ILUẸMHIN 5
Be Bhọ Emhanmhan Nọnsi Osẹnobulua Rẹji Ọnin Otọ Nan?
1. Bezẹle nin Osẹnobulua da man ọnin otọ nan?
Jehova man otọ nin mhan nin eria, nọn ha yi uwa nọn sẹmhan. Osẹnobulua bha man okpea bi okhuo nin ọhẹnhẹn natiọle Adamu bi Ivi ne dọ biẹ vuọn okhun. Ẹhi Osẹnobulua man ne nyẹn bhi okhun. (Job 38:4, 7) Osẹnobulua da rẹ ọnin okpea nọn hẹnhen bhi ogba ọfubhegbe bhi Idẹn. (Genesis 2:15-17) Jehova mhanmhan nin Adamu bi imọn nesọle rọ ọnyẹnmhẹn nyẹn bhi otọ bhi ighegheghe.—Tie Psalm 37:29; 115:16.
Ẹghenin, ọgba bhi Idẹn ọkpa hayi ogba ọfubhegbe. Osẹnobulua da taman ọnin okpea bi okhuo nọn hẹnhen ne biẹ vọun ọnin otọ nan rebhe. Beji ele arẹ ha bun ọbhọ, iriọ ele arẹ a gbẹloghe ọnin otọ nan, ọkuẹsẹ otọ rebhe kiẹn otọ ọfubhegbe. (Genesis 1:28) Ọnin otọ nan dẹ ha ribhọ rẹsi ighegheghe. Aida guọghọlea. Enan uwa nọn sẹmhan.—Tie Psalm 104:5.
Ghe ọne ividio Bezẹle Nin Osẹnobulua Da Man Ọne Otọ Nan?
2. Bezẹle ọnin otọ nan iyi otọ ọfubhegbe nian?
Adamu bi Ivi da mhọn akan ehọ da Osẹnobulua, bhiriọ, Jehova da khu ele fia bhi ọnin ogba. Iriọ ogba ọfubhegbe rẹ yua, abha yẹ miẹn ọria nọn sabọ muọnlẹn rẹ. Rẹ nin ẹghenin ade, eria nei mhẹn ki rọ ọnin agbọn nan khian.—Job 9:24.—Tie Genesis 3:23, 24.
Ọnin ki rẹman ghe iJehova bha yẹ sabọ mun emhanmhan nọnsọle sẹ? Eyee! Ọle kokhun nẹ. Aimiẹn ebọle isabọ lu. (Isaiah 45:18) Ọle dẹ mun emhanmhan nọnsọle rẹji ọnin agbọn nan sẹ.—Tie Psalm 37:11, 34.
3. Bi otọ ọfubhegbe arẹ kie vae yẹ?
Ọnin otọ nan dẹ kie kiẹn ogba ọfubhegbe ẹghe nin Jesu arẹ a gbẹloghe bo Ojie. Bhi okhọn natiọle Amagẹdọn, Jesu bi ẹhi nekẹle nọnsi Osẹnobulua dẹ fuẹn eria ọbe rebhe a. Ọnin aki gbera, Jesu ki mun Esu khue bhi ighan bhi ikpe 1,000. Ene ka Osẹnobulua ehọ dẹ miẹn umiẹnfan ranmhude Jesu dẹ gbogba ga ele. Ele da nyẹn bhi ọnin otọ ọfubhegbe bhi ighegheghe.—Tie Revelation 20:1-3; 21:3, 4.
4. Ẹghea iloya da rẹ fo?
Ẹghea Osẹnobulua da rẹ re ọkpẹnlẹn ọbhi emhin ebe bhi ọnin otọ nan? Jesu re ‘iyaman’ bhọ nin mhan rẹ lẹn ghe ọkpẹnlẹn sire. Emhin ebe ne sunu bhi ọnin agbọn nan rebhe ẹlẹnan, ri iẹnlẹn nọghọ ọrebhe. Ọnan rẹ mhan lẹn ghe, ‘ẹghe ọkpẹnlẹn ọsi agbọn nọi mhẹn nan’ mhan ki ye.—Tie Matthew 24:3, 7-14, 21, 22.
Jesu dẹ gbẹloghe ọnin otọ nan bhi ikpe 1,000. Ẹghenin ọle da rẹ re iloya rebhe sibhọ re. (Isaiah 9:6, 7; 11:9) Deba ọnin, ọle da yẹ hayi Ojohẹn nọn da gbo olukhọ ọsi ene hoẹmhọn Osẹnobulua kua. Bhiriọ, Jesu, ọle Osẹnobulua da noo rẹ re emianmhẹn, idọmanlẹn bi uu kie.—Tie Isaiah 25:8; 33:24.
5. Ọbhọ da nyẹn bhi otọ ọfubhegbe nọn vade?
Bhi Kindọn Họọ, uwẹ dẹ miẹn eria ne hoẹmhọn Osẹnobulua, ne yẹ ho ne luẹ ebe ti Osẹnobulua bhọ
Ene ka Osẹnobulua ehọ da nyẹn bhi otọ ọfubhegbe. (1 John 2:17) Jesu taman ene rẹkhanlẹn ne dọ guanọ eria ne muegbe ne rẹ kaehọ, ne man ele ebi ele arẹ lu iho nọnsi Osẹnobulua yẹ. Jehova mun eria nebunbun egbe ẹlẹnan ne rẹ nyẹn bhi ọnin otọ ọfubhegbe nin. (Zephaniah 2:3) Bhi Kindọn Họọ ọsi Esali Jehova, eria nebunbun luẹ ebi ele arẹ ha yi ọdọ, aamhẹn, aba, inẹn, bi imọn ne mhẹn yẹ. Azagba-uwa rebhe kugbe luẹ ebi ele arẹ miẹn elele yẹ bhi ọta nọn mhẹn nọn ribhi Baibo.—Tie Micah 4:1-4.
