ILUẸMHIN 4
Ọbhọ IJesu Kristi?
1. Bi iẹnlẹn nọnsi Jesu rẹ muhẹn yẹ?
Bezẹle nin Jesu da ha yi ọria nin ọrebhe sabọ sikẹ?—MATTHEW 11:29; MARK 10:13-16.
Jesu bha dia bi mhan nin eria. Ẹlinmhin ọle ka khin bhi okhun, ọkuẹsẹ ọle vae bhi otọ. (John 8:23) Ọle emhin ọhẹnhẹn nin Osẹnobulua ka man. Ọle deba Osẹnobulua man emhin nekẹle rebhe. Ọle ọkpa Osẹnobulua tobọle man, ọlezẹle nan da tiọle ‘ukpọ ọmọn ọkpa sẹsẹ nọnsi Osẹnobulua.’ (John 1:14) Ranmhude Jesu talọ nin Osẹnobulua, ọlezẹle nan da tiọle ‘Ọta’ bhi Baibo.—Tie Proverbs 8:22, 23, 30; Colossians 1:15, 16.
2. Bezẹle nin Jesu da vae bhi otọ?
Osẹnobulua da nanbhi okhun re iẹnlẹn ọsi Ọmọn nọnsọle ọbhi ẹkẹ ọsi ọmanmhẹn nọn bha hẹgẹn natiọle iMeri. Bhiriọ, Jesu i mhọn aba bhi ọnin otọ nan. (Luke 1:30-35) Enin emhin ea nan zẹle nin Jesu da vae bhi otọ: (1) nọn rẹ man ẹbho ẹmhọn-ata nọnsi Osẹnobulua, (2) nọn rẹman ghe, arẹmiẹn mhan ribhi ọkakale, man dẹ sabọ lu iho nọnsi Osẹnobulua, (3) nọn dọ re egbe nọn gbale nọnsọle rẹ zọẹse mhan.—Tie Matthew 20:28.
3. Bezẹle nọn da khẹke nan zọẹse mhan?
Izọẹse arẹ miẹn ẹbho fan bhu uu ẹghe eso. Emhin aha rẹ zọẹse. (Exodus 21:29, 30) Idọmalẹn bi uu iribhi emhanmhan nọnsi Osẹnobulua. Bi mhan rẹ lẹn ọnin yẹ? Ẹghe nin Osẹnobulua rẹ man okpea nin ọhẹnhẹn natiọle Adamu, ọda taman lẹn ghe aha miẹn ọle lu olukhọ, ọdẹ yumhin. Sade ọle bha lu olukhọ, Adamu irẹ yu. (Genesis 2:16, 17; 5:5) Beji Baibo tale, obọ Adamu uu nan nanbhi agbọn. Iriọ imọn nọnsi Adamu rebhe rẹ le uu bi olukhọ bhi uku. Ọkhẹke nin ọria zọẹse rẹ miẹn mhan fan bhi obọ uu nin Adamu sire.—Tie Romans 5:12; 6:23.
Ọbhọ da sabọ zọẹse rẹ miẹn mhan fan bhi uu? Mhan ha yu, mhan ki rọle haosa bhi olukhọ nọn sẹmhan. Mhan ida sabọ zọẹse bhi olukhọ ọsi ọria ọbhebhe, ranmhude ọbha gba mhan.—Tie Psalm 49:7-9.
4. Bezẹle nin Jesu da yu?
Ọria nọn gbale Jesu ha khin. Ọle bha dia bi mhan. Ọbha rẹ khẹke nọn yu ranmhude ọbha lu olukhọ soso. Ọda sẹyẹ yu. Bezẹle? Ranmhude olukhọ nọnsi agbọn. Ahoẹmhọn-egbe nọn kokhun nẹ Osẹnobulua rẹman nọn rẹ ji Jesu vae bha agbọn nọn dọ yu mhan. Jesu yẹ rẹman ọle hoẹmhọn mhan nọn rẹ ka Aba le ehọ, ri iẹnlẹn nọnsọle zọẹse mhan.—Tie John 3:16; Romans 5:18, 19.
Ghe ọne ividio Bezẹle Nin Jesu Da Yu?
5. Bi Jesu ki lu nian?
Ẹghe nin Jesu rẹ ha ribhi ọnin otọ nan, ọhinmhin ene khọnmhọn, riọ ene yu kpanọ, rẹkpa ẹbho neha ribhọ ọnọghọ kẹkẹ. Ọrọle rẹman ebi ọle da lu bhi ẹghe odalo nin ọrebhe ne ka ọle ehọ. (Matthew 15:30, 31; John 5:28) Beji Jesu yu fo, Osẹnobulua da riọ ọle kpanọ bhi egbe ẹlinmhin ha khin okhun. (1 Peter 3:18) Jesu da dotọa bhi obera ọsi Aba le, ọkuẹsẹ Jehova re ahu Ojie nanlẹn rẹ agbẹloghe ọnin agbọn nan rebhe. (Hebrews 10:12, 13) Ejayẹnan, Ojie iJesu khin bhi okhun. Ene rẹkhan lẹn rebhe ta ọnin ọta nọn mhẹn nan nanbhi otọ rebhe.—Tie Daniel 7:13, 14; Matthew 24:14.
Jesu dẹ kẹ ra ahu Ojie nọnsọle rẹ re ọkpẹnlẹn bhi iloya bi ene siọle rebhe. Ene ka Jesu ehọ rebhe dẹ nyẹn bhi ọnin otọ nan bhi ọfubhegbe.—Tie Psalm 37:9-11.
