ILUẸMHIN 2
Ọbhọ Osẹnobulua?
1. Bezẹle nin mhan ada ga Osẹnobulua?
Osẹnobulua ọsi ẹmhọn-ata man emhin rebhe. Ọle imhọn umuhẹn la ọkpẹnlẹn. (Psalm 90:2) Obọ ọle ọta nọn mhẹn nọn ribhi Baibo nan vae. (1 Timothy 1:11) Beji amiẹn Ọsenobulua re iẹnlẹn mhan, ọle ọkpa ọkhẹke nin mhan ha ga.—Tie Revelation 4:11.
2. Ọria bea Osẹnobulua khin?
Ẹlimhin Osẹnobulua khin. Ọnin rẹman ghe, ọle kokhun nin ebe nyẹnlẹn bhi otọ nan. Ọle zẹle mhan nin eria ida sabọ daghọle. (John 1:18; 4:24) Ọrẹ yiriọ, mhan dẹ sabọ lẹn ọria nin Osẹnobulua khin bhi emhin nọnle man. Bhọsi ijiẹmhin, emhin ekọnọn bi aroro kẹkẹ nin Osẹnobulua man, rẹman ghe Osẹnobulua manman mhọn ẹwanlẹn, ọle sẹyẹ hoẹmhọn mhan. Ukpọnọmhin ọsi otọ bi okhun ji mhan lẹn ghe Osẹnobulua manman mhọn ahu.—Tie Romans 1:20.
Mhan ha tie iBaibo, mhan dẹ manman lẹn ọria nin Osẹnobulua khin. Bhọsi ijiẹmhin, Baibo taman mhan ebe yẹ Osẹnobulua bi ebe iyẹ ọle. Ọyẹ taman mhan ebi Osẹnobulua rẹ ne ẹbho lu emhin yẹ, bi ebe emhin dia ọle bhi egbe yẹ.—Tie Psalm 103:7-10.
3. Osẹnobulua mhọn elin?
Jesu tale: ‘Aba mhan nọn ribhi ẹkẹ okhun, ja kpe elin nọnsẹ khia.’ (Matthew 6:9) Arẹmiẹn Osẹnobulua mhọn ovan nebun, elin ọkpa ọle mhọn. Uwedẹ kẹkẹ arẹ tiọle bhi urolo kẹkẹ. Bhi urolo Esan, ‘Jehova’ atiọle. Eso yẹ tiọle ‘Yawẹ.’—Tie Psalm 83:18.
Ọnin elin nan, ọi ribhi Baibo nebun, ranmhude ele ne ọle sibhọ re, eda gbẹn Ọsenobulua la Ebealẹn mhan ọbhọ. Sokpan, ẹghe nan rẹ gbẹn iBaibo, igba 7,000 ọnin elin dagbare bhọ. Jesu re elin Osẹnobulua man ẹbho beji ọle ha man ele ẹmhọn Osẹnobulua.—Tie John 17:26.
Ghe ọne ividio Osẹnobulua Mhọn Elin?
4. IJehova gbẹloghe mhan?
Osẹnobulua guanọ nọn ha mhẹn mhan, bọ nin aba nan, nọn hoẹmhon ọmọn nọnsọle
Iloya nọn gba agbọn rebhe ẹlẹnan, ọkuẹ rẹman ghe iJehova igbẹloghe mhan? Ẹbho eso tale ghe, Osẹnobulua ri iloya dọnmhẹn mhan. Ohoghe khọnin.—Tie James 1:13.
Ekpẹn Osẹnobulua mun mhan, nọn rẹ man mhan nin mhan sabọ tobọ mhan a zẹ ebi mhan ho nin mhan lu. Nin mhan rẹ sabọ tobọ mhan zẹ nan rẹ ga Osẹnobulua, bha be ti uwẹ bhọ? (Joshua 24:15) Ọkpa kinọn, ẹbho nebunbun zẹle ne rẹ ha lu emhin ebe. Ọle zẹle nin iloya da kpọa. Enin emhin ebe nan, ba iJehova bhi egbe.—Tie Genesis 6:5, 6.
Osẹnobulua nọn gbẹloghe mhan iJehova khin. Ọle ho nin mhan ha ghọnghọn. Ọle dẹ kẹ re iloya bi ene mhọn obọ bhọ sibhi ọnin agbọn nan re. Ejayenan, ọle mhọn ebezẹle nọnle da ji iloya ha ribhọ. Bhi Iluẹmhin 8, mhan dẹ luẹ ebezẹle.—Tie 2 Peter 2:9; 3:7, 13.
5. Bi mhan arẹ sikẹ Osenobulua yẹ?
Jehova tie mhan, nin mhan ha nan erọnmhọn ji ọle. Ọnan uwedẹ nin mhan arẹ sabọ sikẹ ọle. Jehova gbẹloghe ọdeọde. (Psalm 65:2; 145:18) Ọle muegbe nọn rẹ rẹhumhan mhan. Ọle lẹnmhin ghe mhan dọnmhegbe nin mhan rẹ lu ebe yẹ ọle, arẹ miẹn imhan dobọ ẹghe eso. Arẹmiẹn ọbha gba mhan, mhan dẹ sabọ kiẹn ọmọẹ Osẹnobulua.—Tie Psalm 103:12-14; James 4:8.
Beji amiẹn Osẹnobulua re iẹnlẹn mhan, ọkhẹke nin mhan hoẹmhọnlẹn gbera emhin rebhe. (Mark 12:30) Beji uwẹ arẹ aluẹ ẹmhọn Osẹnobulua , yẹ lu eka nọnle ta, uwẹ dẹ rẹman ghe uwẹ hoẹmhọn Osẹnobulua. Iriọ, uwẹ ki manman sikẹ ọle.—Tie 1 Timothy 2:4; 1 John 5:3.
