Mhan lẹnmhin ghe, iluẹmhin iBaibo nuwẹ sẹ luẹ ki dẹ ri oyẹẹ nuwẹ mhọn da Jehova dinmhin. Ọkhẹke nuwẹ ha lu ebe ha ri ọnin oyẹẹ nan dinmhin ọbhọ. (1 Peter 2:2) Uwẹa ha luẹ Baibo rẹ sikẹ Osẹnobulua, ọle uwẹ ada sabọ a mhọn aribhọ ọsi ighegheghe.—Tie John 17:3; Jude 21.

Beji uwẹ arẹ a wanre bhi ilẹnmhin nọnsi Osẹnobulua, iriọ urẹọbhọ nọnsẹ arẹ a munzeze. Urẹọbhọ da rẹkpa ẹ rẹ lu ebe ati Osẹnobulua bhọ. (Hebrews 11:1, 6) Urẹọbhọ da rẹkpa ẹ rẹ kioya bhi olukhọ nọnsẹ, yẹ bhii Jehova nọn rẹhunmhan ẹn. Ọki yẹ rẹkpa ẹ rẹ fidenọ bhi iẹnlẹn nọnsẹ.—Tie Acts 3:19.

Mhan lẹnmhin ghe ọdẹ yẹẹ ẹ nuwẹ rẹ taman eria ebhebhe ebi uwẹ luẹ. Ọyẹẹ ọrebhe nanrẹ a ta ọta nọn mhẹn. Beji uwẹ arẹ a luẹ iBaibo, iriọ uwẹ arẹ a luẹ ebi uwẹ arẹ noo iBaibo yẹ, rẹ taman ẹbho ebhebhe ebi uwẹ rẹọ rẹji Jehova bi ọta nọn mhẹn nọnsọle.—Tie Romans 10:13-15.

Ibhio bi imọẹ, eria ne bunbun ka rẹ muhẹn a ta ọnin ọta nọn mhẹn nan. Ọkhẹke nuwẹ re ekpẹn bi ẹwanlẹn rẹ luọ. Hẹi wo ha ri osukpa taman ele ghe ebi ele rẹọ bha gba. Ha taman ele ive ne mhẹn nọnsi Osẹnobulua. Yere ghe, uwedẹ nuwẹ rẹ lu emhin ẹbho ka daghe ele kuẹ kaehọ ebi uwẹ ta.—Tie 2 Timothy 2:24, 25.

Uwẹa ha luẹ iBaibo, uwẹ ki ha wanre bhi uwedẹ oriọn. Akizẹbue, uwẹ bi Jehova ki ko ha mhọn ikolu kpataki. Uwẹ ki sabọ kiẹn ọmọn nọnsọle.—Tie 2 Corinthians 6:18.

Uwẹ dẹ sabọ wanre bhi uwedẹ ọsi oriọn sade uwẹ luẹ iBaibo ẹghe rebhe. (Hebrews 5:13, 14) Taman ọkpa bhi Esali Jehova nọn dọ ri ọne ebe natiọle What Does the Bible Really Teach? a man uwẹ Baibo. Beji uwẹ arẹ manman ha luẹ iBaibo, iriọ iẹnlẹn nọnsẹ arẹ ha mhẹn ọbhọ.—Tie Psalm 1:1-3; 73:27, 28.

Obọ ọsi Jehova, Osẹnobulua ọsi eghọnghọn, ọle ọta nọn mhẹn nan vae. Uwẹ dẹ sabọ sikẹ Osẹnobulua sade uwẹ sikẹ ẹbho nesọle. (Hebrews 10:24, 25) Uwẹ ha kakabọ ha dọnmhegbe nuwẹ rẹ ha lu ebe ti Osẹnobulua bhọ, ọrẹman ghe uwẹ khu bhi aribhọ ọsi ighegheghe. Abha miẹn ebe mhẹn gbera nan rẹ ha sikẹ Osẹnobulua.—Tie 1 Timothy 1:11; 6:19.