ILUẸMHIN 8
Bezẹle Nin Osẹnobulua da Ji Olukhọ bi Iloya ha Ribhọ?
1. Bi olukhọ rẹ muhẹn yẹ?
Osẹnobulua re ẹghe nọn taanlẹn nin ẹbho rẹ gbẹloghe, nọn rẹ rẹman ghe eria ida sabọ re ọkpẹnlẹn bhi ọnọghọ ọsi agbọn
Ẹghe nin Esu rẹ bha ohoghe nin ọhẹnhẹn, olukhọ rẹ muhẹn. Ẹhi nọn gbale Esu rẹ ka akhin, sokpan ‘ọda sibhi uwedẹ ẹmhọn-ata re.’ (John 8:44) Ọda guanọ oga nọn khẹke Osẹnobulua. Bhiriọ, ọda bha ohoghe man okhuo nin ọhẹnhẹn natiọle Ivi. Ọda hiẹ Ivi nọn ka ọle ehọ gbo obọ ra uhi nọnsi Osẹnobulua. Adamu da deba okhuole mhọn akan-ehọ da Osẹnobulua. Ukpo oẹ nan Adamu zẹle, ọle si iloya bi uu re.—Tie Genesis 3:1-6, 19.
Isọtẹ da Osẹnobulua Esu muhẹn ẹghe nọn rẹ taman Ivi nọn mhọn Osẹnobulua akan-ehọ. Ọrọle tale ghe Osẹnobulua bha sẹ ọria nọn ha gbẹloghe. Ene bunbun bhi agbọn yẹ deba Esu yọle Osẹnobula bha sẹ ọria nọn ha gbeloghe. Iriọ Esu rẹ kiẹn ‘ojie ọsi ọnin agbọn nan.’—Tie John 14:30; 1 John 5:19.
2. Ebi Osẹnobulua man bha be gba?
Ebi Osẹnobulua man rẹbhe gbamhin. Ẹghe nin Osẹnobulua rẹ man ẹhi bi eria, ele gbamhin. Ele dẹ sabọ ka Osẹnobulua ehọ nọnsẹn. (Deuteronomy 32:4, 5) Osẹnobulua yẹ re isẹhoa nele rẹ tobele zẹ sele dẹ lu emhin nọn mhẹn la emhin ebe. Ọnin isẹhoa nin re otọ mhan rẹ rẹman si mhan gene hoẹmhọn Osẹnobulua.—Tie James 1:13-15; 1 John 5:3.
3. Bezẹle nin Osẹnobulua da ji iloya ha ribhọ rẹ sẹbhi ẹlẹnan?
Nanbhi ẹghe nin Adamu bi Ivi rẹ sọtẹ da Jehova bhi Idẹn rẹsẹbhi ẹlẹnan, Jehova sẹyẹ re ẹghe ne ẹbho rẹ ha sọte da ugbẹloghe nọnsọle. Bezẹle? Nọnle rẹ rẹman ghe ugbẹloghe nọn nin obọ nọnsọle vae, ọle ọkpa elele ye. (Ecclesiastes 7:29; 8:9) Ikpe 6,000 ki sẹ gbera, eria ne gbẹloghe agbọn bha sabọ re okhọnlẹn, ugbe, ohiẹn-eku, bi emianmhẹn sibhi agbọn re. Enan mhan rẹ lẹn ghe elele iribhi ugbẹloghe ọsi eria.—Tie Jeremiah 10:23; Romans 9:17.
Ugbẹloghe nọnsi Osẹnobulua bha diabi ọsi eria. Elele ribhọ rẹji ene ribhi otọle rebhe. (Isaiah 48:17, 18) Jehova dẹ kẹ re ọkpẹnlẹn ji ugbẹloghe ọsi ọnin agbọn nan rebhe. Eria ne zẹ ugbẹloghe nọnsi Osẹnobulua, ele ọkpa da nyẹn bhi ọnin otọ nan.—Isaiah 11:9; Tie Daniel 2:44.
Ghe ọne ividio Bezẹle Nin Osẹnobulua Da Ji Iloya Ha Ribhọ?
4. Be bhọ iziẹngbe nọnsi Osẹnobulua re ẹghe man rẹ lu?
Esu yọle ghe elele nin mhan miẹn, ọle zẹle nin mhan da ga Osẹnobulua. Ọyẹẹ ẹ nuwẹ rẹ rẹman ghe ohoghe khọnin? Uwẹ dẹ sabọmhin! Iziẹngbe nọnsi Osẹnobulua re ẹghe mhan rẹ tare si ugbẹloghe nọnsi Osẹnobulua yẹẹ mhan nẹn, la ọsi ọnin agbọn nan. Beji mhan rẹ nyẹnlẹn, ọle da tare ọnin mhan zẹle.—Tie Job 1:8-12; Proverbs 27:11.
5. Bi mhan arẹ zẹ ugbẹloghe nọnsi Osẹnobulua yẹ?
Uwedẹ nin mhan zẹle da rẹman si mhan guano ugbẹloghe nọnsi Osẹnobulua
Mhan dẹ sabọ zẹ ugbẹloghe nọnsi Osẹnobulua sade mhan luẹ uwedẹ oga ẹmhọn-ata nọn ribhi Baibo, sẹyẹ ga Osẹnobulua bhi ọnin uwedẹ. (John 4:23) Mhan ha ne obọ sibhi okhọnlẹn bi ilọnmhọn efinẹfi re beji Jesu lu, ọrẹman ghe mhan he ugbẹloghe ọsi Esu.—Tie John 17:14.
Esu ri igboghẹ bi emhin nei mhẹn nin ẹbho lu ẹlẹnan diabi ebe mhẹn. Imọẹ mhan bi ibhio mhan eso sabọ a jiẹ mhan, la ekpokpo mhan ranmhude mhan rẹban ene emhin nan. (1 Peter 4:3, 4) Mhan ki da tobọ mhan zẹ. Mhan dẹ nin ene hoẹmhọn Osẹnobulua mun obọ? Mhan dẹ re obọ rẹkhan uhi ne mhẹn nọnsi Osẹnobulua? Mhan ha lu iriọ, mhan ki rẹman ghe ohoghe Esu bhale beji ọyọle ghe mhan ha ribhi okakale, mhan ida ka Osẹnobulua ehọ.—Tie 1 Corinthians 6:9, 10; 15:33.
Edandan iribhọ ghe Osẹnobulua dẹ re iloya bi emhin ebe sibhọ re. Ranmhude, ọle hoẹmhọn mhan. Ene rẹman ghe ene rẹọbhọ dẹ sọnyẹnmhẹn bhi otọ bhi ighegheghe.—Tie John 3:16.
