgbọn bhi obọ iJehova. Uwedẹ iẹnlẹn nọn mhẹn, nin eghọnghọn bi iruduba ye. Ọkhẹke nin mhan regbe khọkhọ ele ẹlẹnan, bhi uwedẹ nele rẹ mun iJehova kalo bhi iẹnlẹn nọnsele, ranmhude ọta nọn mhẹn nele họn.—Tie 1 Thessalonians 1:8, 9; 2:13.
Ọrebhe ne sibhi oga ohoghe re vae bhi azagba-uwa ọsi oga ẹmhọn-ata nọnsi Jehova, Jehova dẹ miẹn ele ọbhi egbe. Uwẹ a bu iJehova re, uwẹ ki kiẹn ọmọẹ ọle. Uwẹ ki deba azagba-uwa nin ihoẹmhọn-egbe ye. Bebhọ ọnin azagba-uwa nan? Ọle hi enin bha ko ga iJehova.—Tie Mark 10:29, 30; 2 Corinthians 6:17, 18.
4. Bi Osẹnobulua da rẹ re eghọnghọn ji agbọn rebhe yẹ?
Ọta nọn mhẹn nọn ghe, Osẹnobulua dẹ kẹ bhu-ohiẹn ọsi oga ohoghe. Ẹghenin, udenyẹnyẹn iyẹ da ha ribhọ. Oga ohoghe iyẹ da ha ribhọ nọa hiẹ ẹbho, la waa agbọn an. Ọrebhe ne nyẹnlẹn ki kugbe ha ga Osẹnobulua ọkpa ọsi ẹmhọn-ata.—Tie Revelation 18:20, 21; 21:3, 4.
